საქართველოს სახალხო დამცველმა სქესის ნიშნით დისკრიმინაციის საქმის ფარგლებში საქართველოს ფეხბურთის ფედერაციას (სფფ) რეკომენდაციით მიმართა, რომელიც პროფესიონალი ქალი ფეხბურთელების მიმართვის საფუძველზე გამოიცა. ქალი ფეხბურთელების ინტერესებს ქალთა ინიციატივების მხარდამჭერი ჯგუფი (WISG) წარმოადგენდა.
WISG-მა სახალხო დამცველის წინაშე რამდენიმე პრობლემური საკითხი დააყენა, მათ შორის, ის, რომ კაცებისგან განსხვავებით, ფეხბურთელი ქალები ვერ სარგებლობენ ჯანმრთელობის დაცვის სერვისებით, არ აქვთ თანაბარი წვდომა რესურსებზე, შედეგად, უზიანდებათ ჯანმრთელობა და მცირდება მათი ცხოვრების ხარისხი. ასევე, ქალების რეპროდუქციული ჯანმრთელობის მიმართულებით არსებული საჭიროებები სფფ-ის არსებულ რეგულაციებში გათვალისწინებული არ არის.
WISG-ის გამოკითხვის თანახმად, გამოკითხული ქალი ფეხბურთელების ნახევარზე მეტს ჯანმრთელობის შემოწმების პროცედურები არ უტარდება, ამასთან, 82.8% ჯანმრთელობის დაზღვევით ვერ სარგებლობს.
„სადაზღვევო პაკეტი არ არის მორგებული ფეხბურთელის საჭიროებებს და იმდენად მწირ სამედიცინო სერვისს ფარავს, რომ საყოველთაო დაზღვევისგან თითქმის არაფრით განსხვავდება. მე მაგალითად, ტრავმის შემდგომი რეაბილიტაციისთვის ყოველ 6 თვეში ერთხელ მესაჭიროება საკმაოდ ძვირადღირებული მედიკამენტი, რომლის ანაზღაურებაზეც სადაზღვევო კომპანიამ უარი მითხრა. პირადი სახსრებით, მით უფრო დაბალი ანაზღაურების პირობებში, წარმოდგენა არ მაქვს როგორ უნდა მოვახერხო ამ ხარჯის დაფარვა. ასევე, ვფიქრობ, რომ ამ სფეროში ყველა მიღწევა და პოზიტიური ცვლილება პირდაპირ უნდა აისახებოდეს გოგოების პროფესიულ ცხოვრებაზე მათი წარმატების, ცნობადობის, კლუბის სტატუსის თუ სხვა ნიშნის მიუხედავად. ის ფაქტი, რომ ცალკეულ კლუბებს ჯანმრთელობის დაცვის ან დაზღვევის კუთხით უკეთესი მდგომარეობა აქვთ, არ ცვლის ზოგად, საგანგაშო სურათს“, — აღნიშნა კლუბ „მართვეს“ ფეხბურთელმა, ლანა გორგაძემ WISG-თან საუბრისას.
ტრავმის ან ჯანმრთელობის სხვა პრობლემის შემთხვევაში, ფეხბურთელი ქალებისთვის სამედიცინო კვლევებისთვის საჭირო ანაზღაურების მიღების ერთადერთ გზად კვლავ ადმინისტრაციულ პერსონალთან კომუნიკაცია რჩება, თუმცა, როგორც ფეხბურთელების ყოველდღიური გამოცდილება აჩვენებს, ადმინისტრაციის მხრიდან უგულებელყოფას ან არასათანადო, დაგვიანებულ და არასრულ დახმარებას კვლავ სისტემატური ხასიათი აქვს.
საქართველოს სახალხო დამცველმა დისკრიმინაციად მიიჩნია ის გარემოება, რომ საქართველოს ფეხბურთის ფედერაციის რეგულაციებში არ არის გათვალისწინებული ქალების სპეციალური საჭიროებები რეპროდუქციული ჯანმრთელობის მიმართულებით, კერძოდ: ლიცენზირებას დაქვემდებარებული გუნდების ექიმების სავალდებულო ტრენინგებში არ არის შეტანილი ქალი ფეხბურთელების სექსუალური და რეპროდუქციული ჯანმრთელობის საკითხები; ქალი ფეხბურთელების სექსუალური და რეპროდუქციული ჯანმრთელობის კონტექსტიდან გამომდინარე, არ არის მიღებული სახელმძღვანელო დოკუმენტი (სტანდარტები) ქალი ფეხბურთელების ორსულობისა და ორსულობის შემდგომი პერიოდისთვის ფიზიკური დატვირთვის თაობაზე; ასევე, არასათანადოდაა უზრუნველყოფილი ქალი ფეხბურთელების, როგორც დასაქმებულების, დედობის დაცვის უფლებაც.
13 იანვარს, სფფ-მ სახალხო დამცველს წერილით უპასუხა და აღნიშნა, რომ მზადაა ლიცენზირებას დაქვემდებარებული გუნდების ექიმებისთვის დაგეგმილ ტრენინგებში გაითვალისწინოს ქალი ფეხბურთელების სექსუალური და რეპროდუქციული ჯანმრთელობის საკითხები, ასევე, ქალი ფეხბურთელების ორსულობისა და შემდგომი პერიოდის ფიზიკური დატვირთვის თაობაზე შესაბამისი სახელმძღვანელოს შემუშავების თაობაზე სახალხო დამცველისგან შუამდგომლობა ითხოვა, რადგან ამის კომპეტენცია ფედერაციას არ აქვს.
ფოტო: GFF
