ფიფას დისციპლინარულმა კომიტეტმა ესპანეთის ფეხბურთის ფედერაციის პრეზიდენტს – რუბიალესს ფეხბურთთან დაკავშირებული ყველა აქტივობა ეროვნულ და საერთაშორისო დონეზე 90 დღით შეუჩერა.
ცოტა ხნის წინ ესპანეთის ფეხბურთის ქალთა გუნდმა ისტორიული გამარჯვება მოიპოვა. ქალთა ფეხბურთის მსოფლიო ჩემპიონატის გამარჯვებული ესპანეთი პირველად გახდა, სადაც ფინალში 1-0 გაიმარჯვა ინგლისის გუნდთან. დაჯილდოების ცერემონიაზე კი, ფედერაციის პრეზიდენტმა ლუის რუბიალესმა ფეხბურთელ ჯენი ერმოსოს ტუჩებში აკოცა.
რუბიალესის ქმედება მალევე გააკრიტიკეს როგორც ფეხბურთელებმა, ასევე ფემინისტებმა და გულშემატკივრებმა. “მათ, ვინც ფიქრობს რომ ყველაფერი შეუძლია და ამისთვის პასუხი არ მოეთხოვება, ძალიან ცდება. ნებისმიერ შევიწროვებას უნდა ჰქონდეს რეაგირება” – ამბობენ ფეხბურთელები.
ფედერაციის პრეზიდენტი რუბიალესი ამბობს, რომ არანაირ შევიწროვებას ადგილი არ ჰქონია და მსგავსად შეიძლება ეკოცნა მისი შვილებისთვისაც.
ესპანეთის სამეფო ფეხბურთის ფედერაციამ (RFEF) ჯენი ერმოსო ცილისწამებაში დაადანაშაულა და მის მიმართ სამართლებრივი დავის დაწყება დააანონსა. რუბიალესის განმარტებით კოცნა არ იყო თანხმობის გარეშე, რადგან ფეხბურთელმა ქალმა მას კოცნითვე უპასუხა. ფედერაციამ ასევე გამოთქვა წუხილი, რომ ქალთა გუნდის მსოფლიო ჩემპიონატში გამარჯვება გადაფარა სრულიად “არასპორტულმა ამბავმა”.
ჯენი ერმოსო აცხადებს, რომ თავი იგრძნო დაუცველად, რადგან გახდა იმპულსური, სექსისტური და უადგილო ქმედების მსხვერპლი. “არავინ არ უნდა იგრძნოს თავი უპატივცემულოდ, ხოლო თანხმობის გარეშე ნებისმიერი განხორციელებული ქმედება არის შევიწროვება” – ამბობს ფეხბურთელი.
მიუხედავად იმისა, რომ რუბიალესს 90 დღით შეუჩერდა ფეხბურთთან დაკავშირებული ყველა აქტივობა, ესპანეთის ქალთა საფეხბურთო გუნდი უარს აცხადებს ჩაატაროს შემდეგი თამაშები მანამ, სანამ ფეხბურთის ფედერაციის ხელმძღვანელობა არ დატოვებს თანამდებობას.
