„ყველაზე სასწაული პროექტი, რაც კი აქამდე გვქონია! გორის ქალთა გუნდის ხმები უკვე მთვარეზეა!“ — ვკითხულობთ გორის ქალთა კამერული გუნდის ოფიციალურ ფეისბუქ გვერდზე.
აშშ-ის აერონავტიკისა და კოსმოსური სივრცის კვლევის ეროვნული სამმართველოს – NASA, კომპანია SpaceX-ის და Astrobotic Technology-ს მხარდაჭერით, კორპორაცია Incandence Corp-მა შექმნა ციფრული არქივი, სახელწოდებით Lunar Codex, რომელიც მთვარეზე გაიგზავნება. ციფრულ არქივში შესული იქნება ხელოვანების სხვადასხვა ნამუშევარი მსოფლიოს 90 ქვეყნიდან. საქართველოდან გორის ქალთა კამერული გუნდი შეარჩიეს. Lunar Codex-ის იდეის ავტორი დოქტორი სამუელ პერალტა გახლავთ.
გუნდის სამხატვრო ხელმძღვანელის, თეონა ცირამუას გადაწყვეტილებით, პროექტისთვის სამი ნამუშევარი შეირჩა – კომპოზიტორ იოსებ კეჭაყმაძის „ეგზერსისი“, „ლაშარის გზაზე“ და ქართული (აფხაზური) სიმღერა „ვარადო“.
სამივე ნამუშევარი Leno Records-ში ჩაიწერა. მათი მოსმენა ისეთ სტრიმინგ პლატფორმებზეა შესაძლებელი, როგორიცაა Spotify და Apple Music. მთვარეზე გასაგზავნად ყველა ნამუშევარს მე-2 კაფსულაში მოათავსებენ და დანიშნულების ადგილზე 2024 წელს დაჯდება.
