ტელეკომპანია ფორმულას დაკვეთით, Edison Research-მა კვლევა ჩაატარა. კვლევის ერთ-ერთი ნაწილი, 5-6 ივლისის მოვლენებსა და ამ მოვლენების მიმართ საზოგადეობის რეაქციასა და განწყობებს ეხებოდა. გამოკითხვა 13 აგვისტოდან 5 სექტემბრის პერიოდში ჩატარდა, გამოიკითხა 1500, 18 წელს გადაცილებული, ხმის მიცემის უფლების მქონე პირი.
Edison Research-ის კვლევის თანახმად, მოსახლეობის უმეტესობა, 41%, 5 ივლისის ძალადობაზე პასუხისმგებლობას მთავრობას აკისრებს. 27% ამბობს, რომ მომხდარ ძალადობაზე პასუხისმგებლობა პრაიდის ორგანიზატორებს ეკისრებათ, 11% მიიჩნევს, რომ პასუხისმგებელი ოპოზიციაა, 9%-ის აზრით, პასუხისმგებლობა პრორუსულ ძალებს ეკისრება, 6% თავად მედიას აკისრებს პასუხისმგებლობას, ხოლო 6% – საპატრიარქოს.
მოსახლეობის 73% აზრით, სახელმწიფომ უნდა უზრუნველყოს LGBTQ პრაიდის მონაწილეთა უსაფრთხოება. 27% კი თვლის, რომ პრაიდის მონაწილეთა უსაფრთხოება სახელმწიფომ არ უნდა უზრუნველყოს.
Edison Research-ის გამოკითხვის შედეგებით, ტვ პირველის ოპერატორის ლექსო ლაშქარავას გარდაცვალებას მოსახლეობის უმრავლესობა სრულად ან ნაწილობრივ (39-39%, ჯამში 78%) უკავშირებს 5 ივლისის მოვლენებს. მხოლოდ 22% ამბობს, რომ ლაშქარავას გარდაცვალება ამ დღეს საერთოდ არ უკავშირდება.
მოსახლეობის 54% ამბობს, რომ 5 ივლისის გარშემო განვითარებულ მოვლენებთან დაკავშირებით საქართველოს საპატრიარქომ სწორი პოზიცია დაიკავა. 46% კი ამბობს, რომ ეს პოზიცია არასწორი იყო.
გამოკითხვის შედეგებით, მოსახლეობის უმრავლესობა – 56% ამბობს, რომ 5-6 ივლისის მოვლენების შემდეგ შინაგან საქმეთა მინისტრი, ვახტანგ გომელაური, უნდა გადამდგარიყო. შესაბამისად, საპირისპიროს 44% ამბობს.
შედეგების ცდომილება +/- 3%-ია.
წყარო: ტელეკომპანია ფორმულა
