ამერიკის დაავადებათა კონტროლისა და პრევენციის ცენტრი (CDC) აქვეყნებს ანგარიშს, სადაც მკვლევრები საუბრობენ ტრანსგენდერი ქალების საჭიროებებზე, კერძოდ, მათ ხელმისაწვდომობაზე სამედიცინო სერვისებსა და მედიკამენტებზე და აივ ინფექციის გავრცელებაზე.
აღნიშნული კვლევა 25 იანვარს გამოქვეყნდა. მონაცემები ეყრდნობა 2019-2020 წლებში ჩატარებულ გამოკითხვას, რომელშიც მომაწილეობდა 1600-ზე მეტი ტრანსგენდერი ქალი. აღმოჩნდა, რომ საკმაოდ მაღალია აივ ინვექციის გავრცელების მაჩვენებელი, განსაკუთრებით შავკანიან და ლათინო-ამერიკელ ტრანსგენდერ ქალებს შორის. ასევე, აღმოჩენილია კავშირი ტრანსგენდერთა მიმართ დისკრიმინაციასა და სამედიცინო სერვისების ხელმისაწვდომობას შორის. კვლევის ფარგლებში 10-დან 7 ტრანსგენდერი ქალი აღნიშნავდა, რომ განიცდიდა დისკრიმინაციას ბოლო წლებში, ხოლო 42% აღნიშნავდა, რომ ის ან გაანთავისუფლეს სამსახურიდან ან საერთოდ ვერ პოულობდა სამსახურს და საცხოვრებელს.
კვლევის ავტორები ანგარიშში აქვეყნებენ, რომ ტრანსგენდერი ქალების მიმართ დისკრიმინაცია დიდწილად განაპირობებს სამედიცინო სერვისებისა და მედიკამენტების ხელმისაწვდომობის არ ქონას, რაც ხელს უწყობს სხვადასხვა ინფექციების გავრცელებას. იმის გამო, რომ ვერ შოულობენ სამსახურსა და საცხოვრებელ სახლს, ბევრი ტრანსგენდერი ქალი იძულებულია ჩაერთოს სექს სამუშაოში. მათ არ აქვთ დაზღვევა, ეკონომიკური სტაბილურობა და ჯანმრთელობის მდგომარეობა მნიშვნელოვნად უარესდება. “ტრანსგენდერ ქალებს უნდა ჰქონდეთ ღირსეული ცხოვრებისა და მუშაობის საშუალება, რაც საშუალებას მისცემს მათ, ჰქონდეთ საჭირო სამედიცინო სერვისები და მედიკამენტები.” -ამბობს კვლევის ერთ-ერთი ავტორი.
