არასამთავრობო ორგანიზაციებმა ომბუდსმენობის 3 კანდიდატი დაასახელეს:
- სახალხო დამცველის მოქმედი მოადგილე, გიორგი ბურჯანაძე;
- იუსტიციის უმაღლესი საბჭოს ყოფილი წევრი და ორგანიზაცია სასამართლოს გუშაგის დამფუძნებელი, ნაზი ჯანეზაშვილი.
- პარტნიორობა ადამიანის უფლებებისთვის (PHR) ერთ-ერთი დამფუძნებელი, ანა აბაშიძე;
დღეს გამართულ ბრიფინგზე ითქვა, რომ კანდიდატების შერჩევის პროცესში 52 ორგანიზაცია და ჯგუფი მონაწილეობდა. საფარის აღმასრულებელი დირექტორის, ბაია პატარაიას განცხადებით, მათ დაიწყეს სხვადასხვა კანდიდატის ნომინირება, შემდეგ ჩატარდა სხვადასხვა პროცედურა, მათ შორის, კენჭისყრა და შეირჩა სამი კანდიდატი.
“როგორც იცით, ჩვენ მთელი აგვისტოს და სექტემბრის განმვლობაში ვმუშაობდით, რომ მოგვეძებნა ომბუდსმენობის კანდიდატები. ჩვენ შევიმუშავეთ საკმაოდ სერიოზული კრიტერიუმები, რომელთა დაკმაყოფილება არცთუ ისე ადვილია. გარდა იმისა, რომ ეს უნდა ყოფილიყო დამოუკიდებელი, მაღალი ეთიკის, ადამიანის უფლებების სფეროში გამოცდილების, განათლების მქონე კანდიდატი, ასევე, მნიშვნლოვანი იყო, რომ ამ ადამიანს ჰქონოდა უფლებადაცვით საქმიანობაში მინიმუმ ხუთწლიანი გამოცდილება, ის არ უნდა ყოფილიყო პარტიული, არც ამჟამად და არც ბოლო 5 წლის განმავლობაში მას არ უნდა ჰქონოდა რაიმე პოლიტიკური თანამდეობა ან ყოფილიყო რომელიმე პარტიის წევრი”, — განაცხადა ბაია პატარაიამ.
მისივე ინფორმაციით, გაგრძელდება მუშაობა პოლიტიკურ სუბიექტებთან და პარტიებთან, რათა მათაც ეს სამი ადამიანი დაასახელონ და პარლამენტმა კენჭი სწორედ ანა აბაშიძეს, გიორგი ბურჯანაძესა და ნაზი ჯანეზაშვილს უყაროს.
მოქმედ ომბუდსმენს, ნინო ლომჯარიას ვადა 2022 წლის დეკემბერში ეწურება.
საქართველოს კანონმდებლობის მიხედვით, სახალხო დამცველს პარლამენტი ირჩევს, 6 წლის ვადით.
საქართველოს სახალხო დამცველის შესახებ კანონის თანახმად, ომბუდსმენი ზედამხედველობას უწევს ადამიანის უფლებათა და თავისუფლებათა დაცვას საქართველოს ტერიტორიისა და მისი იურისდიქციის ფარგლებში. ასევე, სახელმწიფო ხელისუფლებისა და ადგილობრივი თვითმმართველობის ორგანოების, საჯარო დაწესებულებების და თანამდებობის პირების მხრიდან საქართველოს ტერიტორიის ფარგლებში და მის იურისდიქციაში მყოფი ყველა პირისთვის სახელმწიფოს მიერ აღიარებული უფლებებისა და თავისუფლებების დაცვასა და პატივისცემას; გარდა ამისა, სახალხო დამცველი ავლენს ადამიანის უფლებების დარღვევის, მათ შორის, დისკრიმინაციის ფაქტებს და ხელს უწყობს დარღვეული უფლებებისა და თავისუფლებების აღდგენას; ომბუსმენი ეწევა საგანმანათლებლო საქმიანობას ადამიანის უფლებათა და თავისუფლებათა სფეროში, ასევე, ასრულებს პრევენციის ეროვნული მექანიზმის ფუნქციებს.
საქართველოს სახალხო დამცველი თავის საქმიანობაში დამოუკიდებელია და ხელმძღვანელობს საქართველოს კონსტიტუციით, საქართველოს საერთაშორისო ხელშეკრულებებითა და შეთანხმებებით, საერთაშორისო სამართლის საყოველთაოდ აღიარებული პრინციპებითა და ნორმებით.
