პოპულარული ბრიტანული ქვიარ სერიალი Queer as Folk ეკრანებზე 9 ივნისს დაბრუნდება.
საკულტო სერიალი, რომლის პრემიერაც 1999 წელს შედგა, რასელ ტ დეივისს ეკუთვნის და 2000-2005 წლებში მისი ამერიკული ვერსიაც გადაიღეს.
სერიალის გაცოცხლების შესახებ ინფორმაცია პირველად 2018 წელს გავრცელდა, როგორც ცნობილია, ახალ სერიალში მოქმედება არა პიტსბურგში ან მანჩესტერში, არამედ ნიუ-ორლეანში განვითარდება და მოგვიყვება ქვიარ მეგობრების ისტორიას, რომელთა ცხოვრებაც ტრაგედიის შემდეგ რადიკალურად იცვლება.
სერიალში ერთ-ერთ მთავარ გმირად მომხიბვლელი და ქაოტური ბროდი მოგვევლინება, რომელიც ტრაგედიის შემდეგ გადაწყვეტს, დარჩეს ნიუ-ორლეანში და გააგრძელოს ცხოვრება.
ფინ ანგუსი მინგუსის, თავდაჯერებული სკოლის მოსწავლის როლში მოგვევლინება. ხოლო ჯესი ჯეიმსი ტრანსგენდერი გოგონას როლს შეასრულებს, რომელსაც რეალობისთვის თვალის გასწორება და დაუსრულებელი წვეულებებიდან ზრდასრულობაში გადასვლა უჭირს.
სერიალში ასევე ვიხილავთ არაბინარული იდენტობის პროფესორს და წარმატებულ ადვოკატ ნოას.
სერიალში მთავარ როლში ვიხილავთ Netflix-ის სერიალის, Special-ის მსახიობ რაიან ო კონელს, რომელიც ცერებრალური დამბლის მქონე პერსონაჟის როლს შეასრულებს. მსახიობი სერიალის სცენარისტი და აღმასრულებელი პროდიუსერიცაა.
ასევე ცნობილია, რომ სერიალში ეპიზოდურ როლებს შეასრულებენ “სექსი დიდ ქალაქშის” მსახიობი კიმ კეტრელი, არმანდ ფილდსი, American Next Top Model-ის გამარჯვებული ნაილ დიმარკო და ლუკას ქეიჯი.
სერიალის შექმნელი ამბობს, რომ „ქვიარ საზოგადოება 1999 წლის შემდეგ ძალიან შეიცვალა, მეტად რადიკალურები გავხდით, მეტი აღმოჩენა გავაკეთეთ და ვიპოვეთ ახალი სიტყვები ამ ყველაფრის ასახსნელად. გვყავს ახალი მტრები და მეგობრები, ძალიან ბევრი სათქმელი დაგროვდა.”
მისი განმარტებით, ახალი Queer as Folk სწორედ ისეთია, როგორიც უნდა იყოს ქვიარ სერიალი, მეტად მრავალფეროვანია, გიჟური და თავისუფალი.
როგორც სერიალის ერთ-ერთი სცენარისტი და პროდიუსერი ჟაკლინ მური განმარტავს, ქვიარ ადამიანების და განსაკუთრებით ტრანსგენდერი ადამიანების ისტორიები ხელოვნებაში უკიდურესი ფორმებით არის ნაჩვენები და არ ასახავს მათ რეალურ პრობლემებსა თუ ცხოვრების წესს.
„ჩვენ გვსურდა, აღგვეწერა ისეთი ქვიარ ადამიანები, რომლებიც არიან რთულები და კომპლექსურები, რომლებიც არიან მხიარულები და მზრუნველები, თუმცა, ამასთან ერთად, არიან ეგოისტები, მაგრამ მაინც იმსახურებენ სიყვარულს. მაინც იმსახურებენ იმას, რომ მათი ისტორია მოვყვეთ.”
Queer as Folk Peacock-ის სტრიმინგ სერვისზე 9 ივნისს იქნება ხელმისაწვდომი.
