სამოქალაქო აქტივისტის, ნატა ფერაძის მანქანა უცნობმა პირებმა შეღებეს და შეურაცხმყოფელი წარწერები დატოვეს. ნატა ფერაძის კამერით დაფიქსირებულ კადრებში ჩანს, როგორ მიდის 2 შენიღბული კაცი ავტომანქანასთან და მის შეღებვას იწყებს.
ნატა ფერაძე ქვიართან ამბობს, რომ აღნიშნული თავდასხმის ორი ვერსია აქვს, მათ შორის, კახა კალაძის მიმართ არსებული კრიტიკული პოზიცია.
„ჩემი შეფასებით, ეს მიზანმიმართული გაფრთხილება და დაშინების მცდელობაა, სხვა ახსნა არ მაქვს. ბევრ ფრონტზე მყავს ადამიანები გაღიზიანებული, რომელთაც ჩემ მიმართ აგრესია აქვთ, მაგრამ ყველაზე მეტად კახა კალაძეს ვუკავშირებ, რადგან, მის მიმართ განსაკუთრებით მწვავე ვიყავი ბოლო პერიოდში, შადრევნის შემთხვევის შემდეგ, როცა მისი დაუდევრობის გამო 13 წლის ბავშვი მოკვდა. შეიძლება იყოს ალტ-ინფოც, რომელთაც ვებრძვი, ანტირელიგიური მოწოდებებს ვაჟღერებ, ვეწინააღმდეგები პარლამენტის წინ მათ მიერ აღმართულ ჯვარს და ამის გამო აგრესია აქვთ“, — აღნიშნა ნატა ფერაძემ.
ნატა ფერაძის თქმით, სოციალურ ქსელებში გავრცელებული ვიდეოკადრები მისმა კამერამ დააფიქსირა, თუმცა ოფიციალური უწყებებისგან მოითხოვა მიმდებარე ტერიტორიაზე არსებული სასტუმროების სათვალთვალო კამერების ჩანაწერები, რათა მოხდეს იმ პირების ნიღბის გარეშე გაშიფვრა, რომლებიც მისი საცხოვრებელი სახლისკენ გადაადგილდებოდნენ.
აქტივისტი აღნიშნავს, რომ პოლიციის განყოფილებაში მის მიმართ ნეგატიური დამოკიდებულება იგრძნო, რაც შესაძლოა ეკლესიის მიმართ გაცხადებული წინააღმდეგობით იყოს განპირობებული.
„პოლიციის განყოფილებაში გასაოცარი მდგომარეობა დამხვდა. ხატებით იყო იქაურობა მოფენილი, ლამის ყველას ფსკვნილი ეჭირა ხელში, მოვიდა გამომძიებელი ოქროს ჯვრით და დამიდო წინ. ტიპებმა მაგრძნობინეს, რომ “ნათელ მხარეს” არიან. ეს არ არის სეკულარული ქვეყნის პოლიცია, როგორ შეიძლება რომელიმე ერთი რელიგიის სიმბოლოები იყოს ამ ოდენობით. დისკომფორტს უქმნის მოქალაქეს, რომელიც შეიძლება იყოს გადასახადების გადამხდელი, მაგრამ არ იყოს მიმდევარი იმათი რელიგიის“, — ამბობს ნატა ფერაძე.
ნატა ფერაძე ამბობს, რომ მისთვის პირად სივრცეში შეჭრა ის ზღვარია, რომლის გადაკვეთა კატეგორიულად მიუღებელია.
„ვაპირებ, სამართალდამცველები მაქსიმალურად გავააქტიურო, რადგან ეს არის პირად სივრცეში შემოჭრა, სადაც მყავს 2 შვილი და პირველ რიგში, მათთვის არის დისკომფორტი. ჩემი არჩევანია, თუმცა პირადად მე ყოველთვის ვარ კატეგორიულად წინააღმდეგი და მაგალითად, არასდროს მივსულვარ კალაძის ან ღარიბაშვილის სახლთან და მუდამ ვაპროტესტებ პირად სივრცეში შეჭრას. პირადი სივრცის დარღვევა არის ისეთი ზღვრის გადალახვა, რაც საშინელ შეგრძნებას იწვევს“, — აღნიშნავს ნატა.
აქტივისტის თქმით, სამოქალაქო საზოგადოების მხარდაჭერამ და ადამიანის უფლებათა სახლის გადაწყვეტილებამ, რომ ადვოკატი გამოეყოთ, საქმის ბოლომდე მიყვანის იმედი მისცა.
