მსოფლიო

გახდა თუ არა მსოფლიო ლგბტქი ადამიანებისთვის საცხოვრებლად უკეთესი — Gallup-ის გლობალური გამოკითხვა

მსოფლიოს ზრდასრულ მოქალაქეთა ნახევარი თვლის, რომ მათი ქალაქი ან საცხოვრებელი ადგილი ქვიარ ადამიანებისთვის საცხოვრებლად კარგი, უსაფრთხო ადგილია. აღნიშნული მაჩვენებელი გასულ ათწლეულში ორჯერ უფრო უკეთესია, ვიდრე უწინ. Gallup-ის მიერ 110 ქვეყნის მცხოვრებთა 2021

მსოფლიოში ყველაზე ბედნიერი ლგბტქი მოქალაქეები ამსტერდამში არიან

DC Jewelery-ის გუნდმა 100 ყველაზე პოპულარული ტურისტული მიმართულება შეისწავლა, ინსტაგრამის პოსტებს, გუგლის საძიებო სისტემას, მსოფლიო ბანკის მონაცემებსა და The William’s ინსტიტუტის გეი მიმღებლობის ინდექსს გადახედა და შეყვარებული, მათ შორის, ლგბტქი წყვილებისთვის საუკეთესო ქალაქები გამოავლინა. მსოფლიოს ქალაქებიდან ყველაზე ბედნიერი ლგბტქი მოქალაქეები

ლგბტქი მოგზაურების უსაფრთხოების ნიშნით საქართველო მსოფლიოში 65-ე ადგილზეა — Asher & Lyric-ის კვლევა

Asher & Lyric-მა ლგბტქი მოგზაურებისთვის ახალი კვლევა გამოაქვეყნა, რომელიც 203 ქვეყანას ლგბტქი ტურსიტების უსაფრთხოების ნიშნით სწავლობს. ლგბტქი მოგზაურობის უსაფრთხოების ინდექსი არაერთ საერთაშორისო წყაროზე დაყრდნობით

მსოფლიოში ყველაზე ბედნიერი ლგბტქი მოქალაქეები ამსტერდამში არიან

DC Jewelery-ის გუნდმა 100 ყველაზე პოპულარული ტურისტული მიმართულება შეისწავლა, ინსტაგრამის პოსტებს, გუგლის საძიებო სისტემას, მსოფლიო ბანკის მონაცემებსა და The William’s ინსტიტუტის გეი მიმღებლობის ინდექსს გადახედა და შეყვარებული, მათ შორის, ლგბტქი წყვილებისთვის საუკეთესო ქალაქები გამოავლინა.

მსოფლიოს ქალაქებიდან ყველაზე ბედნიერი ლგბტქი მოქალაქეები ნიდერლანდების დედაქალაქ ამსტერდამში არიან. მეორე და მესამე ადგილზე კი კანადის ქალაქები ვანკუვერი და ტორონტო აღმოჩნდნენ.

ამსტერდამი ლგბტქი უფლებების დაცვის ხანგრძლივი ისტორიით იწონებს თავს. ქვეყანაში ჰომოსექსუალობის დეკრიმინალიზაცია ჯერ კიდევ 1811 წელს მიიღწა. დღეისთვის კი ლგბტქი მიმღებლობის ინდექსი 9,46-ს შეადგენს, რაც თითქმის საუკეთესო 10-ქულიან შედეგს მცირედით ჩამორჩება.

ყველაზე ბედნიერი ლგბტქი მოქალაქეების საუკეთესო სამეულში კანადის ორი ქალაქიც მოხვდა, რომლებიც აღნიშნული მაჩვენებლის მიხედვით ერთი და იმავე ადგილზე არიან. კანადის ლგბტქი მიმღებლობის ინდექსი 9,02-ს შეადგენს.

DC Jewelery-ის სიაში მხოლოდ საუკეთესო სამი ქალაქის მაჩვენებელს ვხვდებით, თუმცა საქართველოს დედაქალაქ თბილისს ვრცელ სიაში სახარბიელო ადგილი სავარაუდოდ არ ექნებოდა, რადგან ეს მაჩვენებელი დიდწილად საზოგადოებაში ლგბტქი მიმღებლობის ინდექსს ემყარება, რომლის მიხედვითაც საქართველოს 10-დან 2,94-ქულიანი მაჩვენებელი აქვს და 141-ე ადგილზეა.

ლგბტქი მოგზაურების უსაფრთხოების ნიშნით საქართველო მსოფლიოში 65-ე ადგილზეა — Asher & Lyric-ის კვლევა

Asher & Lyric-მა ლგბტქი მოგზაურებისთვის ახალი კვლევა გამოაქვეყნა, რომელიც 203 ქვეყანას ლგბტქი ტურსიტების უსაფრთხოების ნიშნით სწავლობს. ლგბტქი მოგზაურობის უსაფრთხოების ინდექსი არაერთ საერთაშორისო წყაროზე დაყრდნობით ვლინდება და ქვიარ ადამიანებს მოგზაურობის დაგეგმვისას დახმარებას უწევს.

ქვეყნის ინდექსი 10 სხვადასხვა კრიტერიუმზე დაყრდნობით ითვლება — ქორწინების თანასწორობა, მშრომელთა უფლებების დაცვა, დისკრიმინაციის საწინააღმდეგო კანონმდებლობა, ძალადობის კრიმინალიზება, შვილად აყვანის გარემოებები, რამდენად კარგია საცხოვრებელია გარემო, რომელიც Gallup-ის კვლევის შედეგს ემყარება, გენდერის მარკერის ცვლილების სამართლებრივი გარემოებები, ტრანსგენდერი ადამიანების მკვლელობის შემთხვევები, ერთი და იმავე სქესის წყვილთა ურთიერთობასთან დაკავშირებული საკითხები, მორალის სახელით პროპაგანდასთან დაკავშირებული კანონების არსებობა.

კვლევის მიხედვით, ლგბტქი მოგზაურებისთვის 10 საუკეთესო მიმართულება კანადა, შვედეთი, ნიდერლანდები, მალტა, პორტუგალია, დიდი ბრიტანეთი, ბელგია, ნორვეგია, ესპანეთი და საფრანგეთია.

10 ყველაზე საფრთხისშემცველი ქვეყანა კი ბრუნეი, ნიგერია, ქუვეითი, საუდის არაბეთი, განა, მალაიზია, მალავი, ტონგა, სომალი და ლიბიაა.

ლგბტქი მოგზაურობის უსაფრთხოების ინდექსის მიხედვით საქართველო აღნიშნულ სიაში 65-ე ადგილზეა და მნიშვნელოვნად უსწრებს სხვა მეზობელ ქვეყნებს. საქართველოს შემდეგ საუკეთესო შედეგი სომხეთს აქვს და 89-ე ადგილზეა, თურქეთი 103-ე ადგილზეა, აზერბაიჯანი კი 127-ეზე, მეზობლებიდან ყველაზე ცუდი შედეგი რუსეთს აქვს, რომელიც 132-ე ადგილზეა.

გახდა თუ არა მსოფლიო ლგბტქი ადამიანებისთვის საცხოვრებლად უკეთესი — Gallup-ის გლობალური გამოკითხვა

მსოფლიოს ზრდასრულ მოქალაქეთა ნახევარი თვლის, რომ მათი ქალაქი ან საცხოვრებელი ადგილი ქვიარ ადამიანებისთვის საცხოვრებლად კარგი, უსაფრთხო ადგილია. აღნიშნული მაჩვენებელი გასულ ათწლეულში ორჯერ უფრო უკეთესია, ვიდრე უწინ.

Gallup-ის მიერ 110 ქვეყნის მცხოვრებთა 2021 წლის გამოკითხვა კიდევ ერთხელ ადასტურებს სხვა გლობალური კვლევების შედეგებს, რომელთა თანახმად, ლგბტქი მიმღებლობა იზრდება. მიუხედავად ამისა, მიმღებლობასთან დაკავშირებით გამოწვევები კვლავ მძაფრად დგას — ყოველი გამოკითხული 10 ადამიანიდან, 4 მიიჩნევს, რომ მათი საცხოვრებელი ადგილი ქვიარებისთვის „სათანადო არაა”, 12%-ს კი კითხვაზე პასუხი არ აქვს. 

2005 წლის გამოკითხვის მიხედვით, გამოკითხულთა 21%-ს მიაჩნდა, რომ მათი საცხოვრებელი ადგილი ლგბტქი ადამიანებისთვის უსაფრთხო იყო. 2014-2019 წლებში ეს მაჩვენებელი 31%-დან 38%-მდე მერყეობდა, 2020 წელს 49%-ს მიაღწია, ხოლო 2021 წელს რეკორდულად მაღალი მაჩვენებელი, 50% დაფიქსირდა.

ყველაზე დიდი გაუმჯობესება აზიისა და აღმოსავლეთ ევროპის ქვეყნებშია

გასულ ათწლეულში, 73 ქვეყანაში მოსაზრება გარემოს უსაფრთხოებასთან დაკავშირებით, სულ მცირე, 5%-ით არის გაზრდილი. 14 ქვეყანაში კი იმ ადამიანების რიცხვი, რომლებიც გარემოს უსაფრთხოდ თვლიდნენ, უმცირესობიდან უმრავლესობად იქცა.

უსაფრთხო გარემოს შესახებ აზრი მნიშვნელოვნად გაუმჯობესდა ნეპალში, ინდოეთში, ვიეტნამში, ჩეხეთში, მექსიკაში, ტაივანში, ჩილეში, სლოვენიაში, სამხრეთ აფრიკაში, ვენესუელაში, კოლუმბიაში, ლაოსში, პოლონეთსა და ტაილანდში.

უსაფრთხო გარემოსთან დაკავშირებით დამოკიდებულება ყველაზე აშკარად ნეპალში შეიცვალა და თითქმის გაოთხმაგდა. 2011 წელს გამოკითხულთა 23% მიიჩნევდა, რომ გარემო უსაფრთხო იყო, ხოლო 2021 წელს — 86%. შესაძლოა, ეს ცვლილება ლგბტქი საკითხებთან დაკავშირებით სასამართლოს გადაწყვეტილებებმა ან ხელისუფლების მიდგომის ცვლილებამ, მათ შორის, ლგბტქი ადამიანების დაცვის გარანტიების კონსტიტუციაში ასახვამ განაპირობა. სასიკეთო ცვლილებებია ინდოეთშიც: 2011 წელს, გამოკითხულთა მხოლოდ 12% მიიჩნევდა გარემოს უსაფრთხოდ, ახლა კი ეს მაჩვენებელი 53%-ს აღწევს. ინდოეთში ჰომოსექსუალობის დეკრიმინალიზება 2018 წელს მიიღწა, თუმცა უნდა აღინიშნოს, რომ ეს მხოლოდ მცირედი უკეთესობაა. ნეპალს, ისევე როგორც ინდოეთს, ლგბტქი ადამიანების წინაშე არსებული მნიშვნელოვანი გამოწვევები ჯერაც არ გადაუწყვეტია.

სულ მცირე, 20%-ით არის გაუმჯობესებული უსაფრთხო გარემოსთან დაკავშირებული აზრი ტაივანში (57%), ტაილანდში (54%), ვიეტნამში (51%), 10%-იანი გაუმჯობესებაა ლაოსში და მაჩვენებელი 51%-ს აღწევს.

აღმოსავლეთ ევროპის ქვეყნებში — ჩეხეთში (70%), სლოვენიაში (54%) და პოლონეთში (52%) უკვე უმრავლესობა მიიჩნევს, რომ გარემო ქვიარ ადამიანებისთვის უსაფრთხო და კარგია.

გაუმჯობესებულია ლათინური ამერიკის მაჩვენებელიც: ურუგვაიში (82%), მექსიკაში 64%, ჩილეში 63%, ვენესუელაში 59% და კოლუმბიაში 58% თვლის, რომ გარემო უსაფრთხოა.

მოსაზრება ჩინეთში (47%), საბერძნეთში (49%), ისრაელში (45%), კენიაში (24%) და სხვა 24 ქვეყანაშიც ბევრად სასიკეთოა, თუმცა უმრავლესობა მაინც ფიქრობს, რომ გარემო უსაფრთხო არაა. ხოლო ორ ქვეყანაში — ნიკარაგუასა და პარაგვაიში, უსაფრთხო გარემოსთან დაკავშირებით მოსაზრება უარესობისკენ შეიცვალა. ამის მიზეზი ისაა, რომ ნიკარაგუას პრეზიდენტი დემონსტრაციების ჩატარებას ხელს უშლის, ლგბტქი ორგანიზაციების დახურვას ცდილობს, პარაგვაიში კი კონსერვატიულმა ხელისუფლებამ სახელმწიფო პოლიტიკა, მათ შორის, განათლების ინკლუზიურობის კუთხით სახელმწიფო პოლიტიკა ლგბტქი ადამიანების საწინააღმდეგოდ შეცვალა.

სკანდინავიის ქვეყნები ქვიარ ადამიანებისთვის საცხოვრებლად საუკეთესოა

სკანდინავიის ქვეყნებში გარემოს უსაფრთხოების შესახებ მოსაზრება ყველაზე სასიკეთო მაჩვენებელზეა: ნორვეგია —92%; შვედეთი — 91%; ისლანდია — 88%; დანია — 82%; ფინეთი — 82%. გამოკითხვის მიხედვით, საუკეთესო მაჩვენებლის მქონე სხვა ევროპის ქვეყნები ნიდერლანდები (90%), ესპანეთი (88%), მალტა (85%) და ბელგია (80%) არიან.

მსოფლიოს სხვა წერტილებში გამორჩეულად პოზიტიური შედეგი კანადის (87%), ავსტრალიის (86%), ახალი ზელანდიისა (85%) და აშშ-ს (80%) მოსახლეობის გამოკითხვამ აჩვენა.

ყველაზე სამწუხარო მაჩვენებელი აფრიკის კონტინენტზეა, სადაც ქვეყნების დიდ ნაწილში ჰომოსექსუალობა კანონით ისჯება (იმ ქვეყნებს შორის, სადაც ჰომოსექსუალობა კრიმინალიზებულია, ნახევარზე მეტი აფრიკაში მდებარეობს. განსაკუთრებით მძიმე მაჩვენებელი მალავიში (3%), სენეგალში (3%), განაში (7%), ზამბიაში (7%), ბურკინა ფასოსა (8%) და ნიგერიაშია (9%).

პოსტ-საბჭოთა ქვეყნებიდან ყველაზე უარესი მდგომარეობა სომხეთში (4%), ყაზახეთში (4%) და ყირგიზეთშია (6%). Gallup-ის გამოკითხვის მიხედვით, არანაკლებ სამწუხარო შედეგია საქართველოშიც და იმ ადამიანთა რიცხვი, რომლებიც ქვეყანას ლგბტქი ადამიანებისთვის კარგ ადგილად თვლიან, სულ რაღაც 9%-ია.

Gallup-ის მსოფლიო გამოკითხვა სწრაფად ცვალებად შედეგებს აჩვენებს, რაც იმის მტკიცებულებაა, რომ სახელმწიფო პოლიტიკის ცვლილება და საკანონმდებლო ჩარჩოს მეტად გამართვა სწრაფად აისახება სოციალურ ცვლილებებშიც (მაგალითად, ინდოეთი და ნეპალი), თუმცა უმეტეს, 65 ქვეყანაში, უმრავლესობა, 50%-ზე მეტი, თვლის, რომ მათი ქვეყანა ლგბტქი ადამიანებისთვის საცხოვრებლად კარგი არაა. აღნიშნული გამოკითხვა, იმასაც აჩვენებს, რომ მდგომარეობა უარესობისკენაც შეიძლება შეიცვალოს, თუმცა ხშირად ეს მხოლოდ გამონაკლისის სახით ხდება.

Gallup-ის 2021 წლის მსოფლიო გამოკითხვაში უსაფრთხოების მიზეზით და სენსიტიური კითხვიდან გამომდინარე 12 ქვეყნის შედეგი ვერ მოხვდა.

წყარო: Gallup