ტრანსგენდერი ადამიანების დროშის მთავარი ფერებია: ვარდისფერი, ლურჯი და თეთრი. დროშის შექმნის იდეა 1999 წელს გაჩნდა და ის თავად ღიად ტრანსგენდერმა ადამიანმა, ამერიკელმა მონიკა ჰელმსმა შექმნა. დროშა პირველად 2000 წელს, არიზონას შტატში გამართულ პრაიდზე გამოჩნდა.
მონიკა ჰელმსი
დროშაზე ზედა და ქვედა ზოლები ღია ცისფერია, ე.წ. ,,ტრადიციული” ფერი ბიჭებისთვის. მათ გვერდით ზოლები ვარდისფერია – ,,ტრადიციული” ფერი გოგონებისთვის, შუაში თეთრი ზოლი გამოხატავს ინტერსექს ადამიანებს, მათ, ვინც ტრანზიციას გადის ან გენდერულად ნეიტრალურია. ,,დროშის იდეა ასეთია – არ აქვს მნიშვნელობა, რა მიმართულებით იფრენთ, ეს გზა ყოველთვის სწორია”, – ამ სიტყვებით განმარტავს ავტორი დროშის მნიშვნელობას.
მონიკა ჰელმსი, რომელიც ამერიკული სამხედრო ფლოტის ვეტერანია, ამავდროულად არის აქტივისტი და მწერალიც. ის ამჟამად ატლანტაში ცხოვრობს და აქტიურადაა ჩართული ამ შტატში ტრანსგენდერთა ხსოვნის საერთაშორისო დღის ორგანიზებაში. მან პირველი ტრანსგენდერი ადამიანების დროშა საჩუქრად გადასცა ვაშინგტონში ამერიკის ისტორიის სმიტსონის ეროვნულ მუზეუმს, რომელშიც LGBT თემატიკის კოლექციები და ნიმუშებია დაცული.
