J&B Whiskey

ვისკის რეკლამა, რომელიც ტრანსგენდერი ქალის შესახებ გვიყვება

ახალი არაა, რომ ქვიარ თემით, თემის სიმბოლიკითა და რიგ შემთხვევაში, უკვე არსებულ პროდუქტზე უბრალოდ ცისარტყელის ფერებიანი სტიკერის მიტყეპებით, არაერთი კომპანია ახდენს კომერციალიზაციას. ქვიარ თემით კაპიტალიზაცია განსაკუთრებით პრაიდის თვესა და საყოველთაო დღესასწაულებზე იმატებს.

ვისკის რეკლამა, რომელიც ტრანსგენდერი ქალის შესახებ გვიყვება

ახალი არაა, რომ ქვიარ თემით, თემის სიმბოლიკითა და რიგ შემთხვევაში, უკვე არსებულ პროდუქტზე უბრალოდ ცისარტყელის ფერებიანი სტიკერის მიტყეპებით, არაერთი კომპანია ახდენს კომერციალიზაციას. ქვიარ თემით კაპიტალიზაცია განსაკუთრებით პრაიდის თვესა და საყოველთაო დღესასწაულებზე იმატებს. სწორედ მსგავსი შემთხვევებია ტერმინის “ცისარტყელა კაპიტალიზმი” (იგივე ვარდისფერი კაპიტალიზმის ან გეი/ჰომო კაპიტალიზმი) დეფინიცია — კაპიტალიზმისა და კონსუმერიზმის ჩართულობა ლგბტქი+ მოძრაობებში, როცა კორპორაციები და კომპანიები, პროგრესულობის სახელით, მოგებას მოწყვლადი ჯგუფების, ამ შემთხვევაში კი ლგბტქი+ ადამიანების, გამოყენების ხარჯზე ზრდიან.

ცხადია, ყველა ზემოთ ჩამოთვლილი ქმედება დამაზიანებელი და დამღლელია ქვიარ თემისთვის, თუმცა, ზოგ შემთხვევაში, კომპანიები მხოლოდ მოგებაზე არ ორიენტირდებიან და არც მათ მიერ დაკვეთილი რეკლამის ან/და კამპანიის უკან იმალება ასეთი ზრახვები. მსგავს რეკლამათა შორის არაერთს ჰქონია საზოგადოების ცნობიერებასა და მიმღებლობის ზრდაზე დადებითი გავლენა. წელს ქვიარ ინკლუზიურ კამპანიებს შორის ესპანური კომპანიის, J&B Whiskey-ის რეკლამა აღმოჩნდა, რომელიც ზეიმობს და მხარს უჭერს ტრანს თემის წევრებს.

გარდა სწორი მესიჯისა, რომელსაც რეკლამა სადღესასწაულოდ უზიარებს ადამიანებს, ის პოლიტიკურად აქტუალურია და სწორ დროსაა შექმნილი. რეკლამაზე მუშაობის პერიოდიდან დღემდე, ქვეყანაში კენჭი ეყრება კანონპროექტს, რომელიც ესპანელი ტრანსგენდერი ადამიანებისთვის გენდერის აღიარების პროცესებს ამარტივებს. აღსანიშნავია, რომ გენდერის ლეგალური ცვლილების თაობაზე კანონი უკვე მიიღეს შოტლანდიაში.

J&B-ის ოფიციალურ საიტზე კამპანიასთან დაკავშირებულ ანოტაციაში ვკითხულობთ, რომ აღნიშნული კამპანია ერთჯერადი არაა და მოგების ზრდას არ ემსახურება. რეკლამა მხოლოდ მცირე ნაწილია იმ სამუშაოსი, რომელსაც კომპანიაში ყოველწლიურად ეწევიან ქვიარ თემის მიმღებლობის გასაზრდელად.

რეკლამა სახელწოდებით She, რაც ინგლისურ ენაში მდედრობით ნაცვალსახელს აღნიშნავს, ვირუსული თავისი გულისამაჩუყებელი თხრობის ხაზით გახდა. რეკლამის სლოგანია “ჯადოსნობა მხოლოდ შობისას არ არის. ის ჩვენშიცაა”.

მოქმედება ესპანური სოფლის სივრცეში იხსნება, რომელშიც ბაბუა ცოლის მაკიაჟის ჩანთიდან ჩუმად იპარავს პომადას, ხოლო თვალის ჩრდილების პალიტრას ადგილობრივ მაღაზიაში მალვით ყიდულობს. მაკიაჟის კეთების შესწავლის მცდელობების შედეგად, ვხედავთ, რომ ბაბუა ნელ-ნელა მიზანს აღწევს და დაოსტატდება. სადღესასწაულოდ, ბებიასა და ბაბუასთან ოჯახის სხვა წევრები ჩამოდიან. მათ შორისაა 26 წლის ალვარო. მოგვიანებით, ბაბუა და ალვარო აბაზანაში შედიან, სადაც ბაბუა თავის ახალშესწავლილ მაკიაჟის უნარებს შვილიშვილზე გადაიტანს, მას წითელ პომადასა და ფრთიან ლაინერს წაუსვამს. ამის შემდეგ, ისინი საშობაო სადილს უერთდებიან და ალვარო უკვე ანად გვეცნობა  ტრანსგენდერი ქალად, რომელსაც ოჯახთან ქამინგაუთი აქვს. თვალცრემლიანი ოჯახის წევრები ანას იღებენ და გულში იკრავენ, ბოლოს კი J&B-ის ვისკით სადღეგრძელოს სვამენ.

ვერ ვიტყვით, რომ რეკლამა სტერეოტიპებისგან დაცლილია. მაგალითად, სცენები, რომლებშიც ტრანსგენდერ ქალს, ანას მაკიაჟს ბაბუა უკეთებს. ცხადია, სტერეოტიპული და დრომოჭმულია მოსაზრება, რომლის მიხედვითაც, ტრანსგენდერ ქალებს მაკიაჟის წასმა და ტრადიციული გენდერული ექსპრესია სჭირდებათ იმისთვის, რომ თავი ქალებად იგრძნონ. მიუხედავად ამისა, მომღერლის, Elvis Costello სიმღერის, She მუსიკის ფონზე ნაჩვენები კადრები ბევრისთვის აღმოჩნდა გულისამაჩუყებელი და საყვარელი: მიმდინარე მონაცემებით, ვიდეოს YouTube-ზე 2.6 მილიონი ნახვა აქვს.

აღსანიშნავია, რომ ტრანს მსახიობმა, Ella Di Amore, რომელიც რეკლამაში ანას როლს ასრულებს, განაცხადა, რომ იმედოვნებს, საკუთარი ტრანზიციის პერიოდში, აღნიშნული რეკლამის მეშვეობით, ლგბტქი+ ადამიანთა უფლებებსა და ხილვადობას დაეხმარება. მისი თქმით, ყოველდღიურობაში ყველაფერს აკეთებს, რომ ქვიარ თემის უფლებები დაიცვას და იცის, რომ ანას პერსონაჟის მეშვეობით, ბევრ ადამიანს დაეხმარება, რადგან რეკლამაში მოყოლილი რეალობა საკმაოდ გავრცელებულია.

მსახიობი და პოლიტიკოსი, Carla Antonelli, რომელიც ესპანეთის კონგრესის პირველი ტრანს წევრი გახდა, რეკლამის შესახებ აცხადებს, რომ საუკეთესო კამპანიაა სიყვარულით, ემპათიითა და პატივისცემით ტრანს თემის მიმართ, ხოლო J&B-ის მშობელი კომპანიის, Diageo მარკეტინგის დირექტორმა, Ursula Meija-Melgar-მა რეკლამას მისი კარიერის ერთ-ერთი ყველაზე ლამაზი პროექტი უწოდა. მისი თქმით, გლობალურმა სარეკლამო ბაზარმა 593 მილიარდ დოლარს მიაღწია, რაც ნიშნავს, რომ სარეკლამო ბაზრის ძალა სოციალურ ნარატივს ცვლის, აძლევს ხმასა და ხილვადობას სხვადასხვა საკითხს, შესაბამისად, მათ, მარკეტერებს, უდიდესი პასუხისმგებლობა აკისრიათ.