სულ რამდენიმე დღის წინ ამერიკულმა კომპანია Apple-მა ახალი ელექტრონული მოწყობილობები დააანონსა.
ახალ iPhone SE მოდელთან ერთად, Apple-მა საზოგადოებას განახლებული მობილური ოპერაციული სისტემა წარუდგინა, რომელსაც iOS 15.4-ის სახელით ვიცნობთ.
პროგრამული უზრუნველყოფის განახლება iOS 15.4-ში, რომელიც სულ მალე იქნება ხელმისაწვდომი Apple-ის მობილურ ტელეფონებზე მსოფლიოს ნებისმიერ წერტილში, შეხვდებით გენდერულად ნეიტრალურ ხმოვან ასისტენტს, Siri-ს, რომელსაც Quinn ერქმევა და ახალ ემოჯიებს.
გენდერულად ნეიტრალური ხმის დამატება მას შემდეგ გახდა საჭირო, რაც გაერომ გაავრცელა მოხსენება, სადაც ამბობდა, რომ ქალის ჟღერადობის ვირტუალური თანაშემწის ხმა ,,არის პრობლემური და ხელს უწყობს სტერეოტიპების გავრცელებას”. მოხსენებაში ასევე ნათქვამი იყო, რომ ქალის ჟღერადობის ვირტუალური თანაშემწე კიდევ ერთხელ ხაზს უსვამს ქალთან ურთიერთობის ნორმებს, რომელიც ხშირად დაფუძნებულია ცალმხრივ, ბრძანებით კილოზე.
გაეროს განცხადება კომპანიას მაშინვე არ გაუთვალისწინებია, თუმცა ახალი მოწყობილობების გააქტიურებისას მომხმარებელი უკვე თავად ირჩევს სასურველ ხმას.
როგორც Apple-ის ოფიციალურმა წარმომადგენელმა განაცხადა, გენდერულად ნეიტრალური ხმოვანი ასისტენტის ხმა ლგბტქი საზოგადოების წევრებმა ჩაწერეს და ის ნაკლებად ქალური და მამაკაცურია.
განახლება კიდევ უფრო მეტად არის მორგებული ლგბტქი საზოგადოების საჭიროებებს, განსაკუთრებით, ტრანსგენდერებისთვის. ორსული მამაკაცის emoji-სთან ერთად, განახლებაში ასევე შეხვდებით გენდერულად ნეიტრალური ადამიანების ემოჯიებს.
Apple-ის ახალი iOS 15.4-ით ასევე შესაძლებელი იქნება Face ID გამოყენება და ტელეფონის განბლოკვა იმ შემთხვევაშიც კი, თუ პირბადე გიკეთია.
