2021 წლის 21 ფილმი, რომელიც ქვიარ გამოცდილებებს ასახავს

2021 წელს ეკრანებზე არაერთი გამორჩეული ფილმი გამოვიდა, რომელიც ქვიარ გამოცდილებებსა და გამოწვევებზე ჰყვება. დოკუმენტური და მხატვრული ფილმები თუ ანიმაციები ისეთ თემებს ფარავდნენ, როგორიც ძალადობრივ გარემოში სექსუალური თვითშემეცნების სირთულე, დავიწყებული ქვიარ ისტორია, ურთიერთობების დასრულება, ურთიერთმხარდაჭერა, შეუძლებელ პირობებში აღმოჩენილი სიყვარული და სხვა მრავალი სათქმელია.

ამ სტატიაში გასული წლის 21 გამორჩეულ ფილმზე წაიკითხავთ, რომლებიც ქვიარ გამოცდილებებზე გვიყვებიან.

21. The Power of the Dog

ფოტო: Netflix

ოსკაროსანი ჯეინ კემპიონის ახალი ფილმი კარგი ნამუშევარი ნამდვილად არ არის. რეჟისორი განუწყვეტლივ სინაზისა და დაუნდობელი გარემოს შეპირისპირებით ცდილობს ფილმის აგებას, რაც ამ ფილმში განსაკუთრებით ნაძალადევია. სცენარი იმდენად სუსტია, რომ გარკვეული ეპიზოდები კომიკურიც კი მოგეჩვენებათ, ამიტომ გასაკვირია, როგორ ახერხებენ მსახიობები როლის კარგად შესრულებას. მიუხედავად ყველაფრისა, ფილმს 2022 წლის ოსკარებზე ჯილდოს მოპოვების შანსი რამდენიმე კატეგორიაში აქვს და ამ სიის შედგენა The Power of the Dog-ის გარეშე არასწორი იქნებოდა. ბენედიქტ კამბერბეჩის პერსონაჟი უხეში, დაუნდობელი კაცია, რომელიც გრძნობებს არავის მიმართ ამჟღავნებს, თუმცა მაყურებელი პირველივე წუთებიდან მიხვდება, რომ მისი ამგვარი ქცევა კარგად დაფარული გრძნობებით არის განპირობებული. თუ ოსკარის დაჯილდოებას თვალს ყოველწლიურად ადევნებთ, ჯეინ კემპიონის ბოლო ფილმიც უნდა ნახოთ, რადგან სხვადასხვა კატეგორიის ნომინანტებს შორის ამ ფილმს აუცილებლად ვიხილავთ, თანაც, მსახიობების საკმაოდ კარგი შესრულების გამო, შეიძლება ვესტერნის ბოლომდე ყურებაც შეძლოთ.

20. The Mitchells vs. the Machines

ფოტო: Netflix

რობოტების წინააღმდეგ ამხედრებული მიჩელების ისტორია საოჯახო ანიმაციაა, რომელიც დიდად გამორჩეული არ არის, თუმცა ამ სიაში ადგილს ნამდვილად იმსახურებს, რადგან ქვიარ პერსონაჟის გამოცდილებაზე ჰყვება. ანიმაციაში პერსონაჟის სექსუალურ ორიენტაციაზე პირდაპირი საუბარი არ არის, მაგრამ დეტალებზე დაკვირვებით მიხვდებით, რომ ერთ-ერთ მთავარ როლში ქვიარი გოგო გვევლინება, რომელსაც საკუთარი იდენტობის გამო სირთულეებთან შეჯახება არ უწევს, მას ისეთ გამოწვევებთან უწევს დაპირისპირება, როგორიც ციფრული ტექნოლოგიების ეპოქაში ადამიანური კავშირების გაქრობის საფრთხეა.

19. Swan Song

ფოტო: Magnolia Pictures

გედის სიმღერასაც მცირე დეტალები გამოარჩევს, რომელმაც შეიძლება ისეთი ნაკლოვანებები გადაფაროს, როგორიც ზედმეტი პათეტიკა, ცუდი სცენარი და ვერშემდგარი კომედიური ჩანართებია. ფილმი მოხუცთა თავშესაფარში მცხოვრებ გეი კაცზე გვიყვება, რომელიც ერთ დროს სახელოვანი დალაქი და დრეგ ქვინი იყო. პეტი გარდაცვლილი მომხმარებლის ანდერძის შესასრულებლად მიემგზავრება, რომელსაც დაკრძალვისთვის ვარცხნილობა უნდა გაუკეთოს. წარულის აჩრდილებთან ერთად გავლილი გზა არაერთ მნიშვნელოვან თემას ეხება, მათ შორის, 80-იანი წლების აივ-ეპიდემიას, გასულ საუკუნეში ქვიარების უფლებრივ მდგომარეობას, რაც ხანგრძლივ პარტნიორებს მემკვიდრეობაზე უფლებას უზღუდავდა. კიდევ ერთი საინტერესო დეტალი, რომლის გამოც ფილმის ყურება ღირს, ახალი თაობის გულგრილობა, წარსულის იმ მონაპოვარის დავიწყებაა, რაზეც ქვიარ ადამიანთა ახლანდელი უფლებრივი მდგომარეობა დგას.

18. Hating Peter Tatchell

ფოტო: Netflix

პიტერ ტეტჩელის შესახებ გადაღებული დოკუმენტური ფილმი აქტივისტს გვაცნობს, რომელიც ნახევარ საუკუნეზე მეტია ქვიარ ადამიანების უფლებებზე, ხილვადობაზე ზრუნავს და ამას რადიკალური გზებით ცდილობს. ერთი ადამიანის ისტორიაზე თვალის გადავლებით აქტივიზმის ისტორიასაც ვეცნობით და იმ დაპირისპირებას, რაც LGBTQ+ თემში არსებობს. საჯარო პირების იძულებითი დაქამინგაუთება, პროტესტის რადიკალური ფორმა, საკუთარი სიცოცხლის რისკქვეშ დაყენება ტეტჩელის გზაა, რომელსაც ბევრი აქტივისტი გმობდა, თუმცა ფაქტი ერთია, პიტერის დაუღალავმა შრომამ არაერთხელ გამოიღო შედეგი და მსოფლიო ქვიარ ადამიანების უფლებებზე აალაპარაკა.

17. My Name is Pauli Murray

ფოტო: Prime Video

ამ სიის კიდევ ერთი დოკუმენტური ფილმი არაბინარული იდენტობის მქონე, ქვიარ შავკანიან მოსამართლეზე გვიყვება, რომელიც მთელი ცხოვრება სექსიზმს ებრძოდა და ამტკიცებდა, რომ დაუღალავმა შრომამ შეიძლება ცვლილებები მოიტანოს. ამერიკაში გაბატონებული სეგრეგაციის დროს გაზრდილი პოლი სხვებისგან ბავშვობიდან გამოირჩეოდა: არ უყვარდა კაბების ჩაცმა, განათლებაზე ყველაზე დიდ დროს ხარჯავდა და მუდამ იმ საქმის კეთებას ცდილობდა, რაც ქალებისთვის აკრძალულიც კი იყო. მოსამართლე, პოეტი, მწერალი და პასტორი პოლი მიურეი მუდამ ცვლილებების სათავეში იდგა, ხშირად მის ამაგს მხოლოდ გენდერული იდენტობის გამო ივიწყებდნენ, თუმცა ადამიანთა უფლებრივ მდგომარეობაზე ფიქრი სიცოცხლის ბოლომდე არ შეუწყვეტია.

16. The Hill Where Lionesses Roar

ფოტო: Loco Films

უიმედო, დროში გაყინული კოსოვო, რომელიც კრიმინალისა და კორუფციის თავშესაფარია სამი ახალგაზრდა გოგოსთვის ხაფანგია, რომლიდან თავის დაღწევაც შეუძლებელია, ამიტომ ძუ ლომები გორაკზე განმარტოვდებიან და ერთმანეთს ბრაზს, დარდებს, იმედგაცრუებას უზიარებენ. ძალადობრივ გარემოში მცხოვრებ მეგობრებს ერთადერთ თავშესაფრად ერთმანეთი ჰყავთ, რასაც ორ გოგოს შორის რომანტიული ურთიერთობაც მოწმობს.

15. Pray Away

ფოტო: Netflix

გარდაქმნის თერაპია მრავალმა ქვეყანამ აკრძალა, თუმცა ქვიარ ადამიანების ჰეტეროსექსუალად გარდაქმნის მახინჯი პრაქტიკა კანონის გვერდის ავლით კვლავაც გრძელდება. Pray Away გარდაქმნის თერაპიის ისტორიაზე იმ ადამიანების დახმარებით ჰყვება, რომლებიც თავად იყვნენ სხვადასხვა ორგანიზაციის ლიდერები თუ თერაპიის მსხვერპლები, ფილმში ნახავთ იმ ადამიანებსაც, რომლებიც საქმიანობას კვლავაც აგრძელებენ. ინდივიდუალური გამოცდილებებზე, ეკლესიის მანიპულაციური ხერხებსა და კოშმარგამოვლილი ადამიანების მონათხრობზე გადაღებული დოკუმენტური ფილმი პრობლემაზე საუბარს ისე ახერხებს, რომ არც განსხვავებული მოსაზრებები დატოვოს ყურადღების მიღმა და არც მთავარი სათქმელი დააზიანოს – გარდაქმნის თერაპია ქვიარ ადამიანების წინააღმდეგ ჩადენილი ერთ-ერთი ყველაზე დიდი დანაშაულია.

14. Ailey

ფოტო: Neon

შავკანიანი ქვიარ მოცეკვავისა და ქორეოგრაფის, ალვინ ეილის შესახებ გადაღებული დოკუმენტური ფილმი გამორჩეული ვიზუალური სანახაობაა, რომელიც გასული საუკუნის რასობრივ გამოწვევებზე ჰყვება და რევოლუციონერ ადამიანს გვაცნობს. თანამედროვე ცეკვისა და ბალეტის სინთეზი ეილის დასის გამორჩეული ხელწერა იყო, თუმცა გასულ საუკუნეში ცეკვა თეთრკანიანების კუთვნილება იყო. მარვინ ეილიმ დაამტკიცა, რომ ცეკვაში შავკანიანების ადგილი იყო და პირველი ადამიანი გახდა, რომელმაც დიდი დარბაზების შევსება შეძლო. გეი ქორეოგრაფმა, რომელიც შავკანიანი ახალგაზრდებისთვის იმედად იქცა, რთული ცხოვრების გზა გაიარა და აივ-ინფექციისგან გამოწვეული გართულებების შედეგად გარდაიცვალა, იქამდე კი საცეკვაო სცენის გარდაქმნა შეძლო, რისთვისაც პირადი ბედნიერებაც კი გაიღო მსხვერპლად.

13. Summer of 85

ფოტო: Mandarin Production

ფრანსუა ოზონის ფილმი მოზარდობის სირთულეებზე ჰყვება. 1985 წლის ზაფხულში განვითარებული მოვლენები 16 წლის ბიჭს ცხოვრების შესახებ არაერთ გაკვეთილს ასწავლის და სექსუალური თვითშემეცნების შესაძლებლობას აძლევს. ფილმს ნაივური, მოზარდისთვის დამახასიათებელი დიალოგები, გრძნობები, სამყაროს აღქმა გამოარჩევს, თუმცა ამავდროულად მნიშვნელოვან დანაკარგებთან გამკლავების გზებზეც მეტს ვიგებთ, რომლის დროსაც, შესაძლოა, საკუთარი მოწოდებაც კი აღმოვაჩინოთ.

12. Passing

ფოტო: Netflix

რებეკა ჰოლის სარეჟისორო დებიუტი ყოფილი მეგობრების შესახებ გვიყვება, რომლებიც ერთმანეთს შემთხვევით ხვდებიან. ერთი მეგობარი თავს თეთრკანიანად ასაღებს და რასისტულ ამერიკაში მშვიდად ცხოვრებას ასე ცდილობს, მეორე კი აქტივიზმშია ჩართული. ფილმი ქვიარ გრძნობებზე პირდაპირ არ საუბრობს, თუმცა დეტალებზე დაკვირვებით, მსახიობების შესანიშნავი შესრულების წყალობით აღმოაჩენთ, რომ ყოფილ მეგობრებს შორის არსებული სინაზე, ეჭვები და მიჯაჭვულობა ბევრად მეტია, ვიდრე რასიზმის დამანგრეველი გავლენის გამო სხვადასხვა მხარეს აღმოჩენილი ორი ქალის ისტორია. ფილმის ერთ-ერთ ეპიზოდში გაჟღერებული სიტყვები („ყველა რაღაცად ვასაღებთ თავს, არა?“) კი მიგახვედრებთ, რომ Passing მხოლოდ რასობრივ უთანასწორობაზე გადაღებული ფილმი არაა, არამედ თავის მოტყუებაზე, სიმშვიდის გამო ყველა ურთიერთობის, სინაზის გაწირვაზე.

11. Acts of Love

ფოტო: Hutong Productions

სიყვარულის, დაშორების, დანაკარგებთან გამკლავების, სიახლოვის ძიების შესახებ გადაღებული დოკუმენტური და მხატვრული ხერხების კომბინაცია შესანიშნავი ფილმია, რომელიც ურთიერთობების ამბავს ჰყვება. რა განსხვავებაა სიყვარულსა და სექსს შორის, გაცნობის აპლიკაციები ჩვენს ცხოვრებაზე როგორ მოქმედებს, რატომ ვეძებთ ან არ ვეძებთ კავშირებს და როგორ ვუმკლავდებით გულისტკივილს რეჟისორის პერსონალური გამოცდილებით არის მოყოლილი, რასაც მცირეხნიანი შეხვედრებისას გაცნობილი ადამიანების მონათხრობი ავსებს. Acts of Love არამხოლოდ გასული წლის, ყველა დროის ერთ-ერთი საუკეთესო ფილმია ურთიერთობების შესახებ.

10. The Girl and the Spider

ფოტო: Zurcher Film

ეს სიზმარეული ფილმი დანაკარგებზე, მჭიდრო ურთიერთობების შეუძლებლობაზე და სიჩუმეზეა, რომელიც ნელ-ნელა დიდ აფეთქებამდე ან, თუნდაც, სისასტიკის გამოვლინებებამდე მწიფდება. ფილმის ყურება ფაზლის აწყობას ჰგავს, რომლის ყველა დეტალს ვერასდროს შეაგროვებთ, თუმცა იმის გაგებას მაინც შეძლებთ, რამდენად დიდია ის ემოციური ნაკადი, რომელიც აუღელვებელი, უდარდელი ფასადის მიღმა იმალება. გოგო და ობობა დანგრეულ ურთიერთობებზე გადაღებული ფილმია, ურთიერთობებზე, რომლებიც დაშლილი, დანაწევრებულია და, შესაძლოა, მთელი არც არასდროს ყოფილა.

9. Operation Hyacinth

ფოტო: Netflix

ოპერაცია ჰიაცინტი პოლონეთის კომუნისტური პოლიციის საიდუმლო მასშტაბური ოპერაცია იყო, რომელიც 1985-1987 წლებში მიმდინარეობდა და მიზნად ისახავდა ჰომოსექსუალურ ურთიერთობაში მყოფი ადამიანების ბაზის შექმნას. ოპერაციის შედეგად 11 ათასამდე ადამიანი აღირიცხა, რომელთაც შემდგომში აშანტაჟებდნენ, ინფორმაციას სძალავდნენ ან გამოძიების პროცესში „იარაღად“ იყენებდნენ. ფილმი ჰიაცინტის პერიოდში რეალურად მომხდარ ისტორიას ეფუძნება, რომელიც ჰომოსექსუალი კაცების მკვლელობას ეხება, რომელშიც უსაფრთხოების სამსახურის მაღალჩინოსნები იყვნენ ჩართული. პოლიციის თანამშრომლის ისტორია, რომელიც გამოძიებას აწარმოებს და ამავდროულად სექსუალური თვითშემეცნების გზას გადის არის პერიოდზე, რომელიც ქვიარ ადამიანების წინააღმდეგ ჩადენილი კიდევ ერთი მასობრივი დანაშაულის შესახებ გვიქმნის წარმოდგენას

8. Wheel of Fortune and Fantasy

ფოტო: Neopa

ხელიდან გაშვებული შესაძლებლობების, კომპლექსური ურთიერთობებისა, თვითაღმოჩენების შესახებ გადაღებული იაპონური ფილმი 3 სხვადასხვა ეპიზოდისგან შედგება, რომლებიც სხვადასხვა ისტორიებზე ჰყვება. ფილმის მესამე ეპიზოდი ესკალატორზე შემთხვევითი შეხვედრით იწყება. ეპიზოდის მთავარი გმირ ქალებს ჰგონიათ, რომ ძველი კლასელები არიან, რომელთაც ერთ დროს მეგობრობა აკავშირებდათ. ერთ-ერთ მათგანს რომანტიული ურთიერთობა ჰქონდა კლასელთან, მეორეს კი მეგობრობა, პერსონაჟები მალევე აღმოაჩენენ, რომ ერთმანეთი სხვაში შეეშალათ. ქალები როლურ თამაშში ჩაებმებიან, რომლის დროსაც ვიგებთ, რომ წარსულში დარჩენილი ერთადერთი სიყვარულის და ცხოვრებით უკმაყოფილო ქალის ისტორიას ვეცნობით, რაც მთავარ კითხვამდე მიდის – რა იქნებოდა, სხვაგვარად რომ გვემოქმედა?

7. Flee

ფოტო: Neon

ავღანეთიდან ოჯახთან ერთად გამოქცეული გეი ბიჭის ისტორია, რომელმაც მრავალი სირთულე გაიარა, სანამ სიმშვიდეს მოიპოვებდა დოკუმენტური ანიმაციური ფილმია, რომელიც ინდივიდუალური მაგალითის საფუძველზე გვანახებს ლტოლვილების მძიმე გამოცდილებებს. მთელ მსოფლიოში გაფანტული ერთი ოჯახის ისტორია, რომელთაც უპირობოდ უყვართ ერთმანეთი, წარსულის ტრავმებთან გამკლავებას ცდილობენ და მძიმე გამოცდილების საზიანო გავლენის გადაფასების გზაზე დგანან გასული წლის ერთ-ერთი საუკეთესო ფილმია.

6. Benedetta

ფოტო: Pathe

ეკლესიის მანკიერებების, მანიპულაციის, სექსუალური თვითშემეცნების, ძალაუფლების წყურვილისა და ძალადობის შესახებ გადაღებული სატირა სახელოვან რეჟისორს, პოლ ვერჰოვენს ეკუთვნის, რომელიც მნახველის რელიგიური გრძნობებით თამაშობს, გასული საუკუნის იაფასიანი ეროტიკული ფილმების გაშარჟებას ცდილობს და ამავდროულად პანდემიური რეალობის საინტერესო კომენტარს გვთავაზობს. ბენედეტა ამხელს ხალხისგან განდგომილ ეკლესიას, რომელსაც სხვათა გაჭირვება არაფრად მიაჩნია და ფუფუნებით მთვრალი ამქვეყნიური სიამეებით ტკბება.

5. Shiva Baby

ფოტო: Hyperobject Industries

ებრაული დაკრძალვის ცერემონიაზე განვითარებული სიუჟეტი შესანიშნავი კომედიაა ან, გნებავთ, ისტერიკა, რომელიც საშინელებათა ჟანრის ფილმებს მოგაგონებთ და მთავარ პერსონაჟთან ერთად პანიკური შეტევის, კლაუსტროფობიული შეგრძნებების ზღვარზე გაგატარებთ, რათა ახალგაზრდა გოგოს მდგომარეობა დაგანახოთ. სანათესაოს, მშობლების, ყოფილი შეყვარებულის მოლოდინებით დაზაფრულ გოგოს ოჯახური შეკრება ჯოჯოხეთად ექცევა, რომლისგან თავის დაღწევასაც ვერ ახერხებს, მაგრამ არც ტოქსიკურ გარემოში დარჩენა შეუძლია და ათასგვარ უხერხულ მომენტს ქმნის, საბოლოოდ კი კრიზისამდე მიდის.

4. Days

ფოტო: Home Green Films

მარტოობაზე, სიჩუმეზე, იზოლაციაზე, დაბერებაზე გადაღებული ეს შესანიშნავი ფილმი პანდემიური რეალობის საუკეთესო ნამუშევარია, რომელიც მხოლოდ კონტექსტის გამო არ არის ღირსშესანიშნავი. სრულ უძრაობაში ჩაძირული ორი პერსონაჟი დღეებს ძირითადად სახლში ატარებენ, არაფერი ხდება, არავისთან ურთიერთობენ, უბრალოდ სიჩუმეში არსებობენ, შეუძლებელია იმის თქმა, ეს სიცარიელის ნიშანია თუ სიმშვიდის, მაგრამ ფილმი ერთ დიდ პასუხს მაინც იძლევა, ყველა მარტოობისთვის განწირული და ერთმანეთის მოხელთება მხოლოდ მცირე დროით შეგვიძლია.

3. Wojnarowicz: Fuck You Faggot Fucker

ფოტო: Estate of David Wojnarowicz

დეივიდ ვოინაროვიჩი 70-იანი და 80-იანი წლების გამორჩეული ქვიარ ხელოვანი იყო, რომელიც ამ შესანიშნავმა დოკუმენტურმა ფილმმა აღმომაჩენინა. ესეისტის, მწერლის, მხატვრისა და აქტივისტის ხმოვანი ჩანაწერებისა და ნამუშევრების საშუალებით მოყოლილი ხელოვნების ამბავი დაუვიწყარი გამოცდილებაა, რომელიც 80-იანი წლების აივ-ეპიდემიაზე გვიყვება, რომელმაც მრავალი ადამიანის სიცოცხლე შეიწირა და კიდევ უფრო გააღრმავა ქვიარ ადამიანების წინააღმდეგ მიმართული სიძულვილის ტალღა. თუ აქამდე ვოინაროვიჩზე არაფერი იცოდით, აუცილებლად უნდა ნახოთ ფილმი, რომელიც დიდი ხელოვანის ცხოვრებისა და შემოქმედების ამბავს უნაკლოდ ჰყვება.

2. Great Freedom

ფოტო: RohFilms Production

175-ე პარაგრაფმა, რომლის საფუძველზეც ნაცისტურ გერმანიაში ჰომოსექსუალ კაცებს საკონცენტრაციო ბანაკებში აგზავნიდნენ, 10 ათასზე მეტი ადამიანის კეთილდღეობა შეიწირა. მეორე მსოფლიო ომის დასრულებიდან, 1969 წლამდე, 100 ათასი ადამიანი წარსდგა სასამართლოს წინაშე ამ პარაგრაფში მითითებული დარღვევების ბრალდებით, 50 ათასამდე ადამიანი კი პატიმრად იქცა. დიდი თავისუფლება ერთი კაცის ისტორიას ჰყვება, რომელიც არაერთხელ დააპატიმრეს, წამებისა და არაადამიანური მოპყრობის სამიზნედ აქციეს. ფილმი მანკიერ პრაქტიკაზე ინდივიდუალური გამოცდილების დახმარებით საუბრობს და გვიჩვენებს, რომ სიყვარული დანაშაული არ არის, მეტიც, ორ ადამიანს შორის არსებულ კავშირს შეუძლია ყველაზე მძიმე გარემოებებს აჯობოს და დიდი თავისუფლების წყაროდ იქცეს.

1. Titane

ფოტო: Arte France Cinema

კანის კინოფესტივალის გამარჯვებული ფილმი ყველა აქამდე ნანახი ფილმისგან განსხვავებული გამოცდილებაა, რომელიც აბსურდის ზღვარზე გადის და ძალადობის, სექსუალური თვითშემეცნების, მშობლისა და შვილის ურთიერთობის ამბავს გვიყვება, რომელიც მაყურებელს მრავალ კითხვას გაუჩენს, მაგრამ ერთ ყველაზე მნიშვნელოვან სათქმელსაც დაანახებს – ტოტალური ძალმომრეობის, ქაოსის შედეგად გაყინული ადამიანები ვეძებთ მყარ, ურღვევ კავშირს, რომელიც გრძნობებს დაგვიბრუნებს.

მთავარი ფოტო: Estate of David Wojnarowicz

ავტორი: გიორგი ბასხაჯაური

წინა

8 ქვიარ ფოტოგრაფი ინსტაგრამზე

შემდეგი

ისრაელში გეი წყვილებს სუროგაციაზე თანაბარი უფლებები ექნებათ

ბოლო სიახლეები

კვლევის თანახმად ორსული ქვიარ ქალები უფრო ხშირად განიცდიან დეპრესიას, ვიდრე ჰეტეროსექსუალი ქალები

FacebookTweetLinkedInEmail 5 თებერვალს გამოქვეყნდა კვლევა, რომელიც შეისწავლიდა სექსუალურ ორიენტაციასთან დაკავშირებულ უთანასწორობას ორსულ ქვიარ ქალებში. კერძოდ, მათი

დააკავეს კაცი, რომელმაც 200-მდე ქალს 5000-მდე ფოტო და ვიდეო მოტყუებით და ფარულად გადაუღო

FacebookTweetLinkedInEmail სპეციალური საგამოძიებო სამსახურის ცნობით, პირადი ცხოვრების საიდუმლოს ხელყოფისა და სექსუალური ხასიათის ქმედების იძულების ფაქტზე 43

ამარი – ტრანსგენდერი მომღერალი ძლიერი ხმით და საინტერესო ისტორიით

FacebookTweetLinkedInEmail ამარი American Idol-ის მონაწილეა, რომელმაც უამრავი მსმენელი მოხიბლა მსოფლიოს მასშტაბით. 28 წლის მომღერალი წარმოშობით ამერიკელია,

წიგნის “ცისფერი – ქვიარ ამბავი ქართულ ხელოვნებაში” პრეზენტაცია ჩაიშალა

FacebookTweetLinkedInEmail 6 მარტს დაგეგმილი წიგნის პრეზენტაცია “ცისფერი – ქვიარ ამბავი ქართულ ხელოვნებაში”  ჩაიშალა. კრებული ქართველი მხატვრების