ექვსი წელი გავიდა მას შემდეგ, რაც ედი რედმეინი Academy Award-ზე იყო ნომინირებული ტრანსგედერი ქალის როლის შესრულებისთვის. ის ახლა ამბობს, რომ ამ როლს აღარ შეასრულებდა, თუკი ამას დღეს შესთავაზებდნენ.
Focus Features/Universal Pictures
2015 წელს ინგლისელმა მსახიობმა ედი რედმეინმა ბიოგრაფიულ ფილმში – The Danish Girl, ტრანსგენდერი ქალი მხატვრის, ლილი ელბეს როლი შეასრულა, რასაც ჰოლივუდში დიდი გამოხმაურება მოჰყვა. კამათობდნენ იმასთან დაკავშირებით, უნდა ეთამაშათ თუ არა სისგენდერ მამაკაცებს ტრანსგენდერი ქალების როლი. წლების შემდეგ მსახიობმა ისევ დაიწყო ამ საკითხზე ფიქრი და ერთ-ერთ ინტერვიუში განაცხადა, რომ ამ როლის შესრულება მისი მხრიდან შეცდომა იყო.
კამათმა იმის შესახებ, უნდა ეთამაშათ თუ არა სისგენდერ მამაკაცებს ტრანსგენდერი ქალების როლი, დუღილის წერტილს მაშინ მიაღწია, როდესაც რედმეინი ტრანსგენდერი მხატვრის როლისთვის ოსკარზე იყო ნომინირებული. ამ ამბიდან ორი წლის შემდეგ, ჯარედ ლეტომ “Dallas Buyers Club”-ში მონაწილეობისთვის ოსკარი აიღო, ხოლო ისეთი სერიალები, როგორიცაა Orange is The New Black და Transparent, კარგად აჩვენებდა იმას, რომ ნიჭიერი ტრანსგენდერი შემსრულებლები ნამდვილად არ აკლდათ.
ასევე, ეს იყო პერიოდი, როდესაც ტრანსგენდერი ადამიანების მკვლელობების გაშუქება დაიწყეს. ტრანსმიზოგინიისა და ძალადობის ირგვლივ ცნობიერების ამაღლების ფონზე კი მედიასაშუალებებმა ამ თემების მიმართ დამოკიდებულებები შეიცვალეს.
დღეს ჰოლივუდში ძალიან კარგად ესმით, რომ ტრანსგენდერმა მსახიობებმა ტრანსგედერთა როლები უნდა შეასრულონ, მაგრამ ამისათვის ჯერ კიდევ ბევრია გასაკეთებელი. როდესაც მამაკაცები ტრანსგენდერი ქალების როლს ასრულებენ, ეს ამყარებს იმ მცდარ აზრს, რომ ტრანსგენდერი ქალები მხოლოდ მამაკაცები არიან და უბრალოდ მათი ჩაცმულობაა განსხვავებული.
საბედნიეროდ, ჰოლივუდში ტრანსგენდერი მსახიობებისთვის ყველაფერი უკეთესობისკენ იცვლება. დროთა განმავლობაში სულ უფრო მეტი ფილმი თუ შოუ მოიცავს ტრანს პერსონაჟებს, რაც ნამდვილად სასიხარულოა.
წყარო: pride.com
