სანამ სხვადასხვა ქვეყანა ლგბტ უფლებებზე დაიწყებდა საუბარს, ლგბტ უფლებებისთვის ბრძოლა იატაკქვეშეთში მიმდინარეობდა. არტისტები ქმნიდნენ ნამუშევრებს, ეხმიანებოდნენ სხვადასხვა აქტუალურ საკითხს და ცდილობდნენ, ამ გზით მაინც გაერღვიათ სიძულვილისა და შიშის დიდი ბარიერი.
გთავაზობთ 16 სიმღერას, რომელმაც დიდი გადატრიალება მოახდინა ქვიარ ადამიანების ცხოვრებაში და სამუდამო ადგილი დაიკავა pride ფესტივალების ფლეილისთებში:
Donna Summer – I Feel Love
დონა სამერის 1977 წლის სინგლი ერთ-ერთი პირველი ჰიტია, რომელმაც განსხვავებული ჟღერადობა შეჰმატა 70-იანი წლების ამერიკულ და არამარტო ამერიკულ გეი ბარებს და მალევე შეიყვარეს ლგბტ+ თემის წევრებმა. ცნობილ სიმღერაზე იტალიელმა კომპოზიტორმა, ჯორჯო მოროდერმა იმუშავა.
Sylvester – You Make Me Feel (Mighty Real)
ლეგენდარული ამერიკელი შემსრულებელი Sylvester, რომელიც „დისკოს დედოფლადაც“ არის ცნობილი, 1988 წელს, 41 წლის ასაკში, შიდსით გარდაიცვალა, თუმცა დაგვიტოვა არაერთი სიმღერა, რომელიც დღემდე პოპულარულია ქვიარ კულტურაში.
Diana Ross – I’m Coming Out
ლეგენდარულმა ამერიკელმა ვარსკვლავმა, დაიანა როსმა, I’m Coming Out თავის ლგბტქ+ მსმენელებს მიუძღვნა და ძალიან დიდი ხანი დასჭირდა იმისთვის, რომ თავისი პროდიუსერები ამაზე დაეთანხებინა. მომღერალს აფრთხილებდნენ, რომ სიმღერა მის კარიერას დაანგრევდა და ადამიანები იფიქრებდნენ, რომ ის ლესბოსელია, თუმცა მომღერალმა მაინც ჩაწერა სიმღერა და დაუვიწყარი ჰანგები აჩუქა მსმენელს.
Elton John – Elton’s Song
ელტონ ჯონის ეს ცნობილი ჰიტი მომღერლის შემოქმედების მწვერვალადაც შეგვიძლია მივიჩნიოთ. ცნობილია, რომ სიმღერა იმ პერიოდში დაიწერა, როცა მომღერალს ყველაზე რთული პერიოდი ედგა. სწორედ ამიტომ, გადაწყვიტა, ჩაეწერა სიმღერა, რომელიც გაათავისუფლებდა მას წარსულის აჩრდილებისგან.
Madonna – Vogue
ცნობილია, რომ მადონას ამ სიმღერის შესაქმნელად სულ რაღაც 5.000 ამერიკული დოლარი ჰქონდა და საერთოდ არ ელოდა მის ამხელა წარმატებას. თუმცა სიმღერამ მალევე მოიპოვა წარმატება და დღესდღეობით სიმღერა მსოფლიოს თითქმის ყველა Pride-ზე ისმის.
George Michael – Freedom
ჯორჯ მაიკლის ეს ცნობილი სიმღერა მომღერლის ქამინგაუთამდე 8 წლით ადრე ჩაიწერა და ნამდვილ ჰიტად იქცა. სიმღერა მალევე აიტაცეს მთელს მსოფლიოში და ჯორჯ მაიკლი საბოლოოდ იქცა ნამდვილ სექს სიმბოლოდ, რომელიც მსოფლიოს თავის დაუვიწყარ მუსიკას ჩუქნიდა.
Melissa Etheridge – Come to My Window
მელისამ ეს ცნობილი სიმღერა ერთ-ერთ ტურნეში დაწერა, მომღერალი თავს მარტოსულად გრძნობდა და გადაწყვიტა, ახალი სიმღერა დაეწერა. სიმღერას მალევე მოჰყვა ალბომი Yes I Am, საჯარო ქამინგაუთი და დღესდღეობით სიმღერა, რომელშიც მომღერალი ამბობს: არ მაინტერესებს, რას ფიქრობენ ისინი, რას ამბობენ ისინი, რა იციან მათ ამ სიყვარულზე“ ნამდვილად არის გეი ჰიმნი!
Peaches – Fuck the Pain Away
კანადელი შემსრულებელი Peaches მასწავლებელი იყო, სანამ რეპერობას გადაწყვეტდა და ჩაწერდა ცნობილ სინგლს Fuck the Pain Away. ერთ-ერთ ინტერვიუში ლეგენდარულმა მადონამ თქვა, რომ ის ყოველ დილით, ვარჯიშის პარალელურად უსმენს Fuck the Pain Away-ის.
Hedwig and the Angry Inch – Wig in a Box
ბროდვეის შოუსთვის დაწერილი სიმღერა „Wig in a Box“ კიდევ ერთი საყვარელი სიმღერაა ქვიარ საზოგადოებისთვის, რომელიც კომპოზიტორ სტივენ ტრასკს ეკუთვნის. ბროდვეის შოუს პრემიერა 1994 წელს შედგა, როგორც არტისტი იხსენებს, პრემიერა ნათლობას ჰგავდა და მას საბოლოოდ მიეცა საკუთარი თავის გამოხატვის საშუალება.
Limp Wrist – I Love Hardcore Boys/I Love Boys Hardcore
ამერიკული ბენდი Limp Wrist 90-იანი წლებიდან ამაგრებდა ქვიარ სცენას, თუმცა ამის მიუხედავად, მისი სოლისტი მარტინ სორონდეგაი ორიათასიანებში დაქამინგაუთდა და მოჰყვა, რომ 90-იანი წლებში ის არ გრძნობდა თავს უსაფრთხოდ და ყოველთვის ნერვიულობდა იმ არტისტებზე, რომლებიც არ უშინდებოდნენ საზოგადოებას და საჯაროდ საუბრობდნენ თავიანთ იდენტობასა თუ სექსუალობაზე.
Scissor Sisters – Take Your Mama
Scissor Sisters ლეგენდარული ამერიკული ბენდია, რომელმაც Take Your Mama ქამინგაუთის თემას მიუძღვნეს და მსმენელებს ორიგინალური გზა შესთავაზეს მშობლებთან ქამინგაუთის გასაკეთებლად. ბენდის პოპულარობა სინგლის გამოსვლის შემდეგ მალევე გაიზარდა, ლეგენდარულმა არტისტმა ბონომ ის საუკეთესო პოპ ჯგუფად დაასახელა, ელტონ ჯონმა კი Scissor Sisters-თან ერთად ჩაწერა ცნობილი ჰიტი I Don’t feel like Dancin
Hercules and Love Affair – Blind
2008 წლის ცნობილი სინგლი Blind DJ ენდი ბატლერისა და ტრანსგენდერი არტისტის, Anohni კოლაბორაციაა. სიმღერა მალევე გაჟღერდა რადიო სადგურებში და გეი ბარებში მთელს მსოფლიოში. როგორც სიმღერის ტექსტის ავტორი ჰყვება, სიმღერა ქვიარ ადამიანების იმედგაცრუებასა და იმ ილუზიებზეა, თითქოს გავიზრდებით, ოჯახებს გავექცევით და ვიპოვით ბედნიერებას, თუმცა ჩაგვრისგან და რეპრესიისგან გაქცევა არც ისეთი მარტივია.
Robyn – Dancing on My Own
რობინის სიმღერა Dancing on My Own, რომელიც გასული ათწლეულის ნამდვილი ჰიტია, Lena Dunham-ს ეკუთვნის და მისი ჟღერადობა გულგრილს არავის ტოვებს. სიმღერა მარტოსულ, მიტოვებულ ქალზეა, რომელიც გადაწყვეტს, რომ არ დატოვოს დენსფლორი, არ წავიდეს სახლში და გააგრძელოს ცეკვა მარტომ.
Lady Gaga – Born This Way
ლეიდი გაგას 2011 წლის სინგლი და ალბომი Born This Way ნამდვილად რევოლუციური იყო პოპის ისტორიაში. არტისტმა Rolling Stone-თან თქვა, რომ ეს სამი სიტყვა ძალიან შემთხვევით დაიბადა მის თავში და უცებ გაიაზრა, ეს ჯადოსნური სიტყვები პასუხი იყო ყველა იმ კითხვაზე, რაც წლების განმავლობაში არ ტოვებდა მას, ვინ ვართ ჩვენ, რატომ ვართ ასეთები.
Perfume Genius – Queen
მაიკლ ჰადრისი, იგივე Perfume Genius, კიდევ ერთი ქვიარ არტისტია, რომლის სინგლიც Queen ნამდვილად გარდამტეხი იყო მის შემოქმედებაში. The Guardians-ისთვის მიცემულ ინტერვიუში არტისტი ამბობს, რომ ამ კლიპით მას სურდა, ცხოვრებაში ერთხელ მაინც სხვისთვის ისეთივე დისკომფორტი შეექმნა, როგორც ამას სხვები აკეთებდნენ მთელი ცხოვრება მის მიმართ. კლიპი, რომელიც სავსეა სიმბოლოებით, მართლაც ძალიან ზუსტად ასახავს იმ გარემოს, სადაც ქვიარ ადამიანებს უწევთ ცხოვრება.
Sia – Alive
2013 წელს ამერიკელმა არტისტმა Twitter-ზე დაწერა, რომ ის ქვიარია, რამაც წერტილი დაუსვა მრავალ ჭორს, რომელიც მომღერლის პირადი ცხოვრების გარშემო არსებობდა. ამ ქამინგაუთის შემდეგ გამოჩნდა სიმღერა Alive, რომელზეც არტისტმა ბრიტანელ შემსრულებელთან, Adele-თან ერთად იმუშავა. სიმღერაში კარგად ჩანს Sia-ს ვოკალი და მთავარი მესიჯი, რომ ყველაფრის მიუხედავად, ჩვენ კვლავ ცოცხლები ვართ.
