დიდ ბრიტანეთში აივ-ინფიცირების ახალი შემთხვევების 49% ჰეტეროსექსუალებზე მოდის, გეი და ბისექსუალ კაცებში კი ეს მაჩვენებელი 45%-ზეა. გასულ ათწლეულში ეს პირველი შემთხვევაა, როცა ინფიცირების მაჩვენებელი ჰეტეროსექსუალებში უფრო მაღალია, ვიდრე გეი და ბისექსუალ კაცებში, რაც იმის მაჩვენებელია, რომ ვირუსის გავრცელების მახასიათებლები იცვლება. დიდი ბრიტანეთის ხელისუფლება იმედოვნებს, რომ დაუღალავი ძალისხმევით 2030 წლისთვის ახალი შემთხვევების შეჩერებას შეძლებს.
აღნიშნული მონაცემების მიზეზი ის კი არ არის, რომ ჰეტეროსექსუალებში აივ-ინფექციის გავრცელება მომატებულია, არამედ ის, რომ გეი და ბისექსუალ კაცებში ახალი შემთხვევების მკვეთრ კლებასთან გვაქვს საქმე. 2014 წლიდან დღემდე გეი და ბისექსუალ კაცებში ახალი შემთხვევების გამოვლენა 71%-ით შემცირდა.
უნდა აღინიშნოს ისიც, რომ სიახლე პანდემიური რეალობის გავლენას არ მიეწერება, რამაც სქესობრივი კავშირების და ტესტირების მაჩვენებლის შემცირება გამოიწვია. 2020 წლიდან დღემდე გეი და ბისექსუალ კაცებში ტესტირების მაჩვენებელი სულ რაღაც 7%-ით არის შემცირებული, ჰეტეროსექსუალებში კი პანდემიამდე არსებული მაჩვენებლის მესამედამდე დაეცა.
ბრიტანეთში არსებული საიმედო ცვლილებები იმ ძალისხმევის შედეგია, რომლის მსგავსიც საქართველოშიც არსებობს, მაგალითად, ტესტირების სახლიდან გაუსვლელად ჩატარების შესაძლებლობა, რაც სრულიად უფასოა, ასევე პრეპ პროგრამა, რაც ვირუსის გავრცელებას 99%-ით ამცირებს.
ასევე ნახეთ: ყველაფერი პრეპის პროგრამის შესახებ – თანასწორობის მოძრაობა
უკვე დიდი ხანია, აივ-ინფექცია მართვადი მდგომარეობაა და მედიკამენტების მიღების შედეგად, ვირუსის შემცველობა სისხლში ნულის დონემდე დადის, რაც ვირუსის დროულად აღმოჩენის შემთხვევაშია შესაძლებელი.
აივ-სტატუსს იმუნური სისტემის დაზიანების შემდეგ ქალების 51%, ჰეტერო კაცების 55% და 65 წელს გადაცილებული ადამიანების 66% იგებს, აღნიშნული მაჩვენებელი გეი და ბისექსუალ კაცებში სულ რაღაც 29%-ია.
აივ-ინფექციასთან დაკავშირებით მთავარ გამოწვევად სტიგმა რჩება, რაც 80-იანი წლების გავლენის ბრალია. თუმცა, ბოლო წლებში მიმდინარე პროცესები აჩვენებს, რომ გეი და ბისექსუალი კაცები აივ-ტესტირებას ბევრად აქტიურად მიმართავენ, პრეპ პროგრამაში ერთვებიან და აღნიშნული ცვლილებებიც ამის მანიშნებელია.
წყარო: The Guardian
