,,ტრანსგენდერი” ქოლგა ტერმინია, რომელიც ბინარულ და არაბინარულ გენდერულ იდენტობებს მოიცავს. ვრცელი სპექტრი აერთიანებს იმ ადამიანთა გამოცდილებას, რომელთა გენდერული იდენტობა ან გენდერული თვითგამოხატვა დაბადებისას მათთვის მინიჭებულ სქესს არ შეესაბამება.
ბინარული გენდერული იდენტობა უმრავლესობისთვის ბევრად მარტივად აღსაქმელია, რადგან ის აერთიანებს ადამიანებს, რომლებიც ტრანზიციას დაბადებისას მათთვის მინიჭებული სქესის საპირისპიროდ გადიან.
არაბინარულ იდენტობებზე საუბრისას კი ბევრი იბნევა, რადგან ის ბევრად მრავლისმომცველი, გნებავთ, კომპლექსურია და მრავალ სხვადასხვა გამოცდილებას უყრის თავს. თუმცა, თუ ადამიანი სხვათა ინდივიდუალური თვითშემეცნების გზაზე გაკეთებულ აღმოჩენებს პატივს სცემს, ყველაფერი გაცილებით მარტივდება. მთავარია, კითხვების დასმას არ შეუშინდე – ეს საშუალებას მოგცემს, დიალოგი ისე წარმართო, რომ სხვისი გრძნობები არ შელახო.
2015 წელს ჩატარებული კვლევის თანახმად, არაბინარული იდენტობის მქონე რესპონდენტთა 86% საუბრისას სხვების მიერ არასწორი ნაცვალსახელის გამოყენებაზე ყურადღებას არ ამახვილებს, რადგან თვლიან, რომ ,,უმეტესობას პრობლემის სიმწვავე არ ესმის და ახსნასაც აზრი არ აქვს”.
ქართულ ენაში გენდერულად ნეიტრალური პირის ნაცვალსახელები გამოიყენება, მაგრამ საუბრისას არ უნდა დაივიწყო, რომ, როცა ადამიანის გენდერული იდენტობის შესახებ არ იცი, ნეიტრალური სიტყვების გამოყენება სჯობს. ნუ გამოიყენებ ბინარულ გენდერთან ასოცირებულ ტერმინებს, როგორიცაა ბიჭი, გოგო, ცოლი, ქმარი და მრავალი სხვა სიტყვა.
ისიც უნდა გესმოდეს, რომ საუბრისას შეცდომების დაშვებაში უჩვეულო არაფერია, უბრალოდ, ადამიანს უნდა აუხსნა, რომ უზუსტობა წინასწარგანზრახული არ ყოფილა. მეტიც, შესაძლოა, აქამდე შენთვის უჩვეულო დიალოგის წამოწყებისას დაშვებულ შეცდომებზე ბევრი რამ ისწავლო და ყოველი ახალი ნაცნობობისას უფრო ფრთხილი კი არა, ბევრად თავისუფალი გახდე.
გენდერულ იდენტობათა ჩამონათვალი 70-ს აჭარბებს, თვითგამოხატვის ფორმები კი, ინდივიდუალური გამოცდილებების, სურვილების მსგავსად, კიდევ უფრო მრავალრიცხოვანია. ჩვენ აღმოჩენების დაუსრულებელ გზაზე სხვა ადამიანების უკეთ გაგებას ვსწავლობთ და ამ პროცესში საკუთარ თავზეც ბევრს ვიგებთ. მთავარი გამბედაობა, სიახლეებისთვის მზად ყოფნა და თითოეული ადამიანის მიმართ პატივისცემაა.
ავტორი: გიორგი ბახსაჯაური
ილუსტრაციები:
