WECF საქართველოს მედია დაჯილდოების – #მედიათანასწორობისთვის 2021 წლის გამარჯვებულები გამოვლინდნენ.
2021 წლის გამორჩეული ნამუშევრები 4 კატეგორიაში გამოვლინდა: საუკეთესო რეგიონული მედიაპროდუქტი, საუკეთესო კონტენტი სოციალურ მედიაში, საუკეთესო ვიზუალური პროდუქტი და საუკეთესო ეროვნული მედიაპროდუქტი.
კონკურსის ჟიურის წევრები იყვნენ: ჟურნალისტი – ნინია კაკაბაძე, ჟურნალისტთა ეთიკის საბჭოს თავმჯდომარე და რადიო „მარნეულის“ დამფუძნებელი – კამილა მამედოვა, ფოტოგრაფი – ანა გოგუაძე, ქვიარ აქტივისტი და გენდერის ექსპერტი – ლევან ბერიანიძე, ჟურნალისტი – ნათია კუპრაშვილი, გენდერისა და მედიის ექსპერტი – მაიკო ჩიტაია, ერთი ხმა კი WECF-ის გუნდის წევრებს ჰქონდათ.
კატეგორიაში საუკეთესო რეგიონული მედიაპროდუქტი, ნომინანტები იყვნენ:
- ლელა დუმბაძე – გაზეთი „ბათუმელები“
- მარიამ ტაკიძე – „აჭარის ტელევიზია“, გადაცემა „ჰეშთეგი“
- მარიტა ტყეშელაშვილი – რადიო „ძველი ქალაქი“
საუკეთესო რეგიონული მედიაპროდუქტისთვის ჯილდო „აჭარის ტელევიზიის“ გადაცემას – „ჰეშთეგი“ გადაეცა.
კატეგორიაში საუკეთესო კონტენტი სოციალურ მედიაში, ნომინანტები იყვნენ:
- ესმა გუმბერიძე – პლატფორმა „ფემინსტრიმი“
- ქეთევან ვაშაგაშვილი – „CHAI KHANA“
- ლაშა ცერცვაძე – კონტენტის შემქმნელი
- ონლაინ გამოცემა „Queer.ge“
- მულტიმედიური პლატფორმა „GRLZWAVE“
კატეგორიის გამარჯვებული კონტენტის შემქმნელი, ლაშა ცერცვაძე გახდა.
საუკეთესო ვიზუალური პროდუქტისთვის ნომინირებულები იყვნენ:
- დინა ოგანოვა – დოკუმენტალისტი, ფოტოგრაფი
- თაკო რობაქიძე – ფოტოგრაფი, Chai Khana
- თინა წოწოლაშვილი-ჩერტოვა – მხატვარი
აღნიშნულ კატეგორიაში გამარჯვება დინა ოგანოვამ მოიპოვა.
საუკეთესო ეროვნული მედიაპროდუქტის კატეგორიაში კი სამი ნომინანტი იყო:
- ეკა ქევანიშვილი – „რადიო თავისუფლება“
- ხატია ღოღობერიძე – „On.ge“
- თამთა კახაბერიძე – „On.ge“
საუკეთესო ეროვნული მედიაპროდუქტისთვის ჯილდო თამთა კახაბერიძეს გადაეცა.
WECF-ის წარმომადგენელის, იდა ბახტურიძის თქმით, აღნიშნული დაჯილდოების მიზანი თანასწორი მედიის წახალისებაა.
„შემთხვევითი არ არის, რომ დაჯილდოება – მედია თანასწორობისთვის, ძალადობის წინააღმდეგ მიმართული 16-დღიანი კამპანიის ფარგლებში იმართება. ჩვენ ამ დაჯილდოებით ვეცდებით, თანასწორი მედია წავახალისოთ. ჯერ კიდევ მრავალ პრობლემას ვაწყდებით გენდერულად სენსიტიური თემების გაშუქებისას, ხშირია არაეთიკური მიდგომები და იმედი გვაქვს, ეს დაჯილდოება სასიკეთო ცვლილებებს შეუწყობს ხელს“, – აღნიშნა იდა ბახტურიძემ.
მედია დაჯილდოება კონფერენციით გაიხსნა, რომელსაც ონლაინ და სატელევიზიო მედიის წარმომადგენლები ესწრებოდნენ. მედია პროფესიონალებმა თანასწორობის განმტკიცებაში გენდერულად მგრძნობიარე და ეთიკური მედიის როლი განიხილეს და იმსჯელეს იმ გზებზე, რომლითაც ქალის როლის პოზიტიურად წარმოჩენას უნდა შეეწყოს ხელი. მედია დაჯილდოების გამარჯვებულებს სპეციალური ჯილდო და ფულადი პრიზი, 1 500 ევრო გადაეცათ.
