მიმდინარე წლის ნოემბრის თვეში შპს “პოლიგრაფი”-ს დირექტორმა გოჩა კამკამიძემ დისკრიმინაციული მოტივით უარი თქვა ჟურნალ „ქვიარი“-ს ბეჭდვაზე. მან განაცხადა რომ როგორც მართლმადიდებელი ქრისტიანი მონაწილეობას ვერ მიიღებს ე. წ. გეი პროპაგანდის ხელშეწყობაში:
„მე ამ ჟურნალს ვერ დავბეჭდავ. მე გახლავართ მორწმუნე ადამიანი, მართლმადიდებელი. თქვენ აქ რაღაც სხვა პროპაგანდას ეწევით. მე არ შემიძლია ამას ხელი მოვკიდო, მითუმეტეს რომ შობა მოდის.“ – მომსახურეობაზე უარს ამგვარად ასაბუთებს გოჩა კამკამიძე.
ფაქტი, რომ მომსახურეობაზე უარი სექსუალური ორიენტაციის ნიშნით არის განპირობებული დასტურდება შპს „პოლიგრაფი“-ს დირექტორის შემდეგი სიტყვებით: „ვისაც უნდა ისეთი ორიენტაციის იყოს, როგორიც უნდა რელიგიური მრწამსი თუ მსოფლმხედველობა ჰქონდეს, უბრალოდ მე არ ვმონაწილეობ იმაში, რაშიც არ მინდა მონაწილეობის მიღება.”
ბატონი გოჩა დარწმუნებულია რომ კომპანიას აქვს უფლება უარი თქვას მომსახურეობის გაწევაზე დისკრიმინაციული მოტივით: „ბოლოს და ბოლოს დავბეჭდავთ რამეს თუ არა ჩვენი უფლებაა და არა თქვენი!“ – აცხადებს ის ქვიარის ბეჭდვასთან დაკავშირებულ მიმოწერაში.
ქვიარი მიმართავს სახალხო დამცველს შპს “პოლიგრაფი”-ს წინააღმდეგ განცხადებით, რომლითაც სექსუალური ორიენტაციის ნიშნით დისკრიმინაციის ფაქტის დადგენასა და შესაბამის რეაგირებას ითხოვს.
ჟურნალი „ქვიარი“ სხვა კომპანიამ დაბეჭდა, ხოლო ჟურნალის ელექტრონული ვერსიის ნახვა შესაძლებელია შემდეგ ბმულზე: QUEER Magazine
