გლობალური პანდემია, როგორც ბევრი სხვა სფეროსთვის, სატელევიზიო ინდუსტრიისთვისაც ძალიან მძიმე აღმოჩნდა – 2020 წელს შეჩერდა ბევრი სერიალის გადაღება, ზოგი საერთოდ გაუქმდა, თუმცა, ამის მიუხედავად, ინტერნეტ და საკაბელო ტელევიზიები ნელ-ნელა უბრუნდებიან ძველ რიტმს და უამრავ ახალ სატელივიზო შოუს გვთავაზობენ.
გთავაზობთ 7 ახალ ქვიარ სერიალს, რომლის სატელევიზიო პრემიერა 2021 წელს შედგა ან ახალი სეზონით დაგვიბრუნდა ეკრანებზე.
It’s a Sin
80-იანი წლების დასაწყისში მსოფლიოში შიდსის ეპიდემიამ იფეთქა, ვირუსი სწრაფად ვრცელდებოდა და ძალიან ბევრი ადამიანის სიცოცხლე შეიწირა. სხვადასხვა ქვეყნის მმართველი ძალები არაფერს აკეთებდნენ და ძალიან მალევე უმრავლესობამ დაიჯერა, რომ ეს ახალი ტიპის ვირუსი LGBT+ ადამიანების სასჯელი იყო ღმერთისგან.
2021 წლის ბრიტანული სერიალი სწორედ 80-იან წლებსა და ბრიტანეთის LGBT+ საზოგადოებაზე გვიყვება. ახალგაზრდებზე, რომლებიც ახალ ცხოვრებას იწყებენ ლონდონში და ჯერ კიდევ არ იციან, რომ ჰომოფობიაზე და პატრიარქატზე უფრო დიდი მონსტრი უახლოვდება სამყაროს ვირუსის სახით.
მინი-სერიალი სულ 5 ეპიზოდისგან შედგება და იდეალურად აცოცხლებს 80-იანი წლების დიდ ბრიტანეთს, ბრიტანეთის საზოგადოების სხვადასხვა ფენას და ბრძოლას თავისუფლებისთვის, სიყვარულისთვის და სიცოცხლისთვის.
Special
განსაკუთრებული საჭიროების მქონე პირების ცხოვრება არა მარტო ჩვენს რეალობაში, არამედ განვითარებულ ქვეყნებშიც კი ბუნდოვანია, საზოგადოებამდე არ მიდის იმ ადამიანების ხმა, ვისაც ყველაზე მეტად სჭირდება მხარდაჭერა და დახმარება.
სწორედ ამ სიცარიელის ამოვსების მცდელობაა სულ ახალი სერიალი Special, სადაც ცენტრალურ გმირად გვევლინება რაიანი, ახალგაზრდა გეი მამაკაცი, რომელიც მიუხედავად თავისი დიაგნოზისა (ცერებრალური დამბლა), ცდილობს, დაიწყოს დამოუკიდებელი ცხოვრება, იპოვოს საყვარელი საქმე და მამაკაცი.
კომედიური სერიალი ორი სეზონისგან შედგება და სულ სხვა კუთხიდან გვაჩვენებს სპეციალური საჭიროების მქონე პირების ცხოვრებას, თანამედროვე სამყაროს გამოწვევებს და დედისა და შვილის განსაკუთრებულ ურთიერთობას.
Halston
ალბათ, არ არსებობს ქვიარ ადამიანი, რომელსაც რაიან მერფის ერთი სერიალი მაინც არ უნახავს. American Horror Story-ის და American Crime Story-ის შემქნელებმა არც ამჯერად გაუცრუეს მაყურებელს იმედები და ცნობილი მოდის სახლის, ვერსაჩის დამფუძნებლის მკვლელობის ისტორიის შემდეგ, კიდევ ერთ ცნობილ დიზაინერზე, როი ჰალსტონზე შემოგვთავაზეს მინი-სერიალი.
ჰალსტონი მეოცე საუკუნის ერთ-ერთი გახმაურებული დიზაინერი იყო, რომელმაც თავისი კარიერა ქუდების დამზადებით დაიწყო და მას შემდეგ, რაც მისი ქუდი ჯონ კენედის ცოლმა, ჯეკი კენედიმ ინაუგურაციაზე მოირგო, დიზაინერის წარმატება ერთი-ორად გაიზარდა.
მინი-სერიალი იდეალურად აღწერს ქვიარ დიზაინერის ცხოვრების უკანასკნელ წლებს, 70-იანი წლების ნიუ-იორკის გლამურულ საზოგადოებას, დაუსრულებელ წვეულებებს ცნობილ Studio 54-ში და მოდის სამყაროს, რომელიც ასე იტაცებს მილიონობით ადამიანს მთელს მსოფლიოში.
სერიალში მთავარ როლს ევან მაკგრეგორი ასრულებს.
Genera+ion
გიფიქრია, როგორი იქნებოდა შენი თინეიჯერობა, სკოლაში უფრო მშვიდი, ჰომოფობიისგან დაცლილი გარემო რომ გქონოდათ? როგორ განვითარდებოდა შენი ცხოვრება, თუ უფრო ნაკლებად შეიზღუდებოდა შენი სურვილები, გამოხატვის თავისუფლება, არავინ გეტყოდა – ეს არ ჩაიცვა, ასე არ მოიქცე, იმასთან არ იმეგობრო და ა.შ.
HBO Max-ის ახალი სერიალი Generation სწორედ ასეთ სკოლასა და იმ ამერიკელ მოზარდებზე გვიყვება, რომლებიც თანამედროვე სამყაროში თავიანთი გზის პოვნას ცდილობენ.
კომედიისა და დრამის ეს ნაზავი თავისი ფორმითა და შინაარსით იდეალურია მათთვის, ვისაც უყვარს სერიალები სკოლის თემატიკაზე, ახალგაზრდებსა და მათ პრობლემებზე.
Why Are You Like This?
შესაძლოა, ცხოვრება 20-დან 30 წლამდე ქაოსს დამესგავსოს, მიუხედავად იმისა, რომ ახალგაზრდა ხარ, სულ ახლახანს დაიწყე ცხოვრება და ენერგიების ნაკლებობასაც არ უჩივი, ზრდასრულობაში თავით გადაშვება და სამყაროში საკუთარი ადგილის პოვნა არც ისე მარტივია.
სწორედ ამ პრობლემებზე გვიამბობს 2021 წლის ავსტრალიური სერიალი, რომელიც ანთოლოგიის ნაწილია. კომედიური ჟანრის სატელევიზიო შოუში მოქმედება ქალაქ მელბურნში, 3 მეგობრის, პენის, მიას და ოსტინის გარშემო ვითარდება, მეგობრები ერთ სახლში ცხოვრობენ, დამოკიდებულები არიან ინტერნეტზე და ცდილობენ თავიანთი უნიკალური ხმის დაფიქსირებას.
BONDiNG
Bonding კიდევ ერთი ქვიარ სერიალია, რომლის მეორე სეზონიც წელს გამოვიდა და გვიამბობს ნიუ-იორკში მცხოვრებ სტუდენტ გოგონასა და მის გეი მეგობარ კომედიანტზე, რომლებიც ფულის შოვნის მიზნით სექს სამუშაოში ჩაერთვებიან და BDSM-ის მოყვარულ მამაკაცებს დომინანტების როლში ევლინებიან.
კომედიური ჟანრის სერიალი სექსის გარშემო არსებულ ძალიან ბევრ ტაბუს და სტიგმას ხდის ფარდას და იუმორისტულად აღწერს ახალგაზრდების მეგობრობას ნიუ-იორკში.
Young Royals
Young Royals შვედური თინეიჯერული სერიალია, რომელიც სულ რამდენიმე კვირის წინ გამოვიდა ეკრანებზე. სერიალში მოთხრობილია შვედური სამეფო დინასტიის ყველაზე ახალგაზრდა წევრის, ვილჰელმის ისტორია, რომელიც მეფობის მეორე კანდიდატია.
ყველაფერი სამეფო სკანდალით იწყება, 16 წლის პრინცი ვილჰელმი თავისი სტატუსის შეუსაბამოდ იქცევა, სწორედ ამიტომ მონარქთა ოჯახი გადაწყვეტს, პრინცი ელიტურ, დახურულ სკოლაში გაგზავნონ. სკოლაში პრინცის გამოჩენას ყველა მოუთმენლად ელის, ყველას თავისი გეგმები აქვს მონარქთან დაკავშირებით, თუმცა ვილჰელმი მხოლოდ თავისი თანაკლასელი ბიჭით, სიმონით დაინტერესდება.
წინააღმდეგობებით სავსე თინეიჯერული დრამა ორი ბიჭის სიყვარულის ისტორიაზე იდეალური თავშესაქცევია მათთვის, ვისაც უყვარს სამეფო ოჯახების ცხოვრება და ქვიარ სიყვარულის ისტორიები.
