მუსიკა ბევრი ადამიანის ყოველდღიური ცხოვრების განუყოფელი ნაწილია. ადამიანები იყენებენ მუსიკას, როგორც გართობის, რელაქსაციის, ყურადღების გადატანის საშუალებას, ასევე საკუთარი ცხოვრების ხარისხის გაუმჯობესებისთვის. გარდა ამისა, ბევრი იყენებს მუსიკას საკუთარი მიზნების მიღწევის და ყოველიური საქმეების შესრულების მოტივაციის ამაღლებისთვისაც.
მუსიკას ნამდვილად აქვს შესაძლებლობა მსმენელში სხვადასხვა ემოციური მდგომარეობები გამოიწვიოს, შემატოს ენერგია, გააბედნიეროს ან პირიქით დაასევდიანოს ის. მუსიკა შეიძლება იყოს თერაპიულიც. მუსიკალური თერაპია აძლიერებს ძირითადი მკურნალობის ეფექტს და აუმჯობესებს თერაპიულ შედეგებს.
მუსიკალური თერაპიის უპირატესობას წარმოადგენს ის, რომ მისი გამოყენება შესაძლებელია პრაქტიკულად ნებისმიერი თერაპიისას – იქნება ეს სტაციონარული, ამბულატორიული თუ ჯგუფური თერაპია. მისუკალური თერაპიის გამოყენება შესაძლებელია ნივთიერებების მოხმარების აშლილობისას (substance use disorders). შედეგად პაციენტებს უმსუბუქდებათ სტრესი, ისინი მეტად კონცენტრირდებიან გამოჯანმრთელებაზე, უფრო ადვილად აღწევენ თერაპიულ მიზნებს. ამასთან არ არის აუცილებელი გაიარაო მუსიკალური თერაპიის სპეციალურად შედგენილი პროგრამა იმისთვის რომ მუსიკის მოსმენისგან სარგებელი მიიღო, საკმარისია ისეთი მუსიკის შერჩევა, რომელიც ხელს უწყობს კარგ გუნებაგანწყობილებას, თუ რელაქსაციას.
მუსიკალური თერაპიის მიზნები შესაძლოა მოიცავდნენ:
- პაციენტის ემოციური ადაპტაციის გაძლიერებას;
- სტრესის შემცირების საშუალებით ფიზიკური და ფსიქოლოგიური ჯანმრთელობის გაუმჯობესებას;
- ისეთი უნარების გაუმჯობესებას, როგორიცაა საკომუნიკაციო უნარები, ყურადღება, მეხსიერება;
- მსგავსი მუსიკალური ინტერესების მქონე ადამიანებთან კომუნიკაციაში ჩართულობის ხელსწყობას;
ნივთიერებათა მოხმარების აშლილობისას მუსიკალურ თერაპიის მეშვეობით შესაძლებელია:
- ნარკოტიკული საშუალებების მიმართ ლტოლვის შემცირება, ტრიგერებთან გამკლავება;
- ნეგატიური ემოციების – დანაშაულის განცდის, სირცხვილის, დეპრესიის, შფოთვის, ბრაზის მეტად ადვილად დაძლევა;
- სტრესული სიტუაციების, სირთულეების დაძლევის პოზიტიური სტრატეგიების დასწავლა;
- შინაგანი განცდების გამოხატვა;
- კარგი განწყობის, თავდაჯერებულობის შენარჩუნება.
გამოყენებული ლიტერატურა: Music Therapy & Substance Abuse Treatment, American Addiction Center
