Sex Education-ის ფანებისთვის კარგი ამბავი გვაქვს! ყველასათვის საყვარელი ერიკი Doctor Who-ის ახალ სეზონში მეთოთხმეტე დოქტორის როლს შეასრულებს!
სამი სეზონის განმავლობაში ფანები თვალს ადევნებდნენ ლეგენდარული სერიალის მეცამეტე, შოუს ისტორიაში პირველი ქალი დოქტორის თავგადასავალს ჯოდი ვითთეკერის შესრულებით.
უკანასკნელი სეზონის გამოსვლის შემდეგ, ფანებს აინტერესებდათ, ვინ შეცვლიდა ჯოდის სერიალის მორიგ სეზონში, ვარაუდობდნენ, რომ როლს ოლი ალექსანდერი, ომარ დუგლასი ან ლიდია ვეტი შეასრულებდნენ.
თუმცა ვარაუდები არ გამართლდა და რამდენიმეთვიანი ლოდინის შემდეგ, ცნობილი გახდა, რომ შოუს ისტორიაში სატიტულო პერსონაჟის როლს პირველად შეასრულებს ფერადკანიანი მსახიობი.
შუტი გატვა რუანდელ-შოტლანდიელი მსახიობია, რომელიც მაყურებელმა Netflix-ის გახმაურებული სერიალიდან, Sex Education-დან გაიცნო. მსახიობი სერიალში მთავარი გმირის, ოტისის გეი მეგობრის როლს ასრულებს, უკვე სამი სეზონია, მაყურებელი თვალს ადევნებს მის განვითარებას და იზიარებს პერსონაჟის ქვიარ გამოცდილებას.
„მიჭირს სიტყვების პოვნა იმ ემოციების გადმოსაცემად, რასაც ახლა განვიცდი. ძალიან აღელვებული, ამაყი და ცოტათი შეშინებული ვარ“, – თქვა მსახიობმა ოფიციალურ განცხადებაში.
„ეს შოუ და როლი ჩემთვის და უამრავი ადამიანისთვის მთელი მსოფლიოს გარშემო განსაკუთრებით ძვირფასია. ყველა წინამორბედმა დოქტორმა უდიდესი შრომა და ნიჭი ჩადო მასში, ვეცდები, მეც მაქსიმალური გავაკეთო ამ როლისთვის“.
სერიალის მორიგი სეზონის სცენარისტმა, რასელ ტ. დეივიესმა აღნიშნა, რომ შუტი გატვამ როლს საოცრად გაართვა თავი კასტინგებზე.
Doctor Who სამეცნიერო ფანტასტიკის ჟანრის სერიალია, რომელიც BBC-ის ეთერში 1963 წლიდან გადის.
ჯერჯერობით უცნობია, თუ როდის გამოვა ლეგენდარული შოუს ახალი სეზონი.
