მეოცე საუკუნის 90-იანი წლებიდან ქვიარ კინოკულტურა განსაკუთრებით განვითარდა და ამ წლების განმავლობაში რეალური მოვლენები არაერთი ფილმის ინსპირაციის წყარო გახდა. ამ სტატიაში სწორედ რეალურ ამბავზე დაფუძნებულ 15 ფილმზე მოგიყვებით, რომელთა ნახვაც თავისუფალ დროს შეგიძლიათ.
Prayers for Bobby (2009) – ლოცვა ბობისთვის
,,ლოცვა ბობისთვის’’ 2009 წლის ფილმია, რომელიც 1980-იანი წლების ამერიკაში, ახალგაზრდა ბიჭის, ბობი გრიფიტის ცხოვრების შესახებ მოგვითხრობს. მას შემდეგ, რაც ბობის ოჯახი მისი ქვიარობის შესახებ გაიგებს, ურთიერთობები განსაკუთრებით იძაბება და ბობის ძალიან მნიშვნელოვანი გადაწყვეტილებების მიღება უწევს. ფილმში საკვანძო მნიშვნელობა ბობის დედის, მერი გრიფიტის პერსონაჟს აქვს, რომლის როლსაც სიგურნი უივერი შესანიშნავად ასრულებს.
Boys Don’y Cry (1999) – ბიჭები არ ტირიან
1999 წელს გადაღებული ოსკაროსანი ფილმი, ,,ბიჭები არ ტირიან’’, 1990-იან წლებში, ნებრასკაში, ბრენდონ ტინას ცხოვრების გარშემო ვითარდება. ახალ ქალაქში, ახალ სივრცესა და ხალხში, 21 წლის ბრენდონი თავს მარტივად იმკვიდრებს, თუმცა მას შემდეგ, რაც მისი ტრანს იდენტობის შესახებ გარშემომყოფები გაიგებენ, ბრენდონს ღიად აგრესიულ ჰომოფობიურ გარემოსთან გამკლავება უწევს. ფილმი რეალურ ამბავზეა დაფუძნებული და მთავარ როლებს ჰილარი სვონკი და ქლოი სევინი ასრულებენ.
Reaching for the Moon (2013) – მთვარემდე მიღწევა
,,მთვარემდე მიღწევა’’ 2013 წელს გამოსული ბრაზილიური ფილმია (გადაღებულია ინგლისურ ენაზე), რომელშიც მთავარ როლებს მირანდა ოტო და გლორია პირესი ასრულებენ. ფილმი ამერიკელი პოეტის, ელიზაბეთ ბიშოპისა და ბრაზილიელი არქიტექტორის, ლოტა სოარესის ძალიან საინტერესო, მრავალფეროვანი და დინამიკური ურთიერთობის გარშემო ვითარდება.
Pride (2014) – პრაიდი
,,პრაიდი’’ 2014 წლის ბრიტანული ფილმია, რომელიც 1980-იან წელს მომხდარ მოვლენებზეა დაფუძნებული. 1984 წელს დიდ ბრიტანეთში მეშახტეები გაიფიცნენ, ლონდონში მცხოვრებმა ქვიარ აქტივისტებმა იმისთვის, რომ მეშახტეების ოჯახებს ფინანსურად დახმარებოდნენ, სპეციალური კამპანია – LGSP (Lesbians and Gays Supporting Miners – ლესბოსელები და გეები მეშახტეების მხარდასაჭერად) წამოიწყეს. ფილმში კარგად ჩანს ის კონსერვატიული და ჰომოფობიური დამოკიდებულება, რომელიც 1980-იანი წლების დიდ ბრიტანეთში საკმაოდ დიდ პრობლემას წარმოადგენდა.
Freeheld (2014) – მემკვიდრეობის უფლება
ქვიარ ურთიერთობების არაოფიციალურობა უდიდესი პრობლემაა, რომელიც მსოფლიოს ბევრ ქვეყანაში დღემდე აქტუალურია. ,,მემკვიდრეობის უფლება’’ სწორედ ამ პრობლემაზე კონცენტრირდება და ამერიკელი წყვილის, ლორელისა და სტეისის გარშემო ვითარდება. მას შემდეგ, რაც ლორელს სიმსივნური დაავადება დაუდგინდება, წყვილი ცდილობს, მემკვიდრეობის უფლება მოიპოვოს და ამისთვის ქვიარ აქტივისტებთან ერთად სასამართლოში იბრძვიან. ფილმში მთავარ როლებს ჯულიანა მური და ელიოტ პეიჯი ასრულებენ. 2007 წელს გადაღებულია იმავე სახელწოდების დოკუმენტური ფილმიც.
Milk (2008) – მილქი
,,მილქი’’ 2008 წელს გადაღებული ფილმია, ის პირველი ღიად ქვიარ პოლიტიკოსის შესახებ მოგვითხრობს, რომელიც 1978 წელს სან-ფრანცისკოს ზედამხედველთა საბჭოს წევრად აირჩიეს. ჰარვი მილქი უმნიშვნელოვანესი ფიგურა იყო ქვიარ მოძრაობაში. ფილმში მის როლს ამერიკელი მსახიობი და რეჟისორი, შონ პენი ასრულებს. ჰარვის ცხოვრების შესახებ 1984 წელს გადაღებულია დოკუმენტური ფილმიც – The Times of Harvey Milk.
Batte of the Sexes (2017) – სქესთა ბრძოლა
ემა სტოუნისა და სტივ კარელის მონაწილეობით, 2017 წელს კომედიური დრამა, ,,სქესთა ბრძოლა’’ გადაიღეს. ფილმი 1973 წელს, ჩოგბურთის ისტორიული მატჩის გარშემო ვითარდება, რომელიც ბობი რიგსისა და ბილი ჯინ კინგს შორის გაიმართა. მატჩის გარდა, ფილმი 1970-იან წლებში ბილი ჯინის ქვიარ სასიყვარულო ურთიერთობის შესახებაც მოგვითხრობს.
Bohemian Rhapsody (2018) – ბოჰემური რაფსოდია
,,ბოჰემური რაფსოდია’’ 2018 წლის ოსკაროსანი ფილმია, რომელსაც გამოსვლისთანავე განსაკუთრებული ყურადღება და წარმატება ხვდა წილად. ფილმი ლეგენდარული ქვიარ მუსიკოსის, ფრედი მერკურის ცხოვრების შესახებ მოგვითხრობს, მთავარ როლს კი ცნობილი მსახიობი, რამი მალეკი ასრულებს.
The Secret Diaries of Miss Anne Lister (2010) – ენ ლისტერის საიდუმლო დღიურები
2010 წელს გადაღებული ეს ძალიან საინტერესო ფილმი ადრეულ მეცხრამეტე საუკუნეში, მიწათმფლობელისა და ცნობილი დღიურის ავტორის, ენ ლისტერის ცხოვრების გარკვეული ეტაპის გარშემო ვითარდება. თავად ენი ქვიარ ისტორიაში ძალიან მნიშვნელოვანი ფიგურაა, რომლის შესახებაც უფრო დაწვრილებით შეგიძლიათ წაიკითხოთ აქ.
Colette (2018) – კოლეტი
,,კოლეტი’’ 2018 წელს გადაღებული ბიოგრაფიული ფილმია ფრანგი მწერლის, გაბრიელ-სიდონი კოლეტის შესახებ, რომელიც წიგნებს ქმრის, უილის სახელით აქვეყნებდა. ფილმი, გარკვეულწილად, კოლეტის ცხოვრების ქვიარ ასპექტებსა და მეცხრამეტე-მეოცე საუკუნის ფრანგულ ქვიარ კულტურაზეც კონცენტრირდება. კოლეტის როლს ცნობილი ინგლისელი მსახიობი კირა ნაითლი ასრულებს.
ავტორი: ანამარია
