აივ/შიდსისგან განკურნების ინოვაციურ მეთოდს, რომელმაც შესაძლოა, უამრავი აივ დადებითი ადამიანის ცხოვრება შეცვალოს, მალე გამოცდიან ადამიანებზე. FDA-მ (ამერიკის საკვებისა და მედიკამენტების ადმინისტრაციამ) მხარი დაუჭირა აივ/შიდსის წამალს, რაც იმას ნიშნავს, რომ ინოვაციური მეთოდი, რომელიც რამდენიმე წლის წინ გამოჩნდა, ახალ ფაზაზე გადადის და სულ მალე დატესტავენ ადამიანებზე.
ვირუსის გაქრობის პოტენციურ სამკურნალო საშუალებას სამეცნიერო საზოგადოება EBT-101-ის სახელით იცნობს და მასზე ფილადელფიის უნივერსიტეტის მკვლევრები წლების განმავლობაში მუშაობენ. როგორც Excision Biotherapeutics-ის პრესრელიზში ვკითხულობთ, ახალი მეთოდით EBT-101 ინფიცირებული ადამიანის უჯრედიდან ჭრის ინფიცირებული აივ-გენომის მრავალ ნაწილს იმისთვის, რომ მას სხეულში მუტაცია არ შეეძლოს.
როგორც კომპანიის CEO, დანიელ დორნბაში, ამბობს, განსხვავებით აქამდე არსებული ანტირეტროვირუსული მკურნალობის მეთოდისგან, რომლითაც მილიონობით ინფიცირებული ადამიანი მკურნალობს და რომელიც აივ დადებითი ადამიანის ცხოვრების განმავლობაში ყოველდღიურად რამდენიმე აბის მიღებას ითვალისწინებს, ახალი მეთოდით მკურნალობა ერთჯერადად მოხდება, ადრეული ცდების შედეგად გამოიკვეთა, რომ მკურნალობის შემდეგ ადამიანის განკურნება სრულიად არ მოხდება, თუმცა საჭირო აღარ იქნება ყოველდღე მედიკამენტების მიღება, ვირუსის დონეც მინიმუმადე შემცირდება და აივ დადებითი ადამიანი აღარ იქნება გადამდები.
აივ/შიდსი ეპიდემია 80-იან წლებში დაიწყო და დღემდე 36 მილიონზე მეტი ადამიანია დაინფიცირებული. ინფექციური პათოლოგიის, შიდსისა და კლინიკური იმუნოლოგიის ცენტრის ინფორმაციით, საქართველოში უკანასკნელი ერთი წლის განმავლობაში 346 ადამიანი გახდა აივ დადებითი, ხოლო 5629 პაციენტი მკურნალობს ანტირეტროვირუსული მეთოდით.
ამავე თემაზე: ფოტოქრონიკა: აივ/შიდსის ეპიდემია (1981-2021)
