ფსიქოაქტიური ნივთიერებების (ნიკოტინი, ალკოჰოლი, ბენზოდიაზეპინის ჯგუფის მედიკამენტები, სხვა ნარკოტიკული საშუალებები) მოხმარების აშლილობის თერაპია და შემდგომი რეაბილიტაცია ხანგრძლივი პროცესია. ეს პერიოდი შესაძლოა მეტად რთული აღმოჩნდეს მშობლისთვის, რომელიც მართავს როგორც აღკვეთის სინდრომის სიმპტომებსა თუ თრიგერებს, ასევე ცდილობს ადაპტირდეს ყოველდღიურ ცხოვრებაში, დამატებით კი უწევს მასზე დამოკიდებული ბავშვის აღზრდა და მასზე ზრუნვა.
ფსიქოაქტიური ნივთიერებების მოხმარების აშლილობა კომპლექსური მოვლენაა, რომლის შედეგები ფიზიკურ და ამავდროულად, ფსიქო-სოციალურ დონეებზე ვლინდება. შეასაბამისად, მკურნალობაც კომპლექსურია და ხშირ შემთხვევაში საჭიროებს ამბულატორიულ და სტაციონარულ მკურნალობას, ასევე ფსიქოთერაპიას. სახლში დაბრუნების შემდეგ ჯანმრთელობის ხელშეწყობის და დამოკიდებულებისგან თავისუფალი მდგომარეობის შენარჩუნებისთვის სხვადასხვა საშუალებები არსებობს, მათ შორის კვების, ძლისი რეჟიმის შენარჩუნება-მოწესრიგება, გაცნობიერებული მედიტაცია, ფიზიკური აქტივობა და ა.შ. ასევე ცნობილია, რომ დამოკიდებულების დაძლევის პროცესში მყოფ დედებზე პოზიტიური გავლენა აქვს მხარდამჭერ ოჯახს და მათთან სრულფასოვან ურთიერთობას.
ბავშვები ასევე დიდ მოტივატორს წარმოადგენენ დამოკიდებულების მქონე დედებისთვის. ბევრი ქალი ასახელებს მათ შვილს/შვილებს, როგორც მთავარ მოტივატორს დამოკიდებულების დაძლევის გადაწყვეტილების მიღებისა და გამოჯანმრთელების პროცესშიც. ბევრი ქალი მიიჩნევს, რომ შვილების აქტიური ჩართულობა მკურნალობის პროცესში დადებითად აისახება მათ რეაბილიტაციაზე. ბავშვებს შეუძლიათ დააკვირდნენ და დაინახონ/შეაფასონ დედის ცვლილება უკეთესობისკენ – ეს კი ნამდვილად პოზიტიურად აისახება როგორც მშობლის, ისე ბავშვის ფსიქო-ემოციურ მდგომარეობასა და განვითარებაზე.
დროის გარკვეულ მონაკვეთში შვილთან ერთად ყოფნა, თამაში, კითხვა, სეირნობა და ზოგადად, ინტერაქცია ეხმარება დედას იყოს ფოკუსირებული კონკრეტულ ქმედებზე და ნაკლებად იფიქროს ტრიგერებზე თუ სხვა სტრესულ მოვლენებზე, რაც თან ახლავს რეაბილიტაციის პროცესს.
სტაბილურობის განცდა და რუტინა მნიშვნელოვანია როგორც ბავშვისთვის, ასევე ადიქციის დაძლევის პროცესში მყოფი დედისთვის. დედები აღზრდის პროცესში ბავშვთან აქტიური ინტერაქციისას და ზოგადად, აღზრდის პროცესში გამოიმუშავებენ გარკვეულ უნარებს, მაგალითად ემოციების რეგულაციის, მოსმენის, კომუნიკაციის უნარებს, რაც თავისთავად ეხმარება ქალებს ფსიქოაქტიური ნივთიერებისგან გამოჯანმრთელებისა და რეაბილიტაციის პროცესში. შვილთან აქტიური ურთიერთობა ამცირებს რელაფსის (ჩავარდნის) რისკებსაც.
წყარო: Villegas A.N. et al. (2016). Mothers in Substance Abuse Recovery: Perspectives on Motivators, Challenges and Family Involvement. National Library of Medicine.
