მოგზაურობის და ახალი ქალაქების დათვალიერების ერთ-ერთი ყველაზე სასიამოვნო ნაწილი მუზეუმებისა და კულტურული ადგილების დათვალიერებაა. მართალია, ლგბტქი არტისტების ნამუშევრები მსოფლიოს მრავალ მუზეუმშია წარმოდგენილი, თუმცა, ამასთან ერთად, არსებობს ისეთი მუზეუმებიც, რომლებიც მთლიანად ლგბტ+ ისტორიისა
2013 წელს, ქალთა ეროვნული საკალათბურთო ასოციაციის ყოველწლიურ ღონისძიებაზე, რომელიც კოლეჯის წამყვანი მოთამაშეების თუ საერთაშორისო პროფესიონალებისთვის ყველაზე პრესტიჟული ლიგის კარს ხსნის, ბრიტნი გრაინერი ყველაზე დიდი პერსპექტივის მქონე კალათბურთელ ქალად დასახელდა. იმ წამს, გრაინერი მსოფლიოში ყველაზე წარმატებული ღიად ლესბოსელი კალათბურთელი გახდა. გრაინერს
აშშ-ის სახელმწიფო დეპარტამენტმა ადამიანის უფლებების დაცვის კუთხით 2021 წელს არსებული მდგომარეობის შესახებ ანგარიში გამოაქვეყნა. ანგარიშში კრიტიკულად არის შეფასებული საქართველოში უფლებადაცვითი, მედიის თავისუფლების, უფლებადამცველთა უსაფრთხოების
2012 წელს, აშშ-ის დემოკრატიული პარტიის წევრი, თემი ბოლდუინი პირველი ღიად ქვიარი და ვისკონსინის შტატში პირველი ქალი გახდა, რომელიც აშშ-ში სენატორად აირჩიეს. მან არჩევნებში რესპუბლიკელი
თუ ოდესმე ნიუ იორკის მეტროთი გიმგზავრიათ, ალბათ, გაიგებდით დამამშვიდებელ ხმას, რომელიც გაცნობებთ როდის მოვა შემდეგი მატარებელი. დიდია ალბათობა არ იცოდეთ ვის ეკუთვნის ეს ხმა. ის 66 წლის ტრანსგენდერი ქალი ბერნი ვაგენბლასტია.
„ვფიქრობ, ჩემი ისტორია ხალხს ბავრი რამის გააცნობიერებაში ეხმარება“,- ამბობს ბერნი AMNY-სთან ინტერვიუში.
მას შემდეგ, რაც იანვარში დაქამინგაუთდა ვაგენბლასტმა საჯაროდ მოჰყვა თავისი ცხოვრების ისტორია და მიიღო გადაწყვეტილება, საბოლოოდ იცხოვროს ისე, როგორც სურს.
ბერნმა, რომელიც ნიუ ჯერსიში დაიბადა და გაიზარდა, ადრეული ასაკიდანვე იცოდა, რომ სურდა გოგონა ყოფილიყო. სამწუხაროდ, ის პატარაობაში საზოგადოების მხრიდან არსებული ზეწოლის გამო ფიქრობდა, რომ ეს მიუღებელი იყო. ერთადერთი რაც თინეიჯერობისას შეძლო იყო ერთადერთ ტრანსგენდერ ქალთან დაკავშირება, რომლის შესახებაც იცოდა. ეს იყო პაულა გროსმანი, მუსიკის მასწავლებელი, რომელიც მერილ სტრიპს ასწავლიდა და 1971 წელს სამედიცინო ტრანზიციის გამო სამსახურიდან გაათავისუფლეს.
მხარდაჭერის ძიებაში, ბერნი პაულას ტელეფონით დაუკავშირდა. იმ მომენტში ის იყო ერთადერთი ადამიანი, რომელსაც ბერნი ენდობოდა.
„მე ძალიან დამეხმარა ისეთი ადამიანის ყოლა, რომელსაც ვენდობოდი. ვიღაც, ვისთანაც შემეძლო საუბარი და ვიცოდი რომ მას ესმოდა რასაც ვგრძნობდი“, – თქვა ვაგენბლასტმა პოდკასტში Death, Sex & Money აპრილში.
მომდევნო ათწლეულების განმავლობაში, ვაგენბლასტს უწევდა მამაკცის როლის შესრულება, რადგან თავს ვალდებულად თვლიდა ეს გაეკეთებინა. რადიოში მუშაობისას ის ახალი ამბების წამყვანი კაცი ჟურნალისტების ტონს ჰბაძავდა. თუმცა, დღეს მისი ხმა სულ სხვაგვარად ჟღერს, მას შემდეგ, რაც ვოკალურ თერაპევტთან იმუშავა საკუთარ ხმაზე.
„რადგან ჩემმა ხმამ ასეთი კრიტიკული როლი ითამაშა ჩემს ცხოვრებაში, მნიშვნელოვანია, რომ ჩემი ხმა, რაც შეიძლება ავთენტურად, ქალურად ჟღერდეს. ეს არ არის მნიშვნელოვანი ყველა ტრანსგენდერი ქალისთვის, მაგრამ იმის გამო, რომ ჩემმა ხმამ მნიშვნელოვანი როლი ითამაშა ჩემს ცხოვრებაში, ეს არის ის, რაც მნიშვნელოვანია პირადად ჩემთვის,“ – ამბობს ბერნი.
2017 წელს ახალი გამოსული იყო FaceApp, რომლის საშუალებითაც შეგიძლიათ შეცვალოთ თქვენი სახე, ვარცხნილობა და ა.შ. ბერნი ამბობს, რომ მას ეს აპლიკაცია დაეხმარა.
„მეგონა, რომ უბრალოდ მომეწონებოდა, გრძელი თმა, შესაძლოა პომადა ან რამე მსგავსი. მაგრამ პირველად დავინახე ჩემი თავი ქალად. ეს ის იყო რასაც ვგრძნობდი და თუ როგორ გამოვიყურებოდი ჩემს წარმოდგენაში. ხშირად უთქვამთ, რომ დედაჩემს უფრო ვგავარ, ვიდრე მამაჩემს, მაგრამ ვერასოდეს ვხვდებოდი რატომ. მე ეს პირველად FaceApp-ის გამოყენების დროს დავინახე. ეს ნათურის ანთებას ჰგავდა“, – ამბობს ბერნი.
ვფიქრობთ, ბერნის ისტორია ბევრ სხვა ტრანსგენდერ ადამიანთან ახლოს მივა, რადგან ისინიც იბრძვიან საკუთარი ხმების მოსაპოვებლად, რომ მსოფლიოს გააგონონ თუ ვინ არიან. ვიმედოვნებთ, რომ ბერნიც ბედნიერია იმის ცოდნით, რომ მისი ცხოვრება და მოღვაწეობა უამრავი ტრანსგენდერი ადამიანისთვის იმედის მომცემი იქნება და ზუსტად ისე შთააგონებს ახალ თაობას, როგორც თავად მიიღო ნუგეში და შთაგონება 50 წლის წინ.
აშშ-ის სახელმწიფო დეპარტამენტმა 2021 წელს ტერორიზმის მდგომარეობის შესახებ ქვეყნების ანგარიში გამოაქვეყნა. აღნიშნული მიმართულებით საქართველოში 2021 წლის მდგომარეობის მცირე ანგარიში მოიცავს 5-6 ივლისის ძალადობრივი მოვლენების აღწერასაც.
ანგარიშში ნათქვამია, რომ 5 ივლისს, ულტრა-მემარჯვენე ჯგუფებმა ჟურნალისტებსა და აქტივისტებზე იძალადეს და არასამთავრობო ორგანიზაციების ოფისები დაარბიეს, რაც პრემიერმინისტრის განცხადებას მოჰყვა, რა დროსაც ირაკლი ღარიბაშვილმა ღირსების მარშს „შეუფერებელი“ უწოდა
„[ძალადობრივი] მოვლენები მას შემდეგ განვითარდა, რაც პრემიერმინისტრმა თბილისი პრაიდის მიერ დაგეგმილ ღონისძიებას „შეუფერებელი“ უწოდა. დღის განმავლობაში, შსს-მ ვერ უზრუნველყო დემონსტრაციების კონტროლის მექანიზმების უზრუნველყოფა. 28 მოძალადის დაკავებისა და გამამტყუნებელი განაჩენის მიუხედავად, დაჯგუფებების ლიდერები და ძალადობრივი ქმედებების ორგანიზატორები არ დაუკავებიათ“, — წერია ანგარიშში და აღნიშნულია ისიც, რომ არათუ ძალადობრივი ჯგუფის ლიდერები არ დასჯილან, პოლიტიკური პარტიის დარეგისტრირებაც შეძლეს.
„ალტ-ინფოს ლიდერებმა პოლიტიკური პარტია, კონსერვატიული მოძრაობაც დაარეგისტრირეს და ოფისები მთელ საქართველოში გახსნეს. დაჯგუფების ლიდერები ავრცელებდნენ მოწოდებებს და მიზნის მისაღწევად ძალადობას უჭერდნენ მხარს“, — აღნიშნულია ანგარიშში.
2021 წლის 5 ივლისს თბილისი პრაიდის ღონისძიება, ღირსების მარში იყო დაგეგმილი, რომელიც პრორუსული დაჯგუფება ალტ-ინფოს ძალადობრივი მუქარების და მმართველი ძალის პოლიტიკური ნების არარსებობის გამო გაუქმდა. მიუხედავად ამისა, ძალადობრივმა ჯგუფებმა იერიში მიიტანეს მედიის წარმომადგენლებზე, რომლებიც პროფესიულ საქმიანობას ასრულებდნენ და დაარბიეს არასამთავრობო ორგანიზაციების ოფისები. ძალადობრივი ალტ-ინფოს თავდასხმის შედეგად დაშავდა 50-ზე მეტი ჟურნალისტი, ხოლო ერთ-ერთი დაშავებული, TV პირველის ოპერატორი, ლექსო ლაშქარავა რამდენიმე დღეში გარდაიცვალა. თავდასხმის ორგანიზატორები ამ დრომდე არ დასჯილან.
2012 წელს, აშშ-ის დემოკრატიული პარტიის წევრი, თემი ბოლდუინი პირველი ღიად ქვიარი და ვისკონსინის შტატში პირველი ქალი გახდა, რომელიც აშშ-ში სენატორად აირჩიეს. მან არჩევნებში რესპუბლიკელი ოპონენტი, ტომი ტომპსონი დაამარცხა.
ბოლდუინი დაიბადა და გაიზარდა ვისკონსინში, კერძოდ, მედისონში. დედის მენტალურად არასტაბილური მდგომარეობის გამო, თემი ბებიამ და ბაბუამ აღზარდეს. კვირის განმავლობაში თემი დედას მხოლოდ შაბათობით თუ სტუმრობდა, რომელიც 2017 წელს გარდაიცვალა.
1980 წელს თემიმ მედისონის სკოლა დაასრულა. მოგვიანებით, 1984 წელს, სმიტის კოლეჯში ბაკალავრის ხარისხი მოიპოვა, ხოლო 1989 წელს — იურიდიული ხარისხი ვისკონსისნის სამართლის სკოლაში. თემიმ კარიერა ამ მიმართულებით განაგრძო და ადვოკატირების კერძო პრაქტიკას 1992 წლამდე გადიოდა.
1992 წელსვე თემიმ, დემოკრატების სახელით, გაიმარჯვა ვისკონსინის 78-ე საოლქო უბანზე და მას შემდეგ პოლიტიკაში განაგრძო მოღვაწეობა.
1993 წელს მან საჯაროდ განაცხადა, რომ იმედგაცრუებული იყო იმჟამინდელი პრეზიდენტის, ბილ კლინტონის მხარდაჭერით სამხედრო წყობის პოლიტიკისადმი, რომელიც ქვიარ თემს შეეხებოდა. მას ერქვა “არ იკითხო, არ თქვა” და გულისხმობდა წესს, რომლის მიხედვითაც, სამხედრო პერსონალის ლგბტქია+ სპექტრის დისკრიმინაცია იკრძალებოდა, თუმცა ღიად ქვიარ ადამიანების მიღება სამხედრო სამსახურში არ იყო ნებადართული.
1994 წლის დასაწყისში თემი გამოვიდა ინიციატივით, რომ ერთი და იმავე სქესის ადამიანების ქორწინება ვისკონსინში ლეგალური ყოფილიყო, ხოლო 1995 წელს საზოგადოებას სამოქალაქო პარტნიორობის ხელშეკრულების ლეგალიზება შესთავაზა.
2008 წელს, ბოლდუინმა, რომელიც ქვიარ თემის უფლებებს ადვოკატირებდა, ლგბტ თანასწორობის ჯგუფი დააარსა.
გარდა ლგბტქი უფლებების დაცვისა, თემი ბოლდუინს საზოგადოება ჰუმანური პოლიტიკის გატარებით იცნობს. ის არჩევის დღიდან ღიად უპირისპირდებოდა ბრალდებულთა სიკვდილით დასჯას. აღსანიშნავია, რომ ვისკონსინი სიკვდილით დასჯის კანონის გაუქმებისას ერთ-ერთი ყველაზე სწრაფი აღმოჩნდა. გარდა ამისა, ცნობილია, რომ კანონის არსებობის ისტორიაში, შტატში სიკვდილით დასჯის მხოლოდ ერთი შემთხვევა ფიქსირდება.
2012 წელს, დემოკრატების კანდიდატმა მხარდამჭერებს სენატის არჩევნებში მონაწილეობის შესახებ აცნობა და წინასაარჩევნო რესურსი ჯანდაცვაში არსებული პოლიტიკის გადასააზრებლად, საგადასახადო პოლიტიკასა და თანასწორობაზე სასაუბროდ გამოიყენა. ბოლდუინის იდეები განსაკუთრებულად იყო ორიენტირებული ჯანდაცვის რეფორმასა და სამუშაო ადგილების რაოდენობის ზრდაზე. ცნობილია, რომ ის 2010 წელს პრეზიდენტ ობამას ჯანდაცვის სისტემის განახლების აქტიური მხარდამჭერი იყო.
წინასაარჩევნო კამპანიისას, თემიმ დაფინანსება ორგანიზაციისგან “დემოკრატია ამერიკისთვის” და ფონდ EMILY’s List-სგან მიიღო. მისი ოპონენტი, რესპუბლიკელი ტომი ტომპსონი აცხადებდა, რომ თემის გამოსვლები და იდეოლოგია ქვეყნისთვის მეტისმეტად მემარცხენე იყო და საფრთხეში აყენებდა ვისკონსინის მოსახლეობას. ბოლდუინმა ოპონენტთან დებატებში მონაწილეობა 3-ჯერ მიიღო და ტონი არჩევნებშიც დაამარცხა.
მისი სექსუალობა და ლესბოსელობა არჩევნების პერიოდში კამპანიის ამოსავალი წერტილი არ ყოფილა. CNN-ის ცნობით, არჩევნების მიმდინარეობისას თემიმ განაცხადა, რომ ის კენჭს ცვლილებებისთვის იყრიდა და არა იმისთვის, რომ თავისი პრეცედენტული გამარჯვებით ისტორია შეექმნა. თემის თქმით, ის იმედოვნებდა, რომ სენატი მეტად ასახავდა ამერიკასა და ქალების ცხოვრებისეულ გამოცდილებას.
“როცა მაგიდასთან ადგილი გაქვს, ეს მნიშვნელოვანია და მგონი, ჩვენ დავინახავთ, რომ სენატი მეტად ასახავს ამერიკას. ჩვენ ჯერ მანდ არ ვართ, მაგრამ ეს ის ცვლილება იქნება, რომელიც წინ წაგვიყვანს”, — განაცხადა თემიმ.
ბოლდუინმა ლგბტქი უფლებების ადვოკატირება გამარჯვების შემდეგაც განაგრძო — ქვიარ ადამიანების დაცვა და მათი მუდმივი რეპრეზენტაცია ჰეტერონორმატიულ საზოგადოებებში.
2016 წელს, ორლანდოში მომხდარ მასობრივ მკვლელობას, როცა გეი კლუბზე თავდასხმის შედეგად 50 ადამიანი დაიღუპა, სენატორმა ბოლდუინმა სიძულვილით მოტივირებული დანაშაული უწოდა და განაცხადა, რომ მთავარი კითხვა, რომელიც საკუთარ თავებს უნდა დავუსვათ, ისაა, ვაპირებთ თუ არა გაერთიანებასა და სიძულვილის, იარაღისა და ტერორიზმის წინააღმდეგ ბრძოლას.
2017 წლის მაისში ბოლდუინი ხელმძღვანელობდა თანასწორობის აქტის კვლავ შემოღებას, რომელიც, წარმატებით გასვლის შემთხვევაში, აშშ-ში ლგბტქი+ ამერიკელებს დისკრიმინაციისგან დაიცავდა.
გარდა უზარმაზარი სიმბოლური მნიშვნელობისა, რომელიც ქვიარ თემისთვის ლესბოსელი პოლიტიკოსის გამარჯვებას ჰქონდა, პროგრესული ლიდერის გამარჯვება დემოკრატებს სენატის კონტროლშიც დაეხმარა.
2013 წელს ბოლდუინი სენატის შვიდი წევრიდან, რომლებმაც ლიბერალურ რეიტინგში მეხუთე ადგილი დაიკავეს, ერთ-ერთი იყო. თუმცა, როგორც თავად აღნიშნავს, ის პროგრესული უფროა და ცდილობს, იბრძოლოს მათი სახელით, ვისაც ეს არ შეუძლია.
თემი ბოლდუინი ფემინისტია, იბრძვის ქალების ემანსიპაციისთვის. მისი იდეოლოგიაც თანასწორობის პოლიტიკას ეფუძნება. იგი იბრძოდა ცვლილებების განსახორციელებლად, როდესაც აშშ-ში სიძულვილით მოტივირებული დანაშაულის ცნების გაფართოება მოხდა. თემის განცხადებით, მისთვის მნიშვნელოვანია, სამსახურებრივი ანაზღაურება გენდერისგან დაცლილი იყოს და აღიკვეთოს კაცებისათვის მეტის გადახდის პრაქტიკა.
აღსანიშნავია 2022 წელს ბოლდუინის ლიდერობა, რომელიც კრიტიკულად მნიშვნელოვანი აღმოჩნდა ორად გახლეჩილი სენატისთვის ერთი და იმავე სქესის ადამიანების ქორწინების კანონპროექტთან მიმართებით. რამდენიმე საათით ადრე, სანამ სენატი კანონპროექტს დააკანონებდა, რომელიც ერთი და იმავე სქესის ადამიანების ქორწინების უფლების დაცვის შენარჩუნებას გულისხმობდა, თემიმ ორჯერ დააკაკუნა ხის მაგიდაზე:
“ცრუმორწმუნე არ ვარ, მაგრამ ეს მაინც უნდა გავაკეთო!” – განუცხადა თემიმ CNN-ს.
თუმცა მისი შფოთვა უსაფუძვლო იყო — სენატმა კანონპროექტს მხარი დაუჭირა.
29 ნოემბერს, აშშ-ის სენატმა მიიღო კანონპროექტი, რომელიც დაიცავს ერთი და იმავე სქესის ადამიანების ქორწინების ფედერალურ აღიარებას.
ეს კანონპროექტი შტატებს ერთი და იმავე სქესის ადამიანების და რასებსშორისი ქორწინებების შეზღუდვას ვერ უკრძალავს, თუკი უზენაესმა სასამართლომ მათ ამის უფლება მისცა, თუმცა ის დაავალდებულებს ფედერალურ მთავრობას, აღიაროს ქორწინება, თუკი ის კანონიერი იყო იმ შტატში, რომელშიც შესრულდა.
კანონპროექტის მიზანია, შეზღუდოს აშშ-ის უზენაესი სასამართლოს პოტენციური გადაწყვეტილება ქორწინების თანასწორობის წინააღმდეგ, რადგან არსებობს საშიშროება, რომ სასამართლომ გააუქმოს 2015 წლის გადაწყვეტილება, რომელმაც ქორწინების თანასწორობა ქვეყნის მასშტაბით გახადა კანონიერი.
„დღეს ხანგრძლივი, მაგრამ მტკიცე მარში თანასწორობისთვის კიდევ ერთი ნაბიჯით წავიდა წინ. ამ კანონპროექტის მიღებით სენატი ღიად აცხადებს იმას, რაც ყველა ამერიკელმა უნდა მოისმინოს: განურჩევლად იმისა, თუ ვინ ხარ ან ვინ გიყვარს, იმსახურებ ღირსებასა და თანასწორობას კანონის წინაშე“, — განაცხადა სენატის უმრავლესობის ლიდერმა, ჩაკ შუმერმა.
კანონპროექტი 61 ხმით მიიღეს 36-ის წინააღმდეგ. მას მხარი დაუჭირა 49 დემოკრატმა და 12 რესპუბლიკელმა. სანამ კანონპროექტს პრეზიდენტი ჯო ბაიდენი მოაწერს ხელს, ის ჯერ წარმომადგენელთა პალატამ უნდა დაადასტუროს, რაც, სავარაუდოდ, ამ წლის დასრულებამდე მოხდება.
აშშ-ის სტატისტიკური აღწერის ბიუროს ინფორმაციით, აშშ-ში დაახლოებით 568 000 ერთი და იმავე სქესის წყვილი ცხოვრობს.
ამერიკაში, ჯორჯიის შტატის სასამართლომ გააუქმა კანონი, რომელიც აბორტს ორსულობის მეექვსე კვირის ვადიდან კრძალავდა. სასამართლომ ეს ჩანაწერი არაკონსტიტუციურად ცნო. 2019 წელს მიღებულ კანონში ეწერა, რომ მას შემდეგ, რაც ემბრიონის გულის აქტივობა გამოვლინდებოდა, აბორტი მყისიერად იკრძალებოდა. ასეთ ვადად კი 6 კვირა იყო მიჩნეული. ეს ჩანაწერი ერთ-ერთი ყველაზე მკაცრი აღმოჩნდა ქვეყნის მასშტაბით, რამაც მოსახლეობაში მასობრივი პროტესტი გამოიწვია.
მოსამართლე რობერტ მაკბერნის გუშინდელი, 15 ნოემბრის გადაწყვეტილებით, ეს კანონი ბათილდება და აბორტზე წვდომა ორსულობის 22 კვირამდე კვლავ ლეგალური ხდება. გადაწყვეტილება ძალაში მიღებისთანავე შევიდა.
სასამართლოს ეს პოზიცია განსაკუთრებით მნიშვნელოვანია იმის გამოც, რომ მიმდინარე წლის ივნისში ამერიკის შეერთებული შტატების უზენაესმა სასამართლომ აბორტის კონსტიტუციური უფლება გააუქმა. კანონის ძალაში შესვლის შემდეგ, ორსულობის შეწყვეტის საკითხი თითოეულ შტატს თავად უნდა გადაეწყვიტა.
ფულტონის ოლქის სასამართლოში სარჩელი საადვოკატო ჯგუფმა SisterSong Women of Color შეიტანა. ჯგუფი ფერადკანიან ქალებს აძლიერებს და რეპროდუქციული სამართლიანობის მისაღწევად იბრძვის.
სარჩელი ამტკიცებს შტატის “გულისცემის კანონპროექტის” არაკონსტიტუციურობას. მოსარჩელეების განცხადებით, აბორტის აკრძალვა ორსულობის ექვსი კვირის ვადაზე ქალებს არჩევანს არ უტოვებს და თავიანთ სხეულებზე ავტონომიას უკარგავს. ექვს კვირამდე ორსულობისას ზოგმა ქალმა არც იცის მიმდინარე ორსულობის შესახებ. შესაბამისად, ამ პირობებში ქალებისთვის არჩევანის გაკეთება შეუძლებელი ხდება.
SisterSong Women of Color აღმასრულებელი დირექტორის, მონიკა სიმპსონის განცხადებით, მნიშვნელოვანია, რომ ჯორჯიის შტატში მცხოვრებმა ადამიანებმა დაინახონ მსგავსი ტიპის გამარჯვებები.
“გრძელი გზის შემდეგ, როგორც იქნა, შეგვიძლია ვიზეიმოთ აბორტის უკიდურესი აკრძალვის გაუქმება ჩვენს შტატში. მიუხედავად იმისა, რომ მივესალმებით აკრძალვის დასრულებას, გვგონია, რომ აღნიშნული შეზღუდვა თავიდანვე არ უნდა დაწესებულიყო”, – აცხადებს სიმპსონი.
ჯგუფის განცხადებით, აბორტთან დაკავშირებული ახალი ხედვა ქალებს თავიანთ სხეულებზე ავტონომიას დაუბრუნებს.
არაკომერციული ორგანიზაციაში Planned Parenthood Southeast, რომელიც აშშ-ში რეპროდუქციული ჯანმრთელობის დაცვას უზრუნველყოფს, აცხადებენ, რომ კონსულტაციას იურისტებთანაც გადიან, რათა დაუყოვნებლივ აღადგინონ ეს მომსახურება. ორგანიზაციის ვიცე-პრეზიდენტის, ემი კენედის განცხადებით, მას შემდეგ, რაც აბორტის აკრძალვა გაუქმდა, პაციენტების ზარები არ წყდება. ისინი ექიმებთან პროცედურის ჩასატარებლად საჭირო კონსულტაციას ითხოვენ.
ახალი კვლევის მიხედვით, ფლორიდაში მიღებული კანონის შემდეგ, რომელიც საგანმანათლებლო დაწესებულებებში სექსუალური ორიენტაციისა და გენდერული იდენტობის თემების განხილვაზე შეზღუდვებს აწესებს, სოციალურ ქსელებში ლგბტქი სიძულვილის ენის გამოყენება გახშირდა.
Human Rights Campaign-ის კვლევის მონაცემებით, კანონის — „არ თქვა — გეი“ მიღების შემდეგ იმ ტერმინებისა და მოსაზრებების შემცველი პოსტების ოდენობა, რომლებიც პედოფილიასა და სექსუალურ ორიენტაციას ერთმანეთთან აკავშირებენ, 400%-ით არის გაზრდილი.
მკვლევართა თქმით, ბოლო თვეებში კონსერვატიულად განწყობილმა ადამიანებმა სოციალურ ქსელებში ტერმინ grooming-ის გამოყენება აქტიურად დაიწყეს. აღნიშნული სიტყვით პედოფილთა მიერ, განსაკუთრებით ონლაინ სივრცეში მცირეწლოვანებთან მიმოწერას და მათზე სექსუალური ძალადობის მიზნით შეხვედრის მცდელობას მოიხსენიებენ. პედოფილია არის გადახრა, ბავშვებისადმი სექსუალური ლტოლვა და მას არაფერი აქვს საერთო სექსუალურ ორიენტაციასთან. მიუხედავად ამისა, აგრესიულად განწყობილი ონლაინ მომხმარებლები Grooming-ის მხარდამჭერად მოიხსენიებენ ყველას, ვინც საგანმანათლებლო სივრცეში გენდერული იდენტობისა და სექსუალური ორიენტაციის განხილვის აკრძალვას აკრიტიკებს.
სიძულვილის ენის შემცველი 500 ყველაზე პოპულარული პოსტი იანვრიდან ივლისის ჩათვლით 72-მა მილიონმა ადამიანმა ნახა.
აღსანიშნავია, რომ გაზრდილი ანტი-ლგბტქი სტატისტიკა და არასწორი წარმოდგენების გავრცელება კონსერვატიულად განწყობილი გავლენიანი, ავტორიტეტული ფიგურების საჯარო პოსტების შედეგია.
კვლევის ავტორების აზრით, გაზრდილი ანტი-ლგბტქი რიტორიკა სიძულვილს აღვივებს, რამაც შეიძლება ძალადობრივი შემთხვევების მატებაც კი გამოიწვიოს. ამიტომ, მკვლევრები სოციალურ ქსელებს მოუწოდებენ, სიძულვილის ენასთან დაკავშირებული შინაგანაწესის ეფექტურად გამოყენებას ხელი შეუწყონ. ამასთან, მათი თქმით, 100 გამორჩეულად საზიანო ტვიტი ტვიტერის ადმინისტრაციასაც აჩვენეს, თუმცა მხოლოდ ერთი მათგანი წაიშალა.
2022 წლის მარტში, ფლორიდაში ახალი კანონი მიიღეს, რომლითაც სკოლის მასწავლებლებს გენდერული იდენტობისა და სექსუალური ორიენტაციის მცირეწლოვან მოსწავლეებთან განხილვის უფლება შეეზღუდათ. კანონს დიდი გამოხმაურება მოჰყვა. მისი მხარდამჭერები მიიჩნევენ, რომ აღნიშნულ საკითხებზე მასწავლებლები არ უნდა საუბრობდნენ და ეს მშობლების ნებაზე უნდა იყოს დამოკიდებული. კანონის მოწინააღმდეგეები კი მიიჩნევენ, რომ ის ლგბტქი ადამიანებთან დაკავშირებით სიძულვილისშემცველი გზავნილების გააქტიურებას უწყობს ხელს.
წყარო: AP News
2013 წელს, ქალთა ეროვნული საკალათბურთო ასოციაციის ყოველწლიურ ღონისძიებაზე, რომელიც კოლეჯის წამყვანი მოთამაშეების თუ საერთაშორისო პროფესიონალებისთვის ყველაზე პრესტიჟული ლიგის კარს ხსნის, ბრიტნი გრაინერი ყველაზე დიდი პერსპექტივის მქონე კალათბურთელ ქალად დასახელდა.
იმ წამს, გრაინერი მსოფლიოში ყველაზე წარმატებული ღიად ლესბოსელი კალათბურთელი გახდა. გრაინერს ყოველთვის უნდოდა, რომ საკუთარ სექსუალურ ორიენტაციაზე ღიად ესაუბრა, მაგრამ პრობლემა საჯაროდ გაცხადებისთვის სწორი დროის შერჩევა კი არა, ძალაუფლების მქონე ადამიანების მხრიდან ხელოვნურად შექმნილი ბარიერები იყო.
ყოველწლიურ ღონისძიებაზე სიტყვით გამოსვლამდე ბრიტნი მამამისს, რეიმონდს ჩაეხუტა, შემდეგ კი სცენაზე ავიდა. სამოსის ფერებით და მკვეთრი ნარინჯისფერი ფრჩხილის ლაქით მომავალ გუნდს მიაგო პატივი, ყველას ყურადღება მასზე იყო მიმართული, რადგან იმ დღეს მისი მომავალი დაიწყო.
ცოტა ხნის შემდეგ ESPN-ის ჟურნალისტის მიერ დასმულ კითხვაზე: „როგორ ხედავთ უფრო მეტი თავისუფლებით თამაშს?“ ბრიტნიმ მიუგო: „ნამდვილად ველი თავისუფლებას”.
ბრიტნი გრაინერმა თითქმის 5 თვე გაატარა მოსკოვის საპატიმროში. თებერვალში, მარიხუანას დიდი ოდენობით გადატანისთვის დააკავეს მაშინ, როცა ეკატერინბურგში გუნდის წევრებთან მიდიოდა. WNBA-ის ბევრი მოთამაშე შემოსავლის გაზრდის მიზნით ზამთრის სეზონს ამგვარად, საზღვარგარეთ ატარებს. გრინერის დაკავებიდან ერთ კვირაში რუსეთის პრეზიდენტი, ვლადიმირ პუტინი უკრაინაში შეიჭრა. WNBA-ისა და გრასრუთ მოძრაობის ერთობლივი კამპანიის მიუხედავად, გრაინერის პატიმრობის დასასრული რთულად პროგნოზირებადია. მისი სასამართლო პროცესები გადამწყვეტ ფაზაში ახლაღა შედის.
7 ივლისს, ბრიტნი გრაინერი სასამართლოს წინაშე დანაშაულის აღიარების გადაწყვეტილებით წარსდგა, რასაც აშშ-სა და რუსეთს შორის მისი გადაცემის მოთხოვნით პოლიტიკური მოლაპარაკება უნდა გაემარტივებინა. მიუხედავად ამისა, ექსპერტები თვლიან, რომ მოლაპარაკებების მოლოდინი არარეალურია. გრაინერი დაუნდობელი ომის შუაგულში აღმოჩენილი დიპლომატიურ მძევალი აღმოჩნდა.
ამავდროულად, აშშ-ის მედია გამოცემებმა ვერ შეძლეს, რომ გრაინერის მიღწევების სრული გავლენის შესახებ საზოგადოების ყურადღება მიემართათ. მისი ამბავი ყოველთვის იმაზე მეტი იყო, ვიდრე კალათბურთი — ჩემპიონატები თუ ოლიმპიური ოქროს მედლები. ეს დისკრიმინაციასთან ბრძოლის, უხილავი ბარიერების მსხვრევის, რადიკალური ცვლილებების ამბავია და აშშ-სა და მსოფლიოს ქალი კალათბურთელების ამბავსაც ასახავს, ყველა ქვიარ ადამიანის ამბავს, რომელიც სპორტში თავის დამკვიდრებას ცდილობს, გვიყვება, რომ WNBA-ის მოთამაშეებმა უნდა მოითხოვონ პატივისცემა, რომელიც უკვე დიდი ხანია დაიმსახურეს.
გრაინერი 1990 წელს დაიბადა. ქალთა საკალათბურთო ასოციაცია კი 1997 წელს, NBA-ის ხელმძღვანელობით დაარსდა. დაარსებისთანავე, ლიგა თავდაუზოგავად მუშაობდა, რათა ჰეტეროსექსუალობისა და ტრადიციული ფემინური გენდერული როლის დამცველის იმიჯი შეექმნა. 1998 წელს, Washington Post-მა ახალი WNBA-ისთან დაკავშირებით ახალი სერია — გოგოების საუბარი წამოიწყო, რომლის ფარგლებშიც ახალგაზრდა ფანებს კალათბურთელი ქალებისთვის შეყვარებულ ბიჭებზე ან ლიგის ვარსკვლავობამდე მიმავალ გზაზე კითხვების დასმა შეეძლოთ. იმ დროისთვის, თუ გინდოდა, რომ დაფასებულ ვარსკვლავად შემდგარიყავი გვერდით მეგობარი ბიჭის ყოლა აუცილებელიც კი იყო, საზიანოდ, საშიშად ითვლებოდა ათლეტი ქალი, რომელიც მარტოხელა იყო და გადაწყვეტილებებს დამოუკიდებლად იღებდა.
ქალთა ლიგა დიდი მონდომებით ზღუდავდა ლესბოსელ და ბისექსუალ მოთამაშეებს და ამ ჩარჩოებისგან თავის დაღწევა ერთეულებმა თუ შეძლეს. თუ WNBA-ს მიერ განვლილ გზას გადავხედავთ, აღმოვაჩენთ, რომ 2002-2012 წლების 10-წლიან პერიოდში საკუთარ სექსუალურ ორიენტაციაზე საჯაროდ ერთადერთმა ათლეტმა, შერილ სვუპსმა, 2005 წელს განაცხადა.
„5 წლის წინ საჯაროდ საუბარს ალბათ ვერ გავბედავდი. ზედმეტად შეშინებული ვიყავი იმის წარმოდგენით, ამ ამბავს რა გავლენა ექნებოდა, ველოდი, რომ მხარდაჭერას დავკარგავდი“, — აღნიშნა სვუპსმა The New York Times-თან საუბარში. იმ დროისთვის კალათბურთელ ქალს ოლიმპიური ოქრო. WNBA-ის 4 ჩემპიონატი და ლიგის ყველაზე დამსახურებული მოთამაშის 3 ტიტული ჰქონდა მოგებული — ამან ემოციური და ფინანსური თავდაჯერება მიანიჭა, რათა საკუთარ ორიენტაციაზე საჯაროდ ელაპარაკა.
გრაინერი ჰიუსტონში, ტეხასში იზრდებოდა და საკუთარი განსხვავებულობის გამო წნეხს ადრეული ასაკიდან გრძნობდა.
„ალბათ თავი განსხვავებულად იმ პერიოდიდან ვიგრძენი, როცა ყველამ დაიწყო შეგონება, რომ ეს ასე იყო… მკერდი ფაქტობრივად არ მქონდა, გამხდარი ვიყავი და ხმაც დაბალი მქონდა“, — იხსენებს ბრიტნი 2014 წელს გამოქვეყნებულ მემუარებში — In My Skin. თანატოლები დერეფანში დასდევდნენ და მის დამცირებას ცდილობდნენ — „ალბათ ბიჭია. გოგო ნამდვილად არ არის“.
შეურაცხყოფებმა გრაინერის თავდაჯერება შეარყია და „ემოციური გაურკვევლობა“ მოუტანა, თუმცა Nimitz-ის საშუალო სკოლაში ჩაბარების შემდეგ კალათბურთი მოტივაციის გაღვივებაში დაეხმარა. გამორჩეულ ფიზიკურ მონაცემებს და მონდომებას გაუმჯობესებისთვის იყენებდა, სპორტმა ცხოვრების მიზანი და წინააღმდეგობის სურვილი გაუჩინა.
2007 წელს, გრაინერის შთამბეჭდავი „ჩატენის“ ვიდეო ვირუსულად გავრცელდა. 2008 წლის შემოდგომაზე, გრინერი Baylor-ის უნივერსიტეტში ჩაირიცხა, სადაც კამპუსში ლონგბორდზე დამდგარს ნახავდით ან პიკნიკებზე მეგობრებთან ხუმრობაში გართულს, ამავდროულად მოედანზე ოპონენტებს ჯაბნიდა. საუნივერსიტეტო ლიგაში საკუთარ გუნდს არაერთი ტრიუმფი მოუტანა და სხვადასხვა გამოცემები მის გამორჩეულ „ჩატენებზე“ ახალ ამბებს წერდნენ. მაგრამ უნივერსიტეტში სწავლისას, გრაინერი იძულებული იყო, რომ იდენტობის შესახებ დაემალა.
ერთ დღეს, სტუდენტური ჩემპიონატის მიმდინარეობისას მთავარმა მწვრთნელმა, კიმ მალკიმ დაიბარა. გრაინერი მემუარებში იხსენებს, რომ წინა დღეს, ვალენტინობის დღის აღსანიშნავად რესტორანში ქალთან ერთად იყო, რის შესახებაც ჭორებმა მწვრთნელამდე მიაღწია. მალკიმ გრინერს პირდაპირ უთხრა — „ამის კეთებისას არ უნდა დაგინახონ… სჯობს ყველაფერი ჩაკეტილი კარის მიღმა დამალო“.
იმ დროისთვის, უნივერსიტეტის ოფიციალური შიდაგანაწესი ჰომოსექსუალობას და ზოგადად ქორწინების გარეშე სექსს კრძალავდა, აკრძალული იყო „ადვოკატირების ჯგუფები, რომლებიც სექსუალობის შესახებ სწავლებით ბიბლიის დოგმებთან წინააღმდეგობაში“ იყო. ამ მიდგომით გრინერს თავისუფლება იმავე დაწესებულებამ შეუზღუდა, რომელიც მის საჯარო წარმატებაზე დიდ გავლენას ახდენდა, ფინანსურად უზრუნველყოფდა და პროფესიული წრეების ყურადღების ცენტრში აქცევდა. ბრიტნი მემუარებში წერს — „დიდი დრო დავკარგე იმაზე ფიქრში ისინი ბრიტნი გრინერს როგორც ადამიანს უჭერდნენ მხარს თუ ბრიტნი გრაინერს — კალათბურთელს“.
მცირე ხნის წინაც კი, 2013 წლისთვის, როცა ბრიტნი გრაინერი პროფესიონალურ ლიგაში გადავიდა, ჟურნალისტები და ლიგაში ძალაუფლების მფლობელნი შეპყრობილნი იყვნენ ყველაფრის გასაიდუმლოებით. WNBA არ აღიარებდა ლესბოსელი მოთამაშეების დიდ ოდენობასა და ქვიარ ფანების არმიას. ლიგის მხოლოდ ერთი მოთამაშე, სიმონე ავგუსტუსი იყო ღიად ლესბოსელი.
მალე, ერთი რიგითი ინტერვიუს დროს, პროფესიონალურ ლიგაში გადასვლიდან მცირე ხანში, ჟურნალისტმა გრაინერსა და მის ორ კოლეგას სპორტისა და სექსუალობის შესახებ ჰკითხა, რაზეც ბრიტნიმ უყოყმანოდ უპასუხა — „ყოველთვის ღია ვიყავი ჩემს თავზე და სექსუალობაზე ღიად საუბრისთვის. თუ შემეძლება ყველას დავანახო, რომ სექსუალურ ორიენტაციაზე ღიად ვსაუბრობ, ეს თავს კარგად მაგრძნობინებს და არაფერია უჩვეულო, იმედი მაქვს, ახალი თაობაც იმავეს იგრძნობს“.
WNBA-ის არჩევანი არ ჰქონდა და პროცესის მონაწილედ იქცა. სულ რაღაც ერთი წლის შემდეგ, 2014 წელს, ეროვნული ტელევიზიით უჩვენეს ღირსების თამაში. WNBA-ში მიმდინარე პროგრესული გარდაქმნების გზა გრძელი, გამოწვევებით აღსავსე და კომპლექსურია, მაგრამ ბრიტნი გრაინერი დღევანდელი ლიგის საუკეთესო სახეა. ამ პროცესს ლაიშია კლარენდონი, მაია მური და ნატაშა ქლუდიც შეუერთდნენ და ადვოკატირების პროცესში ჩაერთნენ, რამაც ქალთა საკალათბურთო ასოციაცია სოციალური სამართლიანობის გამოწვევების გადაჭრის მნიშვნელოვან ფიგურად აქცია.
WNBA ახლა კიდევ ერთი პოლიტიკური გამოწვევის წინაშეა — ბრიტნი გრაინერის არასამართლებრივი პატიმრობა. გრაინერი კიდევ ერთხელ იქცა მნიშვნელოვანი პროცესის მთავარ ფიგურად, თუმცა, ამ შემთხვევაში მის წინაშე არსებული პრობლემა განსაკუთრებით რთულია. თავისუფლების აღკვეთის არასამართლებრივ შემთხვევებში პროცესი სიმართლის მტკიცების მიმართულებით კი არ მუშაობს, არამედ ემსახურება აღმკვეთი ქვეყნის პოლიტიკური სურვილების დაკმაყოფილებას. რუსეთს პატიმრების გაცვლა სურს, რაც აშშ-ის ხელისუფლების ბევრ წარმომადგენელს არ აწყობს.
მომდევნო კვირების თუ თვეების განმავლობაში რუსული მედიის საშუალებით გრინერის შესახებ მცირედს თუ გავიგებთ — ვიხილავთ დაცვის თანხლებით, ბორკილებდადებულს, სასამართლოს დარბაზში შესვლისას, მაგრამ ეს მცირე გამოსახულებებიც კი დაგვანახებს მისი მდგომარეობის სიმძიმეს, რაც ბევრად დიდი სიმართლის დანახვას ართულებს.
გრაინერს ყოველთვის დიდი ძალა ჰქონდა: გადარჩენის, წარმატების მიღწევის და ამ შესაძლებლობის სხვებისთვის დანახვების ძალა. ახლა მისი მნიშვნელობა კიდევ უფრო გაიზარდა, იმავე მიზეზით, რის გამოც ამერიკული საზოგადოება ცდილობდა, რომ მისთვის ყურადღება არ მიექცია და რის გამოც ის პუტინისთვის საჭირო სამიზნეა. პრეზიდენტისთვის, რომელიც ანტი-გეი გადაწყვეტილებებით, კანონმდებლობით საკუთარი პოლიტიკური ძალაუფლების განმტკიცებას ცდილობს. ამ გაგებით, გრაინერს ისევე, როგორც მრავალ სხვა ქვიარ, შავკანიან, გენდერულ ნორმებს აცდენილ ადამიანს შეიძლება თავისუფლებისთვის ბრძოლა მთელი ცხოვრების განმავლობაში მოუწიოს.
ისღა დაგვრჩენია, დაველოდოთ და ვნახოთ, როდის მოიპოვებს ბრიტნი გრაინერი თავისუფლებას.
წყარო: The Guardian
ავტორი: მაია გოლდბერგ-საფირი
აშშ-ის სახელმწიფო დეპარტამენტმა ადამიანის უფლებების დაცვის კუთხით 2021 წელს არსებული მდგომარეობის შესახებ ანგარიში გამოაქვეყნა.
ანგარიშში კრიტიკულად არის შეფასებული საქართველოში უფლებადაცვითი, მედიის თავისუფლების, უფლებადამცველთა უსაფრთხოების ტენდენციები და აღნიშნულია, რომ ხშირად ხელისუფლების არაეფექტური ღონისძიებები და განცხადებები ძალადობრივი ქმედებების ხელშემწყობია.
„5 ივლისს, პოლიციამ სათანადოდ არ იმოქმედა, რათა ღირსების მარშში მონაწილეთა შეკრების თავისუფლება დაეცვა. 3 ათასამდე ულტრა-მემარჯვენე დემონსტრანტი ძალადობრივ ქმედებებში მონაწილეობდა, კონტრაქციის მონაწილეების შეკრების ადგილს ანადგურებდა, არასამთავრობო ორგანიზაციების ოფისებს უტევდნენ და 50-ზე მეტი ჟურნალისტი სცემეს, რასაც პრემიერ ღარიბაშვილის განცხადებები მოჰყვა, რომელმაც დაგეგმილ ღირსების მარშს ,,გაუმართლებელი” უწოდა და სააკაშვილისა და რადიკალური ოპოზიციის განზრახვად შეაფასა. პრემიერის მტკიცებით, ქვეყნის პოპულაციის 95% ღონისძიების წინააღმდეგი იყო და ძალადობაზე პასუხისმგებლობა თბილისი პრაიდს დააკისრა.
ანგარიშები და ვიდეოები ცხადყოფს, რომ პოლიციამ ულტრა-მემარჯვენე ჯგუფები, რომლებიც პოლიციას, ჟურნალისტებს, ღირსების მარშთან და დასავლურ ღირებულებებთან ასოცირებულ ინდივიდებს თავს ესხმოდნენ, ძალადობისთვის ვერ/არ დააკავა. ოფიციალურმა უწყებებმა ორგანიზატორებს ღირსების მარშის გაუქმებისკენ მოუწოდეს, რადგან, მათი თქმით, მათ დაცვას ვერ შეძლებდნენ“, – ნათქვამია ანგარიშში და საუბარია 6 ივლისის სოლიდარობის აქციაზეც, რომლის პარალელურად შეკრებილი ძალადობრივი ჯგუფები „მშვიდობიან დემონსტრანტებს და პოლიციას ქვებს, ბოთლებს, ასაფეთქებელ საშუალებებს ესროდნენ, მაგრამ პოლიციამ ისევ არ მოუყარა თავი ეფექტურ საპროტესტო კონტროლის აღჭურვილობასა და პერსონალს“. გარდა ამისა, ანგარიშში აღნიშნულია, რომ ძალადობრივი ქმედებების ორგანიზატორები არ დაუკავებიათ.
ანგარიშში ასევე ნათქვამია, რომ 5 ივლისის ძალადობრივმა ქმედებებმა ლგბტქი ადამიანებს პოლიტიკურ პროცესებში მონაწილეობა და საკუთარი ხმის გაჟღერების შესაძლებლობა შეუზღუდა.
სახელმწიფო დეპარტამენტის ანგარიშში წერია, რომ 2021 წელს ლგბტქი ადამიანებზე თავდასხმის შემთხვევებმა იმატა და ჩამოთვლილია სიძულვილით მოტივირებული კონკრეტული დანაშაულები, რომლებზეც სახელმწიფოს არასათანადო რეაგირება ჰქონდა. გარდა ამისა, აღნიშნულია, რომ „მთავარი პროკურორის ოფისის მონაცემებით, 2021 წლის პირველ 9 თვეში სექსუალური ორიენტაციისა და გენდერული იდენტობის მიზეზით ჩადენილი დანაშაულების გამო 64 ადამიანის წინააღმდეგ გაატარეს აღმკვეთი ღონისძიება, თუმცა ლგბტქი ადამიანების მიმართ ოჯახში თუ საჯარო ადგილებში ძალადობა კვლავ სერიოზული გამოწვევაა და სახელმწიფო საპასუხოდ სათანადოდ არ მოქმედებს. ლგბტქი ორგანიზაციებმა, არასამთავრობოებმა და სახალხო დამცველის ოფისმა განაცხადეს, რომ ხელისუფლების არაეფექტური ანტიდისკრიმინაციული პოლიტიკა ლგბტქი თემს სახელმწიფო უწყებების ნდობას უკარგავს, მათივე თქმით, პოლიტიკოსების ჰომოფობიური კომენტარები თემის სიძულვილს და ტოლერანტობის არქონას განაპირობებს“.
ვრცელი ანგარიში მშრომელთა უფლებების კუთხით არსებული მდგომარეობის, დევნილთა და ეთნიკური უმცირესობების მიმართ არსებული დამოკიდებულებების, მათ შორის, სახელმწიფოს გულგრილობის, აივ/შიდსთან დაკავშირებული სტიგმისა და დისკრიმინაციის კრიტიკულ მდგომარეობის შეფასებას მოიცავს, რაც აივ-პრევენციას ართულებს. ასევე, დოკუმენტში საუბარია პოლიციელთა პასუხისგებაში არმიცემის ან ნაადრევად გათავისუფლების, გაუპატიურების შესახებ კანონის გაუმართაობის, ბავშვთა და შშმ პირების უფლებრივი მდგომარეობის, გენდერული თანასწორობის კუთხით არსებული გამოწვევების, ტრანსგენდერი ადამიანებისთვის გენდერის მარკის შეცვლის წინაპირობის გაუმართაობის და სხვა მნიშვნელოვანი საკითხების შესახებ.
აშშ-ის სახელმწიფო დეპარტამენტის ანგარიშის სრული ვერსიის ნახვა აღნიშნულ ლინკზე შეგიძლიათ.
11 აპრილიდან, აშშ-ის მოქალაქეებს პასპორტში გენდერის მარკერის გასწვრივ X-ის მონიშვნა შეეძლებათ. მომავალი წლიდან იგივე ცვლილების შეტანა სხვა ოფიციალურ დოკუმენტებშიც იქნება შესაძლებელი.
პრეზიდენტის ადმინისტრაცია ავიაკომპანიებთან და სატრანსპორტო უსაფრთხოების ადმინისტრაციასთან ითანამშრომლებს, რათა მათ სისტემაშიც გაჩნდეს X გენდერის მარკერი.
სახელმწიფო დეპარტამენტმა ჯერ კიდევ ივნისში განაცხადა, რომ იმ აპლიკანტებს, რომლებიც პირადობის დამადასტურებელ დოკუმენტში ჩამოთვლილ გენდერის მარკერს მათთვის შეუსაბამოდ თვლიდნენ, შეეძლებოდათ მარკერის გამარტივებული შეცვლა. სიახლე კი 31 მარტს, ტრანსგენდერი ადამიანების ხილვადობის საერთაშორისო დღეს გავრცელდა.
წყარო: CNN
მოგზაურობის და ახალი ქალაქების დათვალიერების ერთ-ერთი ყველაზე სასიამოვნო ნაწილი მუზეუმებისა და კულტურული ადგილების დათვალიერებაა. მართალია, ლგბტქი არტისტების ნამუშევრები მსოფლიოს მრავალ მუზეუმშია წარმოდგენილი, თუმცა, ამასთან ერთად, არსებობს ისეთი მუზეუმებიც, რომლებიც მთლიანად ლგბტ+ ისტორიისა და კულტურის წარმოჩენაზეა ორიენტირებული.
ამ სტატიაში მსოფლიოში ყველაზე გამორჩეული ლგბტქი მუზეუმების შესახებ მოგიყვებით.
ლესლი+ლოჰმანის მუზეუმი ერთ-ერთი ყველაზე ძველი და ცნობილი ლგბტქი მუზეუმია ამერიკაში. მუზეუმის ფუძემდებლები ჩარლზ ლესლი და ფრითზ ლოჰმანი არიან, ნიუ-იორკელი გეი წყვილი, რომელმაც დიდი წვლილი შეიტანა ქვიარ კულტურის პოპულარიზაციაში. ისინი 1969 წლიდან თავიანთ ბინაში აწყობდნენ ქვიარ არტისტების გამოფენებს და წლების განმავლობაში აგროვებდნენ მათ ნამუშევრებს.
მუზეუმი, რომელიც მანჰეტენზე მდებარეობს, გასული სამი საუკუნის 30 000-მდე ნამუშევარს ინახავს. მუზეუმის შენობაში ასევე არის წიგნების მაღაზია და სივრცე საჯარო თუ დახურული შეხვედრებისთვის.
მიიჩნევა, რომ შვულეს მუზეუმი ერთ-ერთი პირველი ლგბტქი მუზეუმია მთელს მსოფლიოში. 1984 წელს, ბერლინის მუზეუმში გაკეთებული პატარა გამოფენის წარმატების შემდეგ, ოთხმა მეგობარმა გადაწყვიტა, რომ ახალი მუზეუმი დაეარსებინათ, სადაც მხოლოდ ქვიარ არტისტების ნამუშევრები იქნებოდა წარმოდგენილი.
მუზეუმი 2013 წლიდან Tiergarten-ის უბანში მდებარეობს და მისი შენობა აერთიანებს ოთხ საგამოფენო დარბაზს, სამუშაო ოთახებს, კაფეს და შეხვედრებისთვის განკუთვნილ სივრცეებს.
ენდი ვორჰოლმა დიდი კვალი დატოვა, როგორც, ზოგადად, ხელოვნებაზე, ასევე, ქვიარ კულტურაზე. პიტსბურგი კი ერთ-ერთი ყველაზე იღბლიანი ქალაქი აღმოჩნდა ამერიკაში, რომელიც ლეგენდარული ენდი ვორჰოლის 900 ნახატს, 2 000 ფურცელზე ნამუშევარს, 1 000 უნიკალურ პრინტს, 77 სკულპტურას, 4 000 ფოტოს და 4 350 ვიდეოჩანაწერს ინახავს. ეს ერთ-ერთი ყველაზე დიდი მუზეუმია მთელს მსოფლიოში, სადაც მხოლოდ ერთი არტისტის ნამუშევრებია შენახული.
ONE კიდევ ერთი სივრცეა, რომელიც ლოს-ანჯელესში მდებარეობს და ლგბტქი საკითხების მიმართ საზოგადოების ცნობიერების ამაღლების მიზნით შეიქმნა. არქივში შენახულია პერიოდული ლგბტქი გამოცემები, ფილმები, ფოტოგრაფია, აუდიოჩანაწერები და პერსონალური ქაღალდები. ამასთან ერთად, არქივი პერიოდულად მასპინძლობს გამოფენებს, სადაც ისეთ ხელოვნების ნიმუშებს ან ისტორიულ არტეფაქტებს შეხვდებით, რომელთა ნახვაც სხვაგან შეუძლებელია.
GLBT ისტორიული საზოგადოება და მუზეუმი კიდევ ერთი უნიკალური სივრცეა სან-ფრანცისკოში, რომელიც ისტორიულ არტეფაქტებს და ამერიკის ქვიარ კულტურის ნამდვილ საგანძურს ინახავს. მუზეუმი კასტროს უბანში მდებარეობს, რომელიც სან-ფრანცისკოს გეი მექად არის აღიარებული. GLBT მუზეუმის დამთვალიერებლებს შესაძლებლობა აქვთ, სან-ფრანცისკოს და, ზოგადად, კალიფორნიის ქვიარ ლეგენდების და პოლიტიკური ფიგურების, მაგალითად, ჰარვი მილკის საარქივო მასალებს გაეცნონ. მუზეუმის შენობაში ხშირად იმართება გამოფენები, სადაც ქვიარ არტისტების ნამუშევრებია გამოფენილი.
მართალია, ფლორიდა არ არის ის შტატი, სადაც ცნობილი სტოუნვოლის აჯანყება მოხდა, თუმცა ერთ-ერთი ყველაზე ცნობილი მუზეუმი, რომელიც ამ მოვლენის არტეფაქტებს ინახავს, ფლორიდაში მდებარეობს. მუზეუმი 1984 წლიდან ფუნქციონირებს, თუმცა თავდაპირველად მხოლოდ ბიბლიოთეკა იყო. მუზეუმის შენობაში დღეს 30.000-ზე მეტი ხელოვნების ნიმუში, ისტორიული არტეფაქტი და ჩანაწერი ინახება, რომელიც მთლიანად სტოუნვოლის აჯანყებას უკავშირდება. მუზეუმის შენობა ხშირად უმასპინძლდება გამოფენებს, ფილმის ჩვენებებს, საჯარო კითხვას და საქველმოქმედო საღამოებს.
გეი და ლესბოსური სპორტის ეროვნული დიდების დარბაზი ნამდვილი სამოთხეა სპორტით დაინტერესებული ქვიარ ადამიანებისთვის. მუზეუმის მიზანია, პატივი მიაგონ იმ სპორტსმენებს, რომლებმაც დიდი წვლილი შეიტანეს სპორტის სხვადასხვა სახეობაში, ამასთან ერთად, არ შეუშინდნენ საზოგადოების წნეხს და ქამინგაუთი გააკეთეს.
The arQuives კიდევ ერთი ქვიარ არქივია, რომელიც კანადაში მდებარეობს და 1973 წლიდან ფუნქციონირებს. არქივს შექმნის დღიდან მხარს უჭერს კანადის მთავრობა და ითვლება ერთ-ერთ ყველაზე მნიშვნელოვან კულტურულ ინსტიტუციად. არქივის შენობაში შეხვდებით ერთ-ერთ ყველაზე მდიდარ და მრავალფეროვან მასალებს ლგბტქი კანადის ისტორიიდან. არქივის შენობა ასევე მასპინძლობს ტურებს ქალაქში, სეზონურ გამოფენებსა და პრეზენტაციებს.
ავსტრალიის ლესბოსური და გეი არქივი 40 წლის წინ შეიქმნა და მთელი ამ დროის განმავლობაში მოხალისეები მართავდნენ. არქივის შენობაში შეხვდებით 150 000 ლგბტქი არტეფაქტს ავსტრალიის დასაბამიდან დღემდე. მუზეუმის შენობა დამთვალიერებლებს ასევე სთავაზობს აკადემიურ კონფერენციებს, თემატურ და ისტორიულ ტურებს. მუზეუმი ხშირად თანამშრომლობს ქვეყნის სხვა, უფრო მსხვილ მუზეუმებთან და გამოფენებთან.
IHLIA LGBT მემკვიდრეობა კიდევ ერთი კულტურული სივრცეა, რომელიც ევროპის ერთ-ერთ ყველაზე გეი-მეგობრულ ქალაქში, ამსტერდამში მდებარეობს. მუზეუმის შენობა, რომელიც 1999 წლიდან ფუნქციონირებს, დღესდღეობით, ერთ-ერთი ყველაზე მდიდარია თავისი კოლექციით მთელს ევროპაში. მუზეუმში დაცულია 113 000 საარქივო მასალა და ხელოვნების ნიმუში.
