რუსეთის ხელისუფლების მიერ მომზადებული სარჩელი რუსული ლგბტქი ორგანიზაციის ბედს ეჭვქვეშ აყენებს, რადგან, ადვოკატების აზრით, აღნიშნული მცდელობა მხოლოდ „პირველი ნაბიჯია“.
რუსეთის ხელისუფლებამ ქვეყნის ყველაზე დიდი და გავლენიანი ლგბტქი უფლებებისთვის მებრძოლი ორგანიზაციის შეჩერება წარუმატებლად სცადა, მაგრამ უფლებადამცველთა აზრით, ხელისუფლება მცდელობას არ შეწყვეტს.
პეტერბურგის სასამართლომ რუსეთის იუსტიციის სამინისტროს მიერ მომზადებული სარჩელის განხილვაზე უარი თქვა. სარჩელი რუსულ ლგბტქი ორგანიზაციას ქვიარ მოსაზრებების გავრცელებაში სდებდა ბრალს, რომლებიც „ტრადიციულ ღირებულებებს“ ეწინააღმდეგება. სარჩელში აღნიშნული იყო, რომ იმ გაერთიანების „ლიკვიდაცია“ სურდათ, რომელიც ლგბტქი ორგანიზაციის მართავს.
ტანია ლოკშინამ, Human Rights Watch-ის ევროპისა და ცენტრალური აზიის განყოფილების ხელმძღვანელმა, აღნიშნა, რომ რუსეთის მხრიდან საქმის ხელახალი განხილვის მოთხოვნაა მოსალოდნელი.
„ახლო მომავლის პერსპექტივაში ეს სიახლე კარგია. მათი პირველი ნაბიჯი კრახით დასრულდა, მაგრამ არ ვფიქრობ, რომ შეჩერდებიან. აღნიშნული შემთხვევა რუსეთში მიმდინარე პროცესებს ასახავს, რაც დამოუკიდებელი, თავისუფალი ხმის ჩახშობის მცდელობებს გულისხმობს.” – აღნიშნა ლოკშინამ სასამართლოს გადაწყვეტილებასთან დაკავშირებით.
ლოკშინას თქმით, ჟურნალისტები და ლგბტქი აქტივისტები რუსეთის ხელისუფლების მთავარი სამიზნე არიან, რომელთაც რუსული საზოგადოების დასუსტებისა და დესტაბილიზაციის მიზნით გარედან მოსულ „უცხოპლანეტელებად“ აღიქვამენ. ლოკშინამ ასევე აღნიშნა, რომ რუსული ლგბტქი ქსელი და მისი მმართველი ჯგუფი – Sphere Foundation, რუსეთში უცხო ქვეყნის ჯაშუშებად არიან შერაცხული.
„თუ გეი ხარ და მალავ, ხმას არ იღებ… მისაღებია, მაგრამ თუ საუბარს გადაწყვეტ… ეს სერიოზულ პრობლემად იქცევა. რუსეთის ხელისუფლება ტოლერანტული დადუმებული გეი ადამიანების მიმართაა.” – აღნიშნა ლოკშინამ.
რუსული ლგბტქი ქსელი ქვეყნის ანტი-ლგბტქი ქმედებებისა და კანონმდებლობის წინააღმდეგ მოქმედი წამყვანი ორგანიზაციაა, რომელიც ისეთ ქმედებებს აპროტესტებდა, როგორიც, მაგალითად, ანტი-გეი დანაშაულებია ჩეჩნეთში.
„რუსეთის ხელისუფლების ხედვით, ჩვენი ქმედებები ტრადიციული ღირებულებების იდეას ეწინააღმდეგება, მაგრამ მიუხედავად პოლიტიკური კლიმატისა, ლგბტქი ადამიანები არსებობენ. დანებებას არ ვაპირებთ, ხელისუფლება ვერ შეგვაჩერებს. არ ვეთანხმებით ხელისუფლების მტკიცებას, რომ ლგბტქი ადამიანების დახმარების მცდელობა, “ქველმოქმედების” ჩარჩოს სცდება. ლგბტქი ადამიანები ამ ქვეყნის ისეთივე მოქალაქეები არიან, როგორც ყველა დანარჩენი და თანასწორ უფლებებსა და თავისუფლებებს იმსახურებენ.” – აღნიშნა დილია გაფუროვამ, Sphere Foundation-ის სპიკერმა.
გაფუროვას თქმით, ხელისუფლების ბოლო მცდელობა უფრო მეტად ჰგავს ლგბტქი აქტივიზმის ტაბუდ გამოცხადების სურვილს.
წყარო: NBC News
