სულ ახლახანს ცნობილი გახდა, რომ 2022 წელს ეკრანებზე RuPaul-ის კიდევ ერთ რეალითი შოუს ვიხილავთ.
მიუხედავად გადატვირთული გრაფიკისა, დრეგ ქვინი, სატელევიზიო სენსაცია და ემის არაერთგზის მფლობელი რუპოლი, მიმდინარე წელს ახალ გეიმ შოუს შესთავაზებს მაყურებელს.
თამაში, რომელიც წლის ბოლომდე გამოვა ეკრანებზე, 1987 წლის პოპულარული ბრიტანული შოუს, Lingo-ს რიმეიქია, სადაც მონაწილეები ფაზლის ამოხსნას, ასოების გამოცნობასა და წინადადების შედგენას ცდილობენ.
ჯერჯერობით ახალი შოუს გამოსვლის ზუსტი თარიღი უცნობია, თუმცა ცნობილია, რომ შოუ ამერიკულ საკაბელო არხ CBS-ზე გავა.
2017 წელს ასევე ცნობილი გახდა, რომ ეკრანებზე გამოვა სერიალი Queen, რომელიც მთლიანად 80-იან წლებზე, დრეგ კულტურის აღორძინებასა და რუპოლის გზაზე იქნება. ამასთან ერთად, მიმდინარე წელს დაგეგმილია არაერთი პროექტი რუპოლის მონაწილეობით, მათ შორის: RuPaul’s Drag Race, RuPaul’s Drag Race: All Star, RuPaul’s Drag Race Down Under, RuPaul’s Drag Race: UK VS World, RuPaul’s Drag Race U.K.
რუპოლ ჩარლზი ამერიკელი დრეგ ქვინი, სატელევიზიო სახე და მოდელია, რომელიც ცნობილია თავისი სატელევიზიო რეალითი შოუთი – RuPaul’s Drag Race. მისი კარიერული წინსვლა გასული საუკუნის 90-იან წლებში დაიწყო, როცა დრეგ ქვინმა გამოუშვა სინგლი, სახელწოდებით – Supermodel (You Better Work). დღესდღეობით, რუპოლ ჩარლზი ყველაზე წარმატებული დრეგ ქვინია მთელს მსოფლიოში, რომელსაც არაერთი სატელევიზიო რეალითი შოუ, ემის ნომინაცია და გინესის რეკორდი ეკუთვნის.
