ახალი წლიდან შვეიცარიაში ტრანსგენდერი ადამიანები სქესის კანონიერად შეცვლას შეძლებენ.
შვეიცარია უერთდება ისეთი ევროპული ქვეყნების რიცხვს, როგორიც დანია, ნორვეგია, მალტა, ლუქსემბურგი, ირლანდია, ისლანდია და პორტუგალია არიან. ამ ქვეყნებში ადამიანებს საშუალებას აძლევენ, სქესი და სახელი ლეგალურად შეიცვალონ.
ახალი კანონის მიხედვით, რომელიც 1 იანვარს ამოქმედდება, 16 წელს ზემოთ ასაკის პირებს სამოქალაქო რეესტრში სქესისა და იურიდიული სახელის შეცვლა შეეძლებათ. რაც შეეხება ასაკით 16 წლამდე ახალგაზრდებს, მათ ამისათვის მეურვის თანხმობა დასჭირდებათ.
სქესის შეცვლის წესები განსხვავდება შვეიცარიის რეგიონების მიხედვით. როგორც Reuters გვატყობინებს, ხშირად ბევრ ადამიანს სამედიცინო სფეროში მოღვაწე პროფესიონალის სერტიფიკატი სჭირდება, რომელიც პირის ტრანს იდენტობას ადასტურებს. ასევე, ზოგჯერ სქესის კანონიერად შესაცვლელად ოპერაციის, ან ჰორმონალური მკურნალობის გავლას ითხოვენ. თუ ტრანსგენდერ ადამიანს მხოლოდ სახელის შეცვლა სურს, ამისათვის უნდა ჰქონდეს იმის მტკიცებულება, რომ არჩეულ სახელს რამდენიმე წელი არაოფიციალურად იყენებს.
ივნისში, ესპანეთის მთავრობამაც დაამტკიცა კანონპროექტი, რომელიც ნებისმიერ პირს 16 წელს ზემოთ საშუალებას მისცემს, შეიცვალოს სქესი და სახელი მთავრობის მიერ გაცემულ ნებისმიერ დოკუმენტზე სამედიცინო დასტურის გარეშე.
ფოტო მთავარზე: Melanie Duchene
