ისრაელის ჯანდაცვის მინისტრი ნიცან ჰოროვიცი აცხადებს, რომ 11 იანვრიდან მამრობითი სქესის წყვილებს, ტრანსსექსუალებსა და მარტოხელა მამაკაცებს ისრაელში სუროგაციაზე თანაბარი უფლებები ექნებათ.
ივლისში, უმაღლესი სასამართლოს გადაწყვეტილებით, ისრაელის ჯანდაცვის სამინისტრომ ქვეყნის სუროგაციის კანონი შეცვალა. გადაწყვეტილების თანახმად, კანონში არსებული დისკრიმინაციული დეფინიციები გაუქმდა, რომლის გამოც ზოგიერთ მამაკაცს არ ჰქონდა სუროგაციაზე ხელმისაწვდომობა, როგორც ქალებს.
ადრე ისრაელში სუროგაცია მხოლოდ ჰეტეროსექსუალი წყვილებისთვის იყო ხელმისაწვდომი, ან ქვეყანაში მუდმივად მცხოვრები ქალებისთვის, რომლებსაც ჰქონდათ ჯანმრთელობის პრობლემები, რაც დაორსულებას ან ორსულობის შენარჩუნებას უშლიდა ხელს.
ჰოროვიცმა აღნიშნა, რომ ლგბტ+ თემის წევრებს უნდა ჰქონდეთ თანაბარი უფლებები, როგორც მშობლებს.
„დღეს ჩვენ წერტილს ვუსვამთ წლების უსამართლობასა და დისკრიმინაციას. ყველას აქვს უფლება, იყოს მშობელი.“ – განაცხადა მინისტრმა სამშაბათს გამართულ პრესკონფერენციაზე.
კანონის თანახმად, მოქალაქეებმა სუროგაციაზე ნებართვა ჯანდაცვის სამინისტროს სუროგაციის კომიტეტისგან უნდა მიიღონ, რომელიც განმცხადებლის უფლებამოსილებას განიხილავს. ნებართვის გაცემის შემთხვევაში, ხელშეკრულება მშობლებმა და სუროგატმა დედამ უნდა დაამტკიცონ.
