ამ კვირაში ოლიმპიურ სცენაზე პირველად იასპარეზა 43 წლის ღიად ტრანს ქალმა, ძალოსანმა ახალი ზელანდიიდან, ლაურელ ჰაბარდმა. ჰაბარდის პერსონალური საუკეთესო შედეგი ატაცში 132 კილოგრამია, თუმცა ამჯერად მან 125 კილოგრამის აწევა ვერ შეძლო.
სცენის დატოვებისას, ჰაბარდმა მაყურებლებს გაუღიმა და გული გაუგზავნა. ”ჩემი შედეგი არ იყო ის, რისი იმედიც მქონდა, მაგრამ მე ძალიან მადლიერი ვარ იმ მხარდაჭერით, რაც მივიღე ამდენი ადამიანისგან ახალ ზელანდიაში” – განაცხადა ჰაბარდმა ჟურნალისტებთან. ძალოსანმა ასევე დაამატა, რომ მან იცოდა, მისი მონაწილეობა ოლიმპიადაში ”საკამათო” რომ იყო. სპორტსმენმა მადლობა გადაუხადა ძალოსნობის საერთაშორისო ფედერაციას ინკლუზიურობისადმი ერთგულებისთვის.
Chris Graythen/Getty Images
2012 წელს, ჰაბარდის ჰორმონალური თერაპიისა და ქამინგაუთის შემდეგ, ის გახდა პირველი საჯარო ტრანს ათლეტი, რომელმაც 2017 წელს მსოფლიო ჩემპიონატი მოიგო. იმ დროს ის გააკრიტიკეს ქალთა შორის კონკურენციის გამო, რამაც გამოიწვია დებატები, რამდენად სამართლიანია ასეთი მონაწილეობა და ეს დისკუსია დღემდე გრძელდება. შეზღუდვა, რომლის მიხედვით ქალთა განყოფილებაში მონაწილეობა ეკრძალებათ სპორტსმენებს, რომელთა სისხლშიც ლიტრზე 10 ნანომოლი ტესტოსტერონია, ასევე ზიანს აყენებს ცისგენდერ სპორტსმენებსაც, რომლებიც არ შეესაბამებიან ამ სტანდარტებს. ეს შეზღუდვა შეეხო, მაგალითად, კასტერ სემენიას, ქრისტინ მბომას და ბეატრის მასლინგის – შავკანიან მორბენლებს, რომლებსაც აუკრძალეს ოლიმპიური შეჯიბრება ტესტოსტერონის სავარაუდო ამაღლებული დონის გამო.
საერთაშორისო ოლიმპიურმა კომიტეტმა არ დაუშვა ოლიმპიადაზე სხვა ტრასნი სპორტსმენი – მორბენალი სესე ტელფერი, რომელმაც ვერ დააკმაყოფილა დაწესებული სტანდარტი ჰორმონების დონესთან დაკავშირებით. თუმცა ოლიმპიური კომიტეტი აღიარებს, რომ ეს შეზღუდვა ჰორმონებთან დაკავშირებით, მოძველებულია. ”ადრე ჩვენ ვფიქრობდით, რომ მამაკაცებისთვის 10 ნანომოლი ჰორმონების დაბალი დონეა, მაგრამ ახლა ჩვენ ვიცით, რომ ისინი 7-მდეც დადიან და ქალებშიც შეიძლება უფრო მაღალი მაჩვენებელი იყოს” – განაცხადა ახალი ამბების ბრიტანულ გამოცემასთან საერთაშორისო ოლიმპიური კომიტეტის მედიცინისა და მეცნიერების დირექტორმა, რიჩარდ ბაგეტმა. ”სხვა რიცხვებზე შეთანხმებაც შეუძლებელია და არარელევანტური. ამაზე დებატი შეიძლება დაუსრულებლად.”
წყარო: them.us
