ჩინეთის ერთ-ერთ სტრიმინგ სერვისზე ამერიკული სიტკომის, Friends-ის განთავსების შემდეგ, ფანებმა შენიშნეს, რომ სერიალიდან ქვიარ სცენები ამოჭრილი იყო.
სერიალი, რომელიც პირველად 1994 წელს გამოვიდა ეკრანებზე, გვიამბობს ექვსი მეგობრის ისტორიას 90-იანი წლების ნიუ-იორკში, ერთ-ერთი პერსონაჟის, როსის ცოლი კი ლესბოსელია და რომანტიკულ ურთიერთობაში იმყოფება ქალთან.
ფანების თქმით, სწორედ ეს სიუჟეტური ხაზია ამოღებული სერიალიდან ჩინეთის მთავრობის მიერ და ამასთან, ბევრი დიალოგია შეცვლილი, სადაც ლგბტქი თემატიკაზეა საუბარი.
სერიალის სტრიმინგ პლატფორმაზე განთავსების შემდეგ მილიონობით ჰეშტეგი და კომენტარი გაჩნდა ჩინურ ვებგვერდ Weibo-ზე. ვებგვერდის მომხმარებლების უმეტესობა ჩინეთის მთავრობის მიერ ბოლო დროს ცენზურის გააქტიურებას აპროტესტებს.
ეს პირველი შემთხვევა არ არის, როცა პრეზიდენტი სი ძინპინის მთავრობა ჩინეთში ცენზურის მანქანის ამოქმედებას ცდილობს. როგორც The Guardians წერს, ცენზურის მანქანა გახმაურებული ამერიკულ ფილმს, „მებრძოლთა კლუბსაც“ შეეხო, როცა მაყურებელმა ფილმის დასასრულს იხილა, როგორ დააპატიმრეს კრიმინალები.
The Guardians-ის მონაცემებით, ჩინეთი ასევე უარს ამბობს ბოლო პერიოდის პოპულარული ამერიკული ბლოკბასტერების კინოთეატრებში გაშვებაზე, რადგან ფილმების სიუჟეტი ჩინეთის მთავრობის იდეოლოგიას ეწინააღმდეგება.
