ფონდი „ქალთა ფონდი საქართველოში“ 2005 წლიდან არსებობს და მისი მისიაა ქალთა ორგანიზაციებისა და ჯგუფების გაძლიერება ცენტრსა და რეგიონებში ქალთა უფლებების განხორციელების, საზოგადოებრივ ცხოვრებაში მათი სრულფასოვანი მონაწილეობისა და თვითრეალიზაციისათვის.
წარმოგიდგენთ ფონდის „ქალთა ფონდი საქართველოში“ აქტივობებს 2022 წლის დეკემბრის თვეში:
- დეკემბერში ფონდის მიერ დაფინანსებული და დაწყებული პროექტების რაოდენობა იყო 26: უკრაინელი და ბელორუსი სამოქალაქო აქტივისტი ქალების მხარდასაჭერად; ინტერსექციული ფემინისტური მოძრაობის განვითარების ხელშეწყობისთვის.
- ფონდს ბოლნისში, დმანისსა და გარდაბანში გენდერული თანასწორობის საბჭოებთან ჰქონდა შეხვედრები სექსუალური და რეპროდუქციული ჯანმრთელობისა და უფლებების შესახებ. ორგანიზაციამ სტუმრებს გააცნო კონცეფცია, ტერმინები და განმარტებები, ასევე საქართველოს კანონმდებლობა და საერთაშორისო დოკუმენტები, რომლებიც საქართველოს აქვს რატიფიცირებული. ორგანიზაციის ერთ-ერთმა გრანტის მიმღებმა გარდაბანში პაპილომავირუსზე საინფორმაციო შეხვედრები ჩაატარა, მეორემ — ბოლნისში 500 ქალი წაიყვანა სკრინინგზე.
- ფონდმა მოამზადა ვიდეო პაპილომავირუსისა და ვაქცინაციის მნიშვნელობის შესახებ. ასევე გაკეთდა მეორე ვიდეო ქალების, როგორც მშობიარე პაციენტების, უფლებებზე.
- ფონდი აგრძელებს ვიდეოების სერიას კამპანიით ქალთა შრომითი უფლებების შესახებ, რომელიც ძირითად ფოკუსს გააკეთებს დასაქმებულების საჭიროებებზე მორგებული გარემოს აუცილებლობასა და სიკეთეებზე. უკვე მზადაა ვიდეოები: მენსტრუაციული შვებულების, ტრანს* ადამიანების დასაქმების პროგრამის, სამუშაო ადგილას ლაქტაციის ოთახისა და ჰიჯაბიანი ადამიანების დასაქმებასთან დაკავშირებით.
- ორგანიზაციამ დაიწყო მუშაობა კატო მიქელაძის პრემიის ტრანსფორმაციისთვის. გარდა ამისა, ამ ერთი წლის განმავლობაში ფონდი მხარდამჭერებს გაახსენებს ან გააცნობს პრემიის მფლობლებს და ამისთვის პირველ ვიდეოზე მუშაობის დასრულება მალე იგეგმება.
